人講仝師傅，無仝工，我 tuì 鯡魚 ê 歹印象按 gún 翁遐來，我強烈拒絕瑞典薄餅麭是按勥母遐來，insgesamt 總合來講順 1918 出世 ê Herr Stoll 阿爸➀分張 ê Das ist neues Gemüse 這是新菜蔬 ê 我若哭呻白銀魚、白草花、紫頭菜、瑞典薄餅麭歹味齊是按 gún 翁交𪜶𠢕扞鼎𠢕享受生活 ê 爸母遐來。
Gún 翁 buē 綿纏觸纏哭呻菜擴、芹菜、敏豆、白花仔菜一大トラック(LKW, Truck)䆀味 buaih 食 mā 是仝款，無仝師傅 ê 結果。
「後生娶某是人兜--ê」這是勥母交勥爸 tī 往過嫌新婦頇顢扞家專工落南來出菜，搪著後生一屑仔攏無帶念伊 ê 辛苦 mā 無要意伊 ê 恐喝就開始唸歌 --- Gún 後生是鹹甜汫無嫌呔 ē 某一娶，翁親某親，老婆仔拋車輪 ê kā 我戲棚頂做甲流汗，戲棚跤嫌甲流瀾，我呔 ē tsiah 業相。翁兜勥爸母 ê 勥代閣喋詳落去連阿菇攏喝救命。
德國人按勇甲若戰車沓沓仔行向荏身到荏身命 ê 時間大約按 1960 開始，往過鞏金 ê 牛豬雞羊肉成做俗物 bué 食破家，往過 hőng 頓印仔 ê 魚成做愛擲捒 ê 舊漚舊臭，除了顧筋骨 ê 魚油掠外，m̄ 免飼料成本 ê 魚是散凶人上好 ê 卵白質來源。
往過是阿舍 ê 魚油，目今成做政府央三託四人民 buaih 食魚 mā 愛加寡食魚顧筋骨 ê 宣傳。德國人因為食食問題致著關節炎 ê 比例，就若臺灣 5 个人就有一个有糖尿病仝款。
我愛食魚，德國 ê 魚因為環境污染加上無限制 ê 牽罟掠魚 hōo 魚按 tsuē 甲若河溪沓沓仔行向沙漠，愈來愈少 mā 愈來愈貴重 ê bueh 倒膽食魚臊 ê 貴參參。
像向時是散食人 teh 食 ê 鯡魚(Hering)目今一公斤 ê 價數 7.51€，這个價數閣 m̄ 是德國當地出產 ê 價數，另外這个價數閣 m̄ 是鮮沢一尾魚，這个價數是鹹篤篤 ê 鹹膎(kuê)。
我愛食魚 tuì 魚 mā 無啥喙白，總是自 gún 翁交我分張𪜶德國人按怎食魚和肉佮，我就隨決定 buaih 繼續交伊來往，一直到 2024 人 tī Stralsund 搪著 Bismarckhering 我 tuì 鯡魚和肉佮 tsiah 湠火
我 m̄ 知影將時 ê 德國發生啥物代誌，總是 kā 德國拆做 BRD 前西德交 DDR 前東德，我個人認為好食 ê 德國味素齊 tī 東爿。
Tī Mecklenburg-Vorpommern 食著 ê 魚肉糋和肉佮 hōo 我想著臺灣菜市仔 ê 糋路擔，彼胡椒芳彼掜粉 ê 酥.....夭壽骨下昏飯猶有一塊 buē-tàng 閣按呢寫落去。
因為德東鯡魚 ê 好味素 hōo 我按算 kā 伊按火星接轉來地球，總是跟綴 gún 翁 tī Hamburg 漢堡, Cuxhaven 庫克斯港, Flensburg 等等遮 ê 倚海城市食過 ê 魚臊滋味，我又閣 kā 伊送轉去火星，畢竟 7.51€ ē-tàng bué 1 公斤牛挽肉，3 公斤豬挽肉，斤半 ê 牛豬挽肉，1 公斤左右 ê 雞襟胸，2 公斤 ê 雞摸交鼓箸雞腿，遮 ê 肉 ē-tàng 食兩禮拜，一公斤 ê 鯡魚款基本型 Nordische Art 北爿手路 kan-ta ē-tàng 食 3 ~ 4 擺無較加兼我驚目睭一瞌隨 hōo 七爺八爺𤆬去割舌就愈窮斤算兩到我搪著 Die Ernährungs-Docs 營養師我總算揣著敨放七爺八爺來揣我 ê 驚惶，紲落來生湠閣較 tsuē ê 鯡魚料理 mā 理解 hōo 掠做䆀味 hōo 我慼 ê 瑞典薄餅麭窮實是好味好素。
「請教先生，呔討好食物到恁兜齊成做䆀味素？」2024 上北瑞典，發見架頂五彩十色閣百樣 ê 麭唯獨 Je weniger Zutaten, desto besser 成份愈少愈好 ê Knäckbrot buē hōo gún 食破家，uī-tio̍h buaih 跟綴厝邊 ê 影跡一逝遠甲叫 m̄ 敢 ê 車路到挪威，煞因為路費無節成做去時紅膏赤蠘，轉來鼻流瀾滴，tuì 薄餅麭無好印象 ê 我喙齒根咬 leh mā 愛食。這个姑不而將 ê 敨脫成做喙舌 ê 一蕊花莓，紲落來生湠閣較 tsuē 花莓。目今我上意愛 ê 味素是麻仔。
因為這个新發現 hōo 貧惰家己做烏麥酸酵母麭 ê 我 kā Die Ernährungs-Docs 看來 ê 建議紫頭菜鯡魚敆烏麥仔麭上佮喙徙來到瑞典薄餅麭，自彼日開始鯡魚交瑞典薄餅麭成做我個人喙斗 ê 司公仔象桮分 buē 開。
「因為𪜶 kan-ta 捌臭頭包布，防蠅(風神) m̄ 捌學習看物敆味」翁應。
聽翁按呢譬相家己 ê 金含，雞仔腸鳥仔肚 ê 我步頻恢復本性想 bueh 跟綴伊六月蚶，開喙臭，雷公爍爁來相揣問講「彼鹹膎魚呔討號做 Bismarckhering？」含一喙瀾微微仔看向交伊仝族 ê gún 翁。翁某雖罔不三時冤家量債，不而過猶未行到睏破草蓆三領猶是掠你心肝 buē 著，伊 mā 文文仔笑應「Google。」
「Google 是德國人抑是你？」我刁意故問。
「Google」伊笑應斡頭去客廳等我請你來食飯頓。
鐵血宰相鯡魚 ê 講法交斯斯相𫝛有兩款：
- Stralsund ê 生理人是 Bismarck ê 迷眾，伊寫批向 Bismarck 請教，𪜶兜 ê 鹹膎鯡魚敢會使得 kā 伊號做 Bismarckhering 俾斯麥鯡魚。愛國親民 ê Bismarck 回應，當然 mā 是好，就此若台灣豉白帶魚 ê 鹹膎鯡魚就按行鹹魚翻身做框金閣包銀 ê 好味素。
- 普丹麥爭，Bismarck 行踏 Flensburg 餐廳 tuì 店東褒嗦𪜶兜 ê 鹹膎白銀魚好味素，就此這魚就號做 Bismarckhering 俾斯麥鯡魚。
資料來源 --- Bismarckhering, Planet Wissen
以上 ê 傳說第一條根據文獻整理，確實有相關 ê 文件保存，不而過因為二戰 ê 火厄破壞 hōo 伊無法度完整恢復原樣做正式 ê 推斷。第二條根據是較倚民間傳說 ê 隨人一版本。
鯡魚 ê 身價，根據彼當時年過七十 ê 德文老師分張，鯡魚 tī 向時是散赤人 ê 食物，起因生活條件較好 ê 人 buē 食生活 tī 污染區 ê 物。這个講法我捌請教翁 ê 朋友，無一个人知影這件代誌，𪜶 tuì 魚 ê 印象大部份是䆀味閣一尾魚會使得食三頓肉 ê 貴參參。
我身軀邊 ê 人認為魚䆀味主要 ê 因端是𪜶敢若 kan-na 知捌白煠這手路，紲落來敆 Bá-tah 抑是白醬，三文魚敆白醬抑是煮北歐魚湯確實好味素，鯡魚敆白醬抑是白煠彼味素正港足恐怖。
我愛食魚，不而過自食過北海這邊 ê 鹹膎鯡魚我 mā 歇十外冬無食，2024 結束瑞典 - 挪威露營車日子，按瑞典南部坐渡輪轉來德國上大島 Rügen，翁仔姐決定按 Rügen 坐船去若馬祖看福州 ê 距離去 Stralsund 行跤花。Tī 倚 bueh 出城門 ê 街巷見著這看板，uī-tio̍h hōo 15G ê 相片空間有地虛華展風神隨停跤交翁坦白我 ê 目的並參詳「若是食 buē 敆喙伊愛 kā 我鬥相共。」
四常無好參詳 ê 伊一聽著我 bueh kā 這相片囥踮部落格隨應殘殘應好，我 mā 隨斡頭入店點一份。行出店門從來 m̄ 捌鳥鼠仔喙 ê 我，輕輕仔咬一塊魚肉，gî...這魚 buē 死鹹閣 ē 回甘， 隨按鳥鼠仔喙轉做獅仔口大喙咬落去，正港好味好素，連四常 buē 食 ê 麭 mā 食甲無半塊 hōo 伊做窮碗頭箸尾 ê 翁，半句話無問隨斡入店 mā 點一份來食。這个經驗 hōo gún 一路按東向西沓沓仔露營車日子轉來，只要搪著有人賣鹹膎攏點一份來食，食著 ê 鹹膎 mā 無 hōo gún 失望過。我想這交德東猶原保持傳統，傳統經驗透濫家己 ê 喙 hōo 愈來愈僫掠 ê 魚臊維持伊上天然 ê 氣味。
順紲哭呻豉瓜仔哖，我交德國 ê 豉瓜仔哖 mā 是水火不容，傳統市場搪著 ê 鯡魚糋，𪜶兜 ê 豉瓜仔哖 mā 是好食甲 hōo 我想著囡仔時去阿媽兜攏愛 kā 伊款來做飯頓 ê 菜脯做啖糝食 ê 記持。
工業化 hōo 人類 ê 生活免閣做牛做驢拖，不而過 mā hōo 咱失去好好享受食物帶 hōo 咱 ê 五彩十色。這久翻頭想彼久，總算理解啥物號做好柴流 buē 過關口 ê 幸運。另外食物宛然姻緣，搪著䆀姻緣，好食物 mā 永世成做歹食物。所致，愛知捌離開䆀是行向美麗 ê 開始。
➀ Herr Stoll 是往過 ê 厝邊，伊 ê 年歲猶比 gún 芋仔爸少年，所致我攏稱呼伊阿爸。
