從來都冇諗過，我會咁在意「會員」呢兩個字。
「會員」呢兩個字，近年係咪已經氾濫到令你覺得麻木，甚至有啲貶值？但係，喺商家嘅立場，佢哋絕對需要更多嘅會員，將佢哋變成忠實擁趸。
無論你做邊行，實體商舖、線上服務、任何一個App、任何一個網站，第一件事，都係溫柔而堅定咁邀請你：「成為我哋嘅會員啦！」包括我，今次喺「方格子」呢個平台打開我嘅創作天地，都由衷希望大家成為我嘅會員。
有人建議，做部落格如果唔想被「會員制」捆綁，係咪應該喺 WordPress 或者 Wix 建立自己嘅獨立網站？但喺呢個網絡汪洋之中，如果你唔識得SEO（搜尋引擎優化），你嘅網站就好似一個懸浮喺虛無宇宙嘅孤獨星球，根本冇人會睇到。
所以，商家嘅會員制度，究竟係順應潮流，定係大勢所趨？我認為答案係後者。喺今日嘅商業世界，一個冇會員制度嘅模式，就好似一艘冇錨嘅船，注定漂流，難以生存。
從過膠卡到手機App：一場會員制的進化史
點解會咁？因為成為會員嘅儀式，實在變得太簡單、太方便。一個掣、一個電郵、一個密碼，你就「被成為」一份子。下次光臨，又再消費，又再儲分；再下次消費，你就可以享受折扣，或者可以睇到獨家內容。呢個消費市場，究竟係變得更有系統，定係更複雜？
當我哋手機上嘅App越嚟越多，我發現一個現象：零食舖、大品牌、百貨公司、讀書平台、遊戲平台、服裝店、餐廳、運動舖……彷彿天父所創造嘅任何一個行業，全部都需要你做會員。
呢個「會員」身份，係咪代表我哋對商家嘅一種真正認同？定係喺今日嘅世界，佢只係一個方便商家用大數據、用演算法嚟捆綁你，向你不斷銷售宣傳嘅冰冷系統？
我哋回憶一下。最初嘅會員，需要你喺一張白紙黑字嘅表格上，填寫個人資料。今日，呢張表格變成咗Google Form。填完之後，職員會將你嘅資料，濃縮到一張八達通size嘅卡仔上面。卡上面有你嘅姓名、性別，甚至年齡同級別，再加一個獨一無二嘅會員號碼。
然後，係一個充滿時代感嘅儀式——「過膠」。我相信好多千禧後嘅朋友，未必知道乜嘢叫「過膠」。一張薄薄嘅膠片，經過一部發熱嘅機器，就將嗰張紙卡封印成永恆。呢個儀式，宣告咗你身份嘅確立。
後來，過膠機同膠片，同我哋嘅青春一齊，默默退場。取而代之嘅，係好似信用卡咁嘅硬膠卡片。印刷嘅字體取代咗手寫嘅溫度，我哋嘅銀包，開始被一張又一張嘅會員卡塞滿。順帶一提，我個舊銀包入面，仲靜靜咁瞓住一張零食店同大型快餐店嘅硬體會員證，佢哋似乎仲未被時代完全淘汰。銀包上面嗰啲一格格嘅位置，就係為咗安放呢啲代表住唔同身份嘅卡片而設計，當然，最重要嘅身份象徵，始終係信用卡。
再到今日，會員制連實體卡都變得累贅。我哋嘅手機，就係我哋嘅會員殿堂。下載一個App，簡單填上資料，你就成為會員。從此，你嘅手機又多一個App。但有冇為意？呢個App除咗喺你付款時，畀職員掃描一下儲分之外，你基本上好少會主動打開佢。
「儲分人生」：我哋究竟為咗乜嘢而儲？
於是，我哋進入咗一個「儲分人生」。我記得林子祥喺《數字人生》唱出人生被數字包圍嘅無奈。如果畀我創作，我會寫一首《儲分人生》，消費的意義只是為了不斷儲分。
A舖頭儲咗啲分，B食肆又儲咗啲分，C百貨又儲咗啲分。佢哋各自為政，互不相通。只要你一日係消費者，你就不停咁儲分。
但重點係，儲咗咁耐，究竟有幾多分？第二個問題，點樣用？好多時，我哋根本搵唔到呢啲分數可以點樣用，可以換到啲乜嘢。如果你係一位心思細密嘅「積分達人」，認真研究過點樣喚醒呢啲沉睡嘅積分，將佢哋化為神奇嘅獎品，懇請你留言指點迷津，拯救一下我戶口裏面嗰啲迷途嘅積分。
當然，市場亦都喺度進化。一啲大集團，開始統一旗下所有品牌嘅積分，例如 yuu、易賞錢、the point商場積分等等。呢個係積分世界嘅「大一統」時代。
我唔知道再下一個世代，會員制度會變成點。但總括嚟講，我哋基本上「走唔甩」，因為我哋每日都要消費。
返返嚟，我嘅「一號會員」，在方格子上面只會創作的我，根本沒留意有其追蹤及會員制度，直至這位「一號會員」的出現。
返到嚟我嘅「方格子」會員制度。
你也可以像我的「一號」一樣成為會員，唔係一種消費關係，而係一種靈魂嘅共振。
喺我呢度，儀式好簡單：
- 唔需要你付出金錢。
- 唔需要你繁複嘅登記。
- 唔需要話我知你叫咩名。
- 唔需要同你「過膠」，亦都冇實體卡。
- 更加唔需要你為我下載多一個App。
「方格子」本身就係一個好App，讓你去感受好多作者嘅好文章。
如果你覺得我嘅文章能夠感動你，令你有所共鳴；或者你知道呢啲積分有咩奇特用途；甚至乎你知道世界上有啲咩古靈精怪嘅儲分系統，都歡迎你留言或電郵畀我。
嚟到呢度，如果你仲睇緊，證明你係一位真正支持我嘅讀者。我誠邀你，進行兩個簡單而神聖嘅儀式：
- 喺文章旁邊，撳下你嘅**「心心」**，代表你對我嘅支持。
- 喺《奇蹟故事館》主頁，撳下**「追蹤」**，讓我更加知道，你係我嘅朋友。
當我有新作品嘅時候，我會第一時間通知你。
你嘅每一次追蹤，都係為我嘅創作世界，帶嚟幾何級數嘅能量。
來吧，成為我嘅2號、4號、8號、16號、32號、64號、128號、512號、1024號會員吧！
最後，我想喺度，向成為我**「一號會員」**嘅你，致以最深、最誠懇嘅感激。
因為你，讓我寫多咗一篇文章。
因為你，讓我再一次有靈感，為大家送上新嘅作品。
謝謝你。
