早前的里斯本遊記提及到，這一趟小旅行的主菜就是去列支敦士登支持作客歐洲的香港足球隊。這一次係香港隊事隔好多年遠征歐洲，我完全冇諗過喺我有生之年香港隊會去歐洲作客。
由於我現在於歐洲生活，出發去列支敦士登的距離並不是太遠，同埋太掛住香港足球了，所以就毫不猶豫買機票去列支敦士登支持港隊。
支持香港隊的原困
點解我支持香港隊？答案好簡單，香港就係我嘅屋企，理所當然支持自己地方嘅球隊同埋文化。呢一種感覺係同隔住電視睇外國波完全冇得比較，球場入面所有人一條心用廣東話為香港打氣，係非常震撼的。
雖然香港足球的水平唔高，甚至有啲渣，但係覺得身為香港人就有義務去支持自己人。呢幾年香港漸漸變成一個我唔熟悉嘅地方，好像只有球場先聚到一班同聲同氣的人去支持球隊，支持大家相信的事。
其次，外國好多球迷都支持返自己地區球隊，無論佢哋嗰對波係喺頂級聯賽或者低組別聯賽，都風雨不改去支持自己人，點解我哋香港人就只會支持外國嘅球隊，而唔支持香港球隊？
多謝屋企人，細細個就帶我睇香港波，令我鍾意喺現場睇運動。長大後，我對香港嘅歸屬感再提升咗，每逢香港隊主場賽事都會去支持，甚至一啲作客賽事，例如之前韓國嘅東亞盃決賽週同埋年頭喺多哈舉行嘅亞洲杯決賽週都有去當地支持。
雖然而家我就係英國居住，冇得好似之前咁支持香港隊每一場嘅比賽，所以好珍惜呢一次香港隊去歐洲作賽嘅機會，想去當地支持港隊同埋見吓來自五湖四海，但係一條心嘅香港球迷。
交通
由於列支敦士登沒有機場，今趟支持香港隊之旅就由瑞士蘇黎世出發搭火車去到瑞士與列支敦士登的邊界，再轉乘當地巴士前往列支敦士登的市區。火車車程大約一個多小時，而在車上認識了由倫敦出發支持港隊的球迷，整程火車旅程跟他由英國生活，講到在香港支持咗幾耐香港隊，有一種他鄉遇故知的感覺。
整趟車程的風景十分優美，火車穿越不同嘅山脈，讓我置身於明信片當中。
據我所知，有一些球迷就由奧地利出發前往列支敦士登，所以呢一個國家就夾喺列支敦士登同瑞士中間。
住宿
今次住喺距離球場，大約10分鐘車程的民宿。由於列支敦士登的國土很細，可供選擇的住宿並不多。酒店的價錢比其他城市貴一大截，所以最後就決定住民宿，跟其他人一齊住。
出發前，我入咗前往列支敦士登支持港隊嘅球迷WhatsApp群組，就發現多於一半嘅球迷都同我一樣訂了同一間民宿。出發前，就已經幻想我們會佔領了整間民宿。不出我所料，當晚住喺同一間房的三個人都是香港球迷，早上吃早餐時的場面更加瘋狂，場內應該有九成都係香港人，坦白講真的好耐好耐都冇同咁多香港人一齊聚起來。
民宿被阿爾卑斯山包圍，不過10月份的時候，天氣還未算很凍，所以都阿爾卑斯山都沒有結冰。但是我就好似置身於一個童話小鎮入面，眼前都風景，就像油畫。
在民宿出發去球場的時候，更認識了其他來自英國支持香港隊嘅球迷。呢一趟支持香港之旅，真係有好多移民咗英國或者歐洲嘅香港人去支持港隊，可能路程不遠係其中一個因素，但係我覺得最大原因係大家都好喜歡香港呢個地方。
郵票博物館
睇波之前，參觀咗佢哋嘅郵票博物館。列支敦士登除咗國土細之外，另外都有「郵票小國」嘅美譽。一啲郵票嘅愛好者為咗儲齊世界上所有嘅郵票，都會嚟呢個地方。
坦白講我就對郵票冇乜興趣，同埋就唔識欣賞啦。不過嚟到呢一個一生人都未必會再去嘅國家，我都寫咗幾張明信片俾朋友同埋自己，來記錄低自己曾經因為支持喜歡的東西，而會特登去支持嘅勇氣。希望我將來都可以保持住呢份勇氣，去面對所有事。
賽前遊行
賽前香港隊嘅核心打氣團就集合大家喺瑞士同列支敦士登嘅邊界，一齊遊行前往球場。當日我擺低行李之後，時間都比較趕急。所以就冇去到萊茵橋會合佢他們，我就去到佢哋遊行嘅另外一個聚腳地加入他們。
當遊行隊伍漸漸行到我等候地方的時候，聽着他們齊心地唱着支持香港隊的打氣歌曲，腦海突然有一個喺香港唔會再發生嘅畫面出現了。原來有啲事並不是必然，可能係要荒謬到喺外國先可以做。
呢幾年無論個世界，或者身邊嘅人都變咗好多。本身覺得有一啲朋友會堅守信念，佢哋嘅立場都改變了。我自己都唔可以好清高咁講話我對呢個世界嘅睇法冇唔同到，但係唔喜歡某啲事，某啲人嘅態度係唔會改變的。
今次我哋喺列支敦士登打氣做咗一樣香港從來都冇做過嘅事，就係放狼煙。平時睇德國甚至一啲東歐嘅比賽都屢見不鮮當地球迷放狼煙，但香港隊打氣就係第一次用到。原來狼煙放起上嚟，真係好大煙，而味道都十分刺鼻，有些球迷更大叫這種味道似五年前喺香港街上聞過的味道。
睇波經過
呢場係香港隊新任教練韋斯活執教嘅第一場比賽，當日見到佢嘅排兵布陣，都令我大開眼界，佢將一些平時踢開邊路嘅球員調到去做後衛。結果當晚嘅表現就令到我們非常失望，香港足球成績唔好都唔係一啲大新聞，但係我覺得嗰晚輸咗俾被稱為歐洲魚腩列支敦士登，係一件奇恥大辱的事。再加埋網上冷嘲熱諷嘅留言波，真係有一點失望。
不過好感動嘅係香港球迷全場90分鐘不停為香港吶喊助威，有一啲球迷可能係嚟趁熱鬧，或者第一次支持港隊，但係佢哋都願意企足全場，唱着打氣歌曲，叫喊着支持香港的口號，這一個場面是非常感動，有一種贏就一齊贏輸就一齊輸嘅感覺。
Sha La La La La La La!!We Are The Hong Kong Boys
列支敦士登呢一個睇波之旅，係我出發去工作假期之前冇諗過會發生咩事。今次並不是第一次在異地支持港隊，不過係離開咗香港生活一段時間後的第一次支持香港隊，係有一種熟悉，但又陌生嘅感覺。
不過冇變嘅係雖然我而家唔喺香港，或者將來都未必喺香港居住，但係香港都係我最鍾意嘅地方。期待下次再支持香港隊的機會，希望佢可以打入下一屆嘅亞洲杯決賽週，等我再遠征沙特阿拉伯支持佢哋！
丹尼
