有啲我以為好好嘅朋友關係，原來都好單方面。嗰啲有事揾你幫忙後，講到我係佢哋最好嘅朋友，咩只有我傾得埋之類嘅說話，只有我咁蠢相信咗。
有個朋友我私底下叫佢做惡婆，佢嘅脾氣可以喺街鬥朋友。有次喺間商店，佢睇中左個銀包，我見好靚又抵就跟住買左個，然後同佢講笑話每次同佢行街攪到我都買嘢，佢突然就發脾氣話我賴佢，我心平氣和問佢做乜咁大反應，我平時都係咁同家姐哋講笑，佢話我已係第二次咁講唔覺得我係講笑，喺啲 sales 面前鬧我。
佢有病喺度抗癌時，我幾次放工買埋外賣送佢屋企，每次都要坐返的士過海返屋企。買埋假髮tum 佢開心。但佢對我呢？我阿媽走左，花圈問候乜都無，當時接近佢生日佢仲要我出嚟同班朋友哋一齊幫佢慶祝。有次佢又發脾氣我無再揾佢，過左一年佢若無其事揾我，之後脾氣收斂左嘅，大家亦少見好多。但每次見都要就佢過海。
早排佢返完加拿大差不多一年，一月返嚟後決定年中正式移民去加拿大。以為佢會第一時間約我，等左兩個月先見，佢話好忙其實佢見哂其他朋友，仲要就佢上佢屋企見等佢可一路繼續執屋，話順便比啲手袋我，原來靚嘅袋佢已留哂比第二啲朋友，剩返有brand 兩個都一陣發霉味，其他人哋織比佢嘅袋佢又唔想對唔住人掉就夾硬塞比我要。上佢度前又要幫佢約佢朋友攞嘢，又要買定佢第二日早餐，又要買咖啡，阿四咁撲上去。
識左咁多年，我已盡左我做朋友責任，其實朋友有乜責任可言。我嘅付出佢係睇到，就係咁佢更變本加厲利用我，我本身都有問題去縱容佢，我可以 say no.不過都唔遲嘅。之前覺得佢有病唔理佢好似好衰，講到底都係為自己感覺良好，認為咁我係一個好人。其實咩叫好人？好人做比人睇，定為自己好過，定真心為人？
有同樣遭遇嘅人我建議睇一本書叫自私的藝術。
