Loket 徛捷克 ê 西爿是一搭受保護 ê Böhmisches Rothenburg 古都。伊是探訪 Karlovy Vary(德語：Karlsbad) ê 古道兼古都之一。
順花崗石起造 tī 捷克第三大河 Ohře, die Eger ê Hrad Loket（城堡）起造年閣落 tī 13 世紀。
根據考古研究推測，伊 ê 建造者是波希米亞王子 Vladislav II 或是紅喙鬚國王 Barbarossas ê 部長。城堡目今融合浪漫式佮哥德式 ê 風格推測是 13 世紀到 15 世紀 ê 世局變化，城堡換領主伊 ê 面肉 mā 跟綴變化，像台南 ê 赤崁樓。Hrad Loket 第一斗出現 ê 神奇符號時間推測是 1234，斯當時記錄城堡 ê 南爿是伊 ê 中心所在。城堡北爿 ê 人家厝佮市場是 14 世紀 tsiah 沓沓仔生湠，這款建築群設定 tuì 波希米亞來講是一件真重要 ê 規定。目今 ê 伊是博物館佮國家紀念碑。
2023 捎無東南西北 ê 我請 gún 翁成做我 ê 引路人𤆬我跟綴資料探訪各角勢，2025 翻頭耙柫挐氅氅 ê 記持，見相片猶原是東南西北揣無一條路，頇顢甲家己一屑仔齊 buê 歹勢。
Hrad Loket ê 出世交歐洲中世紀領主有相干，Hrad Loket 有才調按領主土地升格做「城市」交比領主階級閣較懸幾仔百倍 ê 國王有相關。
Hrad Loket 開始按領主土地成做城市是 Přemyslovci 家族交按德國來 ê Staufer 家族踮遮相遇做伙去 Nordgau➀，Luxemburg 家族 ê Karl IV(4世)國王 tī 囡仔時代交母親踮遮停跤幾月日，伊 ê 停跤觸著父親 ê 心緒，Hrad Loket 就此按領主土地成做城市。紲落來 ê 歷史，Hrad Loket 行過捷克家族、盧森堡家族、德國家族，tī 德國家族扞權期間，遮成做胡斯信徙推硬仔 ê 角勢，m̄-koh 無成功，新 ê 扞權者德國布蘭登堡家族守城成功。
➀ 徛位 tī 德國拜仁邦
1405 到 1437 ê 守城成功，押尾因為國王財庫不足 hōo 伊準做 m̄ 情願 mā 愛 kā 保存 tī 匈牙利 ê 皇家珠寶交 hōo 紐倫堡(Nüremberg)皇城來得著一千馬克 ê 紋銀，紲落來閣 kā 領土當 hōo 伊 ê 總理來交換對抗當地居民 ê 反抗。
因為財庫比國王曠闊，所致 hōo 國王 kā 城市當 hōo 伊 ê 總理家族 tī 1547 猶是無才調平定以奧地利 Habsburg 家族支持 ê 反亂，失去扞城權。不過這个成功 kan-ta 一𥍉眼，伊又閣當 hōo 按德國 Plauen 來 ê 領主，然後回歸波希米亞王國。
Loket 交歐洲 tsuē-tsuē 城市相仝，行過三十年戰爭(1618 ~ 1648) ê 家己 ê 土地成做別人 ê 土地並成做別人 ê 次等公民。三十年戰爭結束 ê 17 世紀，Hrad Loket 按政治中心轉型做經濟中心，18 世紀尾 ê 一場大火 hōo 伊燒甲糜糜卯卯，沓沓仔整修做浪漫式，1822 年伊按經濟中心轉型做櫳仔。
歐戰結束捷克斯洛划克成立 Hrad Loket ê 行政權歸 hōo 捷克頂港有名聲，下港上出名 ê 麥仔酒城市 Pilsener 管理，1939 ~ 1945 hōo 德國第三帝國劃入我照華語講阿喙斗腔無人聲有 ê「蘇台德」➁，二戰結束 ê 1945 5月底美國 kā Hrad Loket 交 hōo 蘇聯軍隊。這久翻頭這段歷史決定是錯誤。畢竟咱攏捌這句話鵁鴒順便空，準做目今 ê 蘇聯已經成做歷史名辭，蘇聯改體 ê 角勢 mā 無空 hōo 繼承伊領土 ê 露西亞有地順便空，伊猶原 teh 搬演 1945 ê 戲齣敢 m̄ 是。誠想 bueh 請愛搬獨裁戲 ê 人德國 ê「Talk Talk 秀台語」節目 ê 其中一段「你確定千年後我看 ē 著你，你 mā 看 ē 著我」來表示野心永遠捙拚 buē 過時間，準做咱認為 ê 羅馬帝國有千外冬 ê 歷史。
➁ Sudetenland
自 15 世紀到 1848 Loket 一直是波希米亞上西爿 ê 角勢，1848 ~ 1849 奧地利 ê 勢力捙拚 buē 過跤踏這地土地人民 ê 革命，離開這塊交𪜶語言、文化齊無相𫝛 ê 所在，Loket 按「城市」➂分拆做 27 个庄埠，規个庄頭捷克人大約仔 300 人，其他齊是波希米亞德國人，遮 ê 波希米亞德國人自 1945 齊離開這个角勢，蘇聯解體捷克交斯洛划克分做兩個獨立國家 ê 1993 Loket 成做目今 ê Loket 市， Karlovarský kraj(Karlovy variieren Region)，華語講 ê「卡羅維瓦利州」。
早前聽 gún 翁講遮較早屬德國，我齊掠做德國聯邦 ê 德國，押尾有機會跟綴好心人 ê 無料分張認捌 Der Aufstieg des Hauses Habsburg 佮 Glanz und Niedergang des Hauses Habsubrg 奧地利哈布斯堡家族 ê 起基佮落坐，只要伊開喙遮較早屬德國，我隨畫線並點一个疑問號。
這斗交翁做陣行踏 Loket 伊一見著車牌滿滿 ê D 隨講「遮較早是德國」，無網路通使用 ê 我據在伊講，一直到伊講遮是 Sudetenland 我 tsiah 有機會回應「Sicher?」確定。
「Sicher」伊個人無愛講 Sudetenland 總是 uī-tio̍h 牽手 lóo 甲比漉糊仔糜閣較 lóo ê 歐洲方位，伊只好 kā 這句 buē-su 講出喙會致著不治之症 ê 辭講出喙。
德國這段烏歷史 tuì 我是一塊鏡照家己 ê 同理心佮同情心，所致講 Sudetenland buē hōo 我起清瘼隨紲喙「按呢遮較早屬 Wien 無屬 Berlin，Sudetenland 出現 tī 1939 ~ 1945，齊 ê 波希米亞德國人需要 uī-tio̍h 恁 ê 大腸告小腸離開𪜶徛家百外冬 ê 家鄉，像這間麥仔酒廠。」
Gún 翁順我手指 ê 建築物揣佗一搭紹介伊 ê 歷史，一陣炒洋蔥 ê 芳味按跤兜 ê 窗仔趖出來，伊順這芳味正看倒看看著石碑講「這久 ê 伊至少猶 teh 賣麥仔酒。」
探訪捷克抑是波蘭搪著遮 ê 歷史，我齊想著千年土地，無百年業主，歷史佮建築齊相𫝛。
➂ Freie und Reichsstädte 自由佮帝國城市，伊是 Heiliges Römisches Reich 神聖羅馬帝國 ê 特殊行政地區，帝國貴族無伊 ê 扞權者，伊 ê 扞權者是帝國 ê 皇帝。
Loket 這个 tuì m̄ 捌捷克語 ê 我來講誠無捷克風格，tuì 講德語 ê gún 翁誠有德國味 m̄-koh 伊捎無一个摠敨，一直到 2024 tī 倚波蘭柴杙田庄搪著一位捌 tī Stuttgart 食過三冬頭路 ê 捷克朋友講，捷克有 tsuē-tsuē 地區是以德語做基礎，捷克語做發音，我 tsiah 想著 Loket 凡勢是順當地德語傳承 ê 地名，準做伊 tī 奧地利家族是 Elbogen。
猶未搬去北爿捷分張工作福利雞牢直送鮮沢雞卵 ê Audi 兄，伊 ê 太祖是按德國南爿移民去露西亞開墾，押尾停跤 tī Kazakhstan 伊講 ê 德語交目今 ê 通用德語無相𫝛，這个現象 tī 柏林 mā 捌搪過，一位無講伊按佗來 ê 少年媽媽交 gún 話仙是通用德語，交囡仔話仙是聽起來是德語 m̄ 過九分一聽無 ê 德語，像 Audi 兄交家己 ê 親人講話 gún 聽有 ê 句 mā 無幾句。總講一句 Loket 敢是德語轉做捷克語我 m̄ 捌一箍呼，總是語言本底是互相交換手 ê 結果。
Tī tuì 歐洲 ê 理解是媠甲若天堂 ê 年歲，我總掠歐洲文化無一个相𫝛 ê 面肉隔海豬哥瀾㴙㴙滴，自鉛粉掖有夠額 hōo 我 uī-tio̍h 愛情儉腸凹肚來德國交 gún 翁談戀愛，我 tuì 歐洲 ê 豬哥瀾隨收瀾，起因 m̄ 管東南西北𪜶 ê 建築生張交文化 tuì 我來講就 tshan-tshiūnn gún 翁交厝邊 ê 面肉無宛 2 體，一屑仔無 gún 翁踮台灣 ê 捎無摠，見著我排灣族 ê 同學掠做伊是菲律賓人，tī 阿里山見著鄒族姑娘掠做伊是歐洲人，tī 向天湖搪著賽夏族人講除目空無伊深目，伊 ê 皮色曬較烏寡 mā 交相片內底 hōo 庄頭頓胸坎講百分百賽夏族姑娘仝一个生張 ê hōo 伊真僫規類台灣人生做啥物面肉 ê 興趣趣。這个變化正港是 buē 食硞硞想，食著開始嫌白汫無素 ê 閒甲掠蝨母相咬 m̄ 捌啥物號做寶惜佮好運。
我 tuì Loket ê 認捌是一回看德國節目分張現代祖孫情，主持人以歌德到從心之冬 mā 愛談戀愛 tsiah 想著這段故事隨上 Google 拜請眾神賜我智慧，故事主角是 Tsiâ 地點又閣 tī 佗一搭，紲落來請 gún 翁 tī 這逝上北波羅的海三國探訪 hōo 我成做 paparazzi。
1823.7.2 74 歲 ê 歌德(1749 ~ 1832)來到溫泉療養聖地 Marienbad(Mariánské Lázně)，伊 tī 遮 ê 四常猶原是外甥仔點燈火 ê 一切照舊，規个熱人 tī 波希米亞溫泉療養地(Kurort)治療伊 ê 無四序。只不過，這斗 ê 食酒治療法比向時閣較重要，起因伊 tī 寒人險險上西天，心臟病發作。
這斗 ê 溫療治療 m̄-nā hōo 歌德期待離開若冰箱 ê Weimar mā 因為一位少女 hōo 伊若燒甲 bueh 到底 ê 蠟條人生又閣踅翻頭轉來到烏狗兄歲月。這位少女是出世 tī 1804 ê Ulrike von Levetzow，歌德老朋友 Amalie von Levetzow ê 大漢查某囝。1821 ~ 1822 進前，牽手先轉去塗州賣鴨卵 ê 歌德就捷交 Levetzows 翁仔姐來往，押尾友情深交 ê 歌德就蹛踮𪜶 ê Marienbad ê 徛家厝。
歌德 ê 牽手 Christiane Vulpius 1816 轉去塗州賣鴨卵。
歌德佮 Ulrike 第一斗見面是 1821。這位 17 歲 ê 少女是遮爾仔青春美麗 hōo 歌德充滿希望 hōo 伊不三時邀請 Ulrike 做伴。
伊差不多逐日邀請我交伊出門行跤花...暝時伊 mā 捷邀請我交伊做陣坐踮門口 ê 長椅，談戀世間大細事，一談就幾仔點鐘。這段記持根據 Ulrike ê 講法是，歌德 tuì 伊來講是「阿公」m̄ 是 bueh 追求伊 ê 人。
按呢做 ê 歌德是一絲仔齊無意識，交伊做伴 ê 查某囡仔今年 tsiah 17 歲，伊已經 74 歲，特別是紲落來 ê 熱人 kā 年歲囥一邊 ê 無意識更加明顯。
Tī 一斗展示伊 tī Marienbad 發見 ê 礦石，伊 kā 按 Wien 來 ê 一磅 tsioo-kóo-lè-tòo 囥佮礦石做伙，閣附上這段文字「請你家己享受，莫 kā 伊當做藥水，m̄-koh 愛 ê 食物。」
Ulrike 回憶，歌德按呢做足迷18人，伊 uī 我 kā tsioo-kóo-lè-tòo 交礦石濫做伙囥是滾耍笑，因為我 tuì 石頭一屑仔興趣攏無，另外伊 mā 按歌德 ê 談話之中知影歌德想 bueh 有後代，一位後生。伊一直分張伊 ê 想法，想 bueh kā 這个想法釘根 tī 我 ê 頭殼，伊 tuì 我 ê 愛有飽滇甲若父親 ê 愛。
1823 ê 熱人歌德放棄成做一位父親 ê 想法，並大膽提出伊 ê 想法。目今 73 ê 歲伊，迵過伊 ê 朋友兼頭家薩克森-威瑪公爵 ê Carl August(Carl August von Sachsen-Weimar)向 19 歲 ê Ulrike 求婚。因為拿破崙 hōo 伊按公爵成做大公 ê 歌德頭家 tuì Ulrike 講，你若嫁 hōo 歌德隨成做宮廷 ê 第一夫人，猶閣 uī 爸母得著一棟厝，交凡勢比歌德活閣較久長未亡人 ê 養老金。
Ulrike 確實活甲比歌德久長，伊 tī 食甲比歌德閣較老 ê 年歲 94 歲(1804 ~ 1899)。
這件提婚閒仔話咻一聲成做當地湠甲政治中心 ê 威瑪佮柏林，Ulrike 佮伊 ê 母親 tuì 這件親事 m̄ 捌回應，𪜶 kā 歌德 ê 求婚一耳空入，一耳空出 ê 當做 m̄ 捌發生過 ，後來閣陪伴伊做陣去今仔日 ê 主角 Loket 過生日。
歌德 tuì 這對母囝 ê 態度準做雙目金金金無青盲 mā 青盲食圓仔，心內有數， 配合𪜶 ê 態度踮 Loket 做伙快樂行跤花歡喜行尞 mā 凡勢伊 ê 幻想無幻滅。因為按呢 Die letzte Liebe des großen Dichters 上美麗 ê 黃昏之戀詩歌出世「Marienbad Elegy」Marienbad➃ 輓歌，hōo 歌德 uī 伊寫出吸人心目詩歌 ê 女主角 Ulrike 伊透世人 m̄ 捌交人成做龍鳳。世人 tuì 伊佮歌德之間肯定有啥物 ê 貓膩，人生行到晚歲伊猶原否認；Es war keine Liebschaft, sondern Goethe fand Gefallen an mir 這 m̄ 是戀愛，m̄-koh 歌德佮意我，而且是雙倍 ê 確定 Keine Liebschaft war es nicht 這 m̄ 是戀愛。
➃ Marienbad：Marien 是名，Bad 是浸溫泉 ê 所在，筆者順原意無添呼音或是轉譯。
順 gún 翁 ê 指示一路踅街做 OpenStreetMap、覕雨兼做跳針 ê 七十八轉「網路分張紀念歌德別世百冬紀念碑 tī 佗落」我總算見著這身出世 tī 捷克 Schönfeld 目今號做 Krásno ê 雕刻家交陶藝家 Willy Russ ê 作品，頭殼隨發這个問題「是恁德國人本身矮頓抑是刁意故按呢雕刻？」
Gún 翁學 Burg Hohenzollern 郝(hok)恩佐倫城搪著 ê 生份人回答。等待入場參觀 Preußen 藍城堡閒甲掠蝨母相咬 ê 我問伊「呔討恁 ê 威廉大帝寸尺怪怪，無文藝復興風格。」伊應 buē 出來，邊仔𫝛款等入場 ê 生份朋友笑講「按呢窮斤算兩計較比例，你是德國人矣。」
聽某又閣講寡 tuì 伊真僫回答 ê 問題關機一分鐘後講「你是德國人，你知影答案。」
「Albrecht Dürer 傷過貧惰 tī 意大利無學石雕」我應。
離開歌德進前，曾文溪廣播電台戀戀曾文溪-78轉音樂廣播劇第26集心酸酸哭調仔 ê 歌聲無聲無息按我 ê 牛聲馬喉唱 hōo 歌德聽。
我君離開千里遠啊 放阮孤單守家門
未食未睏跤手軟啊 瞑日思君心酸酸
無疑一去無倒轉啊 辜負青春瞑日長
連批連信煞來斷啊 害阮等無心酸酸
一時變心袂按算啊 秋風慘淡草木長
風冷情冷是無向啊 光景引阮心酸酸
親愛 ê 歌德， 當你寫 Marienbad 輓(buán)歌敢 mā 這款 ê 心緒，我問歌德，伊無回應，我 mā 莫繼續做 paparazzi。
翻頭踅轉去停車場見著路牌，我想著歐洲語文 ê 發展，特別是捷克 ê 國語按德語轉做捷克語 ê 故事：捷克利托梅利采 Litoměřice, Česko mā 想著 YouTube 推薦我看 ê 影片講者講新港文是荷蘭人 ê「魔改」。2022 進前我 tuì 這句話絕對有意見，2022 報 m̄ 著學習團無法度交人成做羊仔𤲍做伙焐燒，彼罩 hōo 我 m̄ 知按怎來 ê 雺霧隨家己 ê 燒氣沓沓仔散到 tsìn ê m̄ 捌繼續雺霧散霧。有時間去要意別人 ê 青光眼，不如好好治療家己 ê 青光眼。
歌德黃昏之愛 ê 資料來源：Als Goethe sich zu spät verliebte 當歌德晏談戀愛 von Welt
2023.07.12
