我是詹美樹 ê 翁婿，媠某講 gún 今仔日愛成做 一隻牛，我 kā 伊講，gún 德國人無 teh 做羊抑是牛，不而過我知影這是掠猴入山，加講--ê。所致，我這个 kan-ta ē 曉出一支喙 ê 人就 m̄ 通乞食攑蠓捽仔，buē 博 buē 博閣兼做䆀猴 hōo 家己隱痀拋捙輪，食力閣歹看。便當紮來辦公室開始食晝，我 tsiah 拄微波，同事一个一个行倚來鼻芳兼喙瀾㴙㴙滴。當我想 bueh 開喙回應𪜶 ê 褒嗦目尾䀐著阿湯 ê 飯包，一粒林檎，二塊 kan-ta 𩛩 Há-muh 佮 Tshì-sù ê sa̋n-tóo-it-tsih，gún 小妹彼日 tuì 我講 ê 話隨浮在眼前「你頂世人燒著好香 m̄ 免接手阿爸 ê 四常」，我隨 kā 話敆便當幸福食落腹 mā 順同事 ê 欣羨交𪜶做陣褒嗦我 ê 好字運交幸福。
自 gún 來往到將時 ê 龍鳳生活，我 ê 龍鳳生活從來 m̄ 捌划入 gún 阿爸 ê 四常 mā m̄ 捌搪過牽手 buē 扛轎，硬 bueh 開轎間兼 buē 曉泅水，嫌溪狹 ê 一日到晏吵 bueh kā 灶跤翻甲閣較大間 ê 啞口 hōo 蜂叮著，有苦無地講 ê 日子，對反是我常在做這款夭壽代。一想著這點，我愛講我正經是 Schwein gehabt 好字運，無去沐著打馬膠 Pech gehabt 歹字運，起因照媠某自在閣獨立 ê 性地，無火燒埔支持伊 tuì 我 ê 愛，gún 無法得牽手到目今。感謝同事 ê 褒嗦 hōo 我想著家己 m̄ 免跟綴阿爸交人牽手一甲子日日田螺含水來過冬，mā 感謝媠某 ê 耐性，無媠某 ê 引𤆬喙白 ê 我猶原掠做我是世間上幸福 ê 人 --- 糜飯齊麭敆 Bá-tah。
自媠某按臺灣徙岫到遮，我 tuì 伊講 ê 話誠有意見，有意見甲認為伊無尊存 gún 爸母，這久翻頭並翻草感謝媠某 ê 點拄「你若是意愛狗食麥片---麥(袂)消化，無要緊，我尊存你 ê 想法，總是你千萬 m̄ 通認定我是嫁雞綴雞飛，嫁狗綴狗走，嫁乞食揹加薦斗 ê 個性」無伊這句話我猶原若 Mn̂g-sng 勉強伊愛跟綴 gún 爸母 ê 戴小鬼仔殼 ê 人生交龍鳳生活。我是詹美樹
自按赤腹鶇成做冰島 Papagei➀ 海鸚哥固定徛𫝛位生湠四常，往過無要意 ê 別人兜問題成做 gún 兜 ê 火引，特別是 gún 翁 m̄ 捌發見伊按爸母遐生湠 ê 歹癖，愛 tuì 人點「番仔火油燈」情緒叨撚交喙脣一粒珠，講話 m̄ 認輸 ê 萬項代齊是別人惹𪜶無歡喜 hōo 𪜶無法度無成做 Mn̂g-sng。
拄按臺灣徙岫到遮，我清楚知影遮是德國 m̄ 是臺灣交我家己 buē 曉扞鼎就順伊 ê 喙斗那款伊慣勢 ê 糜飯 mā 那跟綴各路大神學習歐洲糜飯，總是 m̄ 管我按怎學習，伊永遠是一句話「Gún 德國人無食這」。我尊存𪜶德國人無這款食文化，不過我無法度接受伊強迫我跟綴伊 ê 跤步過日子，特別是糜飯。
Gún 德國人無食豆腐，你 m̄ 通食。
我臺灣人 m̄ 是德國人。
咱一日愛食六頓，按呢 tsiah 健康。
我 ê 胃腸 kan-ta 有法度接受一日兩頓，不過你愛食六頓我會使得 kā 你鬥款。
Buē 使得，咱愛做陣食六頓。
我 m̄ 知影別人 ê 龍鳳生活按怎生，總是自細漢就是芋仔番薯囡仔 ê 我 m̄ 捌看過喙斗無相仝 ê 芋仔爸抑是番薯母按呢互相勉強，這款屬 gún 翁𪜶兜特有 ê 勉強自然無可能按伊遐生湠到我遮 hōo 我決定放伊自由 mā 放家己自由，伊 tsiah 理解家己 m̄ 知影啥物號做同理心交愛一个人，畢竟踮𪜶兜面子交展風神勝過解決問題，像睏破草蓆三領，猶是掠你心肝 buē 著，無要意，只要別人見著 gún 猶原雙雙對對就好。
翁某做陣食下昏飯那聽伊分張伊按別人 ê 便包生湠 ê 感想，我第一个想法是六月蚶，開喙臭 kā 臭 hōo 死，總是一想著𪜶爸母到今猶是認為𪜶 tuì 𪜶小妹是人無傷虎心是𪜶小妹虎有傷人意 ê 招伊龍交龍，鳳交鳯，隱痀--ê 交侗戇同齊 tuì 𪜶小妹喙較毒青竹絲，我隨交懍恂 mā 隨交𪜶徛甲烏空 ê 距離。
幾米 ê 藍色囡仔敧頭交我對看，換一个角度看世界：
我的真情並不儉
全部交關
你開的愛情𥴊仔店
店內有你美麗的形影
甜甜的笑聲
及你用純情做的大餅.....
〈愛情𥴊仔店〉von 王金選《愛情𥴊仔店》
「因為愛，我 ê 𥴊仔店願意 uī 你添百樣，m̄ 是 kan-ta 點一葩番仔火油燈 tuì 你講，順我 ê 燈火行」我文文仔笑應。
你若是美麗 ê 島嶼
我就是圍 tī 你四周圍
永永世世
為你殷勤固守 ê 海岸
Tī 東爿
我是勇壯可靠 ê 岩岸
Hōo 你一切 ê 躊躇 kap 驚惶
安心靠 tiàm 我 ê 肩胛
Tī 西爿
我是溫柔體 ê 沙岸
寬寬仔 kā 你惜
安慰你所有受傷 ê 痕跡
我若是孤單 ê 島嶼
你就是圍 tī 我四周圍
永永遠遠
Kap 我戀愛袂煞 ê 海洋
Tī 東爿
你是我胸開闊 ê 太平洋
接納我 ê 每一條溪流
Mā 接納溪流內底全部 ê 泥沙
Tī 西爿
你是深情 ê 海峽
柔和 koh 保守
Hōo 我時常醉 tiàm 你 ê 愛裡
愛，hōo 咱做夥
親像天親像地
Hiah-nih 久 hiah-nih 長
〈夫妻〉von 李勤岸《愛情𥴊仔店》
徛時間 ê 懸山看行正手行倒手 ê 坑崁溪流，我感謝家己知捌掠虎就擒耳 hōo gún 修來 ê 緣份 ē-tàng 繼續無戴小鬼仔殼真實透流。
➀ Lunde, Puffin 海鸚哥，德國慣勢 kā 伊簡稱做 Papagei。
2022.05.23
