「貓有九條命，我有好生活」德國受爭議 ê 導演 Leni Riefenstahl tī 回憶錄按呢紹介家己。
這久 ê 我 mā teh 愖有一日愛紹介家己 ê 往過，我 ē 按怎按怎紹介家己？
一愖這件代誌心神就若一隻狗遮挖一空、遐挖一窟，結果敢若 teh 做議量，不過有一件代誌已經確定落來就是我 mā bueh 按呢寫，貓有九條命，我有好生活。這个好生活無表示咱世俗認定 ê 食好穿好，這个好生活是你這世人面對快樂災厄 ê 態度。
新正期間朋友冇談網路世代帶 hōo 伊 ê 壓力。
「我無想 bueh kā 我 ê Line 佮面冊口座 hōo 人，總是搪著別人開喙，我猶是 hōo 𪜶」朋友講。
「權利在你 m̄ 是𪜶」我講。
「我無你遮爾仔飄撇 ê 自在」朋友講。
「我無飄撇，m̄-koh 我尊重我 ê 權利」我應。
凡勢有歲頭 buē 閣綿精綴朋友擘腹 teh 踅金龜磨，起因伊 ê 土地公 m̄ 是我 ê 所以我 buē 驚飼無雞。除非伊納我顧問費，我就 ē 特別關心伊這仙土地公佮伊要意 ê 雞。
顧問費我 m̄ 是 teh 講耍笑，Nicht Erklärungen helfen uns weiter, sondern unser Wille voranschreiten(解釋 buē 協助咱向前行，是咱向前行 ê 意志)，咱每一个人搪著問題攏需要家己挽瓜揫藤 m̄ 是湠欉 hōo 別人或是一直問是按怎我 ê 瓜仔棚 buē 發穎。
Tshan-tshiūnn gún 翁問「我 ê 部落格連結囥踮愛料理敢有應效？」
「部落格是你--ê m̄ 是我--ê」我應。
部落格本底就是伊 ê，伊向望有人來行踏我就 kā 伊鬥相共 kā 伊 ê 網鍊囥踮愛料理，紲落來 ê 鋩鋩角角是伊家己需要斟酌，我 m̄ 是伊 ê 中人 --- 簡單講就是家己想 bueh 挃 ê 物，家己處理。
Ich mache gerne Filme, und spiele gerne in ihnen, und vermutlich werde ich stets ein Stück Film sein.
我佮意拍電影 mā 享受這个事項，佮凡勢我 ē 成做伊永遠 ê 一部份
Charlie Chaplin
我清楚知影我 m̄ 是一出世就有這款性地，tshan-tshiūnn Ludwig van Beethoven tuì Napoléon Bonaparte 寫 ê 3. Sinofnie 第三號交響曲 mā 是愛等到濁水變清，鱷魚浮出來 tsiah 知影伊心目中 ê Held(英雄) m̄ 是伊所想 ê 生張。
近來整理食譜 mā 整理舊文章(臺文部份)，這篇記錄 tī 2020 新正跤兜 ê 文章本底想 bueh kā 刣掉，起因故事內容 tuì 我來講白汫無味甲 buē 閣翻頭讀抑是翻草。
總是你認定 buē 閣翻草 ê 事項伊窮實就敢若咱四常 ê 食食，你掠做伊 buē 閣食一斗，總是伊又閣按無仝 ê 形體出現在眼前，起因遐是你固定 ê 脾土，除非你正經換喙斗，抑無彼 ê 喙尾永遠鏨 tī 心肝穎行過跤跡就 tī 遐。
愛料理 ê 問題寫過幾仔斗無興閣喋詳，這斗因為 gún 翁雄雄又閣無事揣事講「我 ê 網鍊敢猶閣 tī 遐 hōo 我想著這篇猶留底 ê 舊文 ē-tàng kā 伊小可仔仕上げ(shiage)順紲展猶 teh 讀 m̄-koh 誠有感觸 ê《一个走揣蝴蝶路草的女女子》(A Woman Seeking the Path of the Butterfly)。
... 有時仔我袂照字面「直譯」，我是用「意譯」代替來符合「低的背景」民族的習性。講到翻譯，這幾年的經驗，予我深深感覺，假使欲作字參字、詞參詞、句參句的「對我」翻譯是根本無可能的代誌，因為英漢兩種語法、習慣、文化背景、民族傳統，有誠大的差別，若想欲做好勢，翻譯毋是一項輕鬆的工課。 出版的頭序，為何我欲用台文佮英文書寫。
頂年無議量就變工藝 --- kā Hape ê Ich bin dann mal weg 寫做臺文，因為有變這項工藝 tsiah 知影家己無彼个耐性。
是，我 buē 講家己無彼个尻川，我 ē 講無彼个耐性，另外專工就交給專家，我莫乞食攑蠓捽仔 ---buē 博假博。
我 m̄ 知影別人按怎閱讀生份 ê 文字，總是我 ê 慣勢是這个文字是這个語言我就按這个語法去閱讀 buê 閣轉做家己熟似 ê 語法，除非彼个字正經 m̄ 捌，需要請教字典。
按呢寫真展風神，總是我清楚知影「無」彼只是一个自然 ê 反應，tshan-tshiūnn 我 bueh 講德語 buē 閣先轉英語 tsiah 踅轉來英語，準做德語 mā 是注重「動詞」ê 語法，總是伊佮英語猶原無相仝。
Tshan-tshiūnn Vermutlich werde ich stets...sein(凡勢我 ē 成做.....) tī 英語 ē 按呢講 I will probably always be，我 bueh 展示啥物 B 動詞啥物 A 名詞，我 kan-ta bueh 表示，tī 我 ê 海馬鉼針德語就是按呢表達，英語就是按呢表達，台語就是按呢表達。
德語佮英語攏 m̄ 是我 ê 母語，華語 mā m̄ 是 gún 爸母 ê 母語，總是我 ê 華語書寫猶是好過臺語，我真清楚這个問題。
不過這个好過臺語是年久月深 ê 訓練，總是這个訓練猶是捷捷搪著㧎㧎 ê 語法，這 m̄ 是這久 tsiah 發現 ê 問題是學生時代需要交作文就發見 ê 代誌。
所擺我若真早就兩角找五分 --- 角五(覺悟)無追求正確答案 m̄-koh 愛通盤理解，tshan-tshiūnn 本底無合目想 bueh 專工閣 kā 做一斗攝一張相 ê 金瓜蘑菇雞肉 tī 我理解 Das ist zum reinsetzen(脾土滿足)佮 Das Auge isst mit(目睭綴 leh 食) ê 差異性，我就接受心無滿足萬事攏是䆀，心若滿足萬事攏是 Auch nur mit Wasser kochen(無啥無相𫝛)。
最後 gún 翁敢有檢查伊 ê 部落格？當然 mā 是有，不而過伊 ê 田地已經拋荒，起因伊需要噗仔聲，雖罔伊無承認。
「遐攏四角字讀無是 bueh 按怎寫」伊講。
「人若 bueh khiau-khi 準做使用指南寫德文 mā 照 khiau-khi」我應。
2019 按面冊徙岫到 Pixnet 痞客邦，我得著 ê m̄ 是食蒜仔吐蕗蕎是食蕗蕎得黃金，特別 tī 𠢕生猴交齷齪龍鳳生活踅金龜磨這兩項代，𪜶𤆬 hōo 我 ê 生毛帶角龜叨鱉趖透過白紙烏字透過一張閣一張 ê 攝相 hōo 我看著家己 ê 變化。
像，gún 翁愛分張𪜶兜勥爸勥母飼 hōo 伊 ê 毒，自 kā 心狂火著轉做文字，遐 ê 看起來是幫贊窮實是毒 ê 番仔火油燈成做一粒田螺煮九碗公湯 hōo 伊家己去選擇，伊 bueh 繼續愛爸母愛因迵入骨抑是 bueh 愛牽手愛甲老老老 ê Es ist mir egal，一屑仔攏無要意。目前 ê 伊是愛牽手。
像，按面冊生湠 ê 慣勢，一日無鋪文人就若去塗州賣鴨卵，一日無 ka̋ng 揤讚別日子交人盤撋是鴨仔聽雷 m̄ 知愛接佗一齣戲 ê 驚惶，tī Pixnet 齊得著敨放。
唯一猶未敨放 ê 問題是相片，不過這个問題 mā 寬寬仔成做瑞典 Surströmming 鹽豉白銀魚，臭久 ē 到分，臭久 mā 意愛。
這是一篇 tuì 相片 khiau-khi 紲落來豬母牽去牛墟 ê 食食心行尞 ê 喃來喃去。原食譜 ê 金瓜是入籠床炊，gún 翁仔姐食甲喙白無佮意就橫扴食譜 ê 手路 kā 伊用烘--ê，美味しい。
2023.11.21
