寢頭寫台文，認為家己有華文漢字基礎，所以羅馬字無重要。
台文寫一段時間沓沓仔發現這項代誌，我 ê 台文看起來是大丈夫 m̄-koh 常在見人 m̄ 捌熟似總愛請教伊「Wer sind Sie?」借問咱啥人？
是啥物因端造成我 ê 侗戇？我那繩那愖，好玄 ê 阿貓 mā 徛倚 Miau buē 離「Miau，你 ê 日文漢字 mā 是使用倉頡輸入法，敢 m̄ 是？」
「電腦交手機仔 ê 漢字我 kan-ta ē 曉一个系統，彼就是倉頡輸入法。」
「日文 ê 林檎、挽肉你齊知影彼是日文，呔討見著台文漢字隨認 buē 出人？」阿貓問。
「你無看我 teh 繩答案是 m̄。」
「你知影答案，大細目兼貧惰」阿貓無興交我盤喙錦斡頭隨走。
西班牙文、德文、英文齊是羅馬字，我從來 m̄ 捌 kā 𪜶囥踮仝一个籃仔，阿爸交阿母 mā m̄ 捌搬過翁𪜶爸母低路 ê 驕傲，呔討這久 ê 我 mā 跟綴𪜶 ê 字捌深，人帶屎？
譬相別人進前正經愛照鏡，看家己敢是五錢豬仔，掛一支喙兼大細目，懸低耳。自接受大細目，懸低耳，我開始使用信望愛台語輸入法寫部落格。我發現我 ê 問題 m̄ 是輸入法 ê 問題，是我 ê 頭殼猶原跟綴華語轉踅，像「有興趣，你誠實會使得投稿去 Bong報」看起來大丈夫 ê 語法窮實是華語台語化。
這久翻頭看彼久，我猶原 m̄ 知這久 ê 語法敢正確，總是循舊文餾語法我 ē 按呢寫「你若有興趣會使得投稿 hōo Bong報」。
這兩个語法有啥無相仝，我 m̄ 是專家，總是伊 tuì 我來講宛然田螺循舊逝，較行 mā 彼逝 ê 慣勢，像英語交德語問句齊是囥頭前，不過語法無相𫝛 ê 捷講就 tshan-tshiūnn Anne 安妮見著Ciper 佮 Siva➀buē kā 𪜶認做是𫝛一人。
Wo wohnst du?
Where do you live?
你蹛 tueh?
你家在哪?
Aller Anfang ist schwer, aber übung macht den Meister 萬事起頭難，總是捷講喙 ē 順，捷做手 buē 鈍，德語交英語 m̄ 是在來就栽 tī 舌 ê 聲音，我有法度 kā 𪜶齊使用仝一个系統敲字並講出𪜶本底 ê 聲調，呔討自帕水就聽 ê 歌聲就無才調 kā 伊敲出一字。
順語文行跤花海馬 mā 泅去龐貝城聽引路人回答𪜶團員政治正確 ê「我太太是波隆那人，她做的肉醬非常好食，她做的義大利餃子也非常好吃。」
這个政治正確是按怎來，年久月深 ê 記持成做流沙摸 buē 到底，阿貓 ê 好玄跟綴網路利便貧惰家己沓沓仔耙，七千外冬前 ê 記持取一支耙柫(pê-put)耙做一堆擲 hōo 宇宙烏空 hōo 伊 uī 我做分類。
「不想要遊客身份露餡，千萬別在義大利餐廳說你要一份“波隆那肉醬麵”」著，就是這段臭殕 ê 記持「就連波隆那市長都急著跳出來解釋“Spaghetti Bolognese”這道菜名對他來說根本就是一個假消息。」記持食著餌又閣泅去已經歸主安息「松露玫瑰」 ê 分張：
“ 波隆那肉醬的正宗食材和做法，光是用紅酒或白酒，或加不加酒的論戰就多至不勝枚舉。我對這種標籤毫無興趣，挑選了英國人稱之為義大利料理教父Antonio Carluccio 在美食節目中的公開食譜。備料簡單，老先生雙手合十說，拜託拜託，不要加任何香料，堅持要加的話就是一點點大蒜，但是我真的不建議。”
Tsiâ 正統 tsiâ 非正統？伊交 To be, or not to be, that is the question 齊是一个隨人主意 ê 問題。這是我家己佮意 ê 意大利肉醬，我佮意肉醬有芳料、白酒交蒜頭 ê 氣味，像我佮意台語文書寫愛敆羅馬字相𫝛。
這出菜到底號做啥物名？食食專業交我是地球到海王星 ê 距離，不而過以我目前 ê 生活箍仔德國來講，伊罕得號做 “Spaghetti Bolognese”，伊較捷以這个身份出現「Hackfleisch mit Tomatensoße」。
➀ 成田美名子：雙星奇緣 Cipher
2021.02.01
