三月六號以後

細漢ê時陣，我定定害大人足緊張。

比論，有一擺，我問in：『為什麼參謀總長一直都是郝柏村啊？』

阿公驚kah褪褲，阿媽驚kah滲尿。仝一句話ùi無仝人ê喙--出來：「囡仔人恬恬！」 （好佳哉彼工阿母無tī厝，無，伊百面ē驚kah落屎兼失眠）

我tī學校mā是足狡怪ê囡仔。

國中二年hit時，tú好tú著中國teh 6、4。

鬧猜猜個外月，尾手，出動軍隊kā學生仔佮市民做成人膎、肉醬佮無好狗拖ê無人懷念。

人tau teh死人，台灣teh假聖女。

有一工學校kā所有ê學生lóng集合做伙，講，全高雄市ê國中生lóng ài去「勞工公園（現此時ê中央公園）hia抗議 6、4。 想著會使免上課逐家lóng足歡喜。

結局，tī hia，逐家按照學校、年級、班級，排列排好勢，徛半晡聽台仔頂ê人熱怫怫teh講演。 「共匪……」「中華民國……」『一起來呼口號！』

Koh來tō逐家ná痟--ê án-ne，台仔頂嚷一句，台仔跤上千ê學生手攑koân tòe teh hoah！ 『三民主義萬歲』『中華民國萬歲』……

我看án-ne m̄是勢，規仙人無爽快，規氣攑手著hoah：

『共產主義萬歲！』

我chit聲有夠大聲mā實在細聲，hiah大ê運動場，蓋成kan-ta徛我邊ā ê 好朋友有聽--著，伊使一个到taⁿ我iáu m̄知hit-ê意思ê笑容。

大漢了後，hit-ê笑容佮細漢時大人交代ê「囡仔人恬恬！」（囡仔人有喙無耳，有尻川袂放屁），有一工，我雄雄lóng了解--ah。

彼號叫囡仔恬恬佮無ta-ôa ê笑容，原來是tī 1947 3/6 了後藏tī心肝，塞tiâu嚨喉空，一代thn̂g一代ê恐怖痕跡。