加拿大 日前公佈，由24人組成嘅遴選委員會，從16部報名作品中選出伊朗裔導演 Alireza Khatami 嘅 「The Things You Kill (土耳其語: Öldürdüğün Şeyler)」 出戰第98屆(2026)奧斯卡最佳國際電影，作品喺今年Sundance電影節獲劇情片(世界)單元最佳導演。
Ali 從土耳其到美國留學多年，成為一名大學翻譯教授，但同太太生兒育女嘅計劃就進展得唔太順利。一日，惡耗傳來，母親嘅離奇身亡迫使Ali從回故地，悲慟之餘發覺事有蹺蹊，更要小心面對同父親Himat之間嘅磨擦。呢個時候神秘男子Reza應徵成為家中園丁，更協助Ali實行復仇計劃；當昔日嘅家庭秘密重新浮上水面，Ali必須再次面對往事俾佢嘅沉重壓力，凝視自己靈魂嘅深淵，而現實同想像嘅界線，亦因各種撲朔迷離嘅徵兆而顯得模糊……
Alireza Khatami 1980年生於伊朗，係東南部部落聯盟「Khamseh」嘅後人，現時持有加拿大國藉。2000年入行，為多位導演擔任副手，包括名導Asghar Farhadi。其後到馬來西亞進修視覺特效，再到美國薩凡納藝術設計學院(SCAD)修讀電影製作碩士。2013年聯同「逆光飛翔」張榮吉合導短片集「台北工廠I」嘅「老張的新地址」；2017年首部長片「遺忘詩篇 Oblivion Verses」獲威尼斯影展「地平線」單元最佳劇本；2023年同Ali Asgari合導嘅「伊朗荒唐九宮格 / 我還有話說 Terrestrial Verses」就入選康城影展「一種注目」單元。
「殺有介事」嘅創作概念源自於導演對「父權」嘅反省--各種形式嘅家庭暴力同傷害會一直遺傳，而且縱然嘗試改頭換面，遠走他方學習現代道理，但父權意識其實依然根深柢固，因此唔止限於女性，男性同樣遭到父權嘅創傷--一種揮之不去嘅男性焦慮，只能夠全部人一齊逐少嘗試改變。而故事亦可謂「我家的事」，導演表示有70%左右嘅情節嚟自佢同家人相處嘅經驗，拍戲某程度上讓佢有面對過去嘅自我治療，不過佢都唔係好敢攞番套戲同屋企人分享。
Alireza 用咗8年時間籌備「殺有介事」，原先打算直接去伊朗開拍，但當局要求佢刪除重要情節 (正好成為「伊朗荒唐九宮格」嘅其中一段)，只好先擱置計劃；尚幸佢出身嘅Khamseh部落聯盟普遍使用土耳其語，文化相近，於是佢選擇將故事搬到土耳其安托利亞山區拍攝，一反傳統運用廣闊空間表達主角面對真我嘅孤立無助，又透過繁複出現土耳其國父凱末爾(Kemal Atatürk，「Atatürk」乃賜姓，解「土耳其人之父」)嘅肖像，將個人同普遍層面(社會以至宗教)嘅父權連結。
雖然未看「殺有介事」，但睇番唔少評價都對Alireza 嘅敘事技法讚不絕口，特別係對比前半段嘅紮實敘事，後半段出現嘅超現實反轉扣人心弦，亦係導演嘅拿手好戲。導演表示呢個鋪排都係佢刻意借用觀眾對中東導演嘅刻板印象，營造「咪又係中東社會片」嘅錯覺，再扭轉至真正風格--佢期望可以拍出有如David Lynch嘅迷離效果。要做到呢點，導演需要獲得波蘭藉攝影師Bartosz Swiniarski以及幾位土耳其資深演員嘅信任，好在慢慢磨合後，出嚟嘅效果就好好。
「殺有介事」係由加拿大電影公司Mongrel Media 牽頭嘅多國製作，因此有資格代表加拿大參賽；本片將會係加拿大第50部參賽嘅作品，佢地曾喺2003年(76屆)憑「老豆堅過美利堅 / 老爸的單程車票 The Barbarian Invasions (Denys Arcand 導演)」獲獎，另外曾入圍11次，當中2010-2012(83-85屆)更分別憑「母親的告白 / 烈火焚身 Incendies (Denis Villeneuve 導演)」、「我的插班老師 / 再見了，拉札老師 Monsieur Lazhar(Philippe Falardeau 導演)」同「戰巫不勝/愛在戰火迷亂時 War Witch(Kim Nguyen 導演)」連續三屆入圍最後5強。
值得留意嘅係，作為移民國家，雖然加拿大有悠久嘅法語電影傳統，但近年似乎都傾向作出更多元嘅選擇，例如2022(96屆)同2023年(97屆)嘅「長春事件 Eternal Spring」同「Rojek」就分別係關於法輪功同庫爾德人嘅紀錄片；至於入選Shortlist嘅上屆代表「加拿大有個小波斯 / 大同世界 Universal Language」雖然係本地製作，但導演Matthew Rankin卻將自己喜愛嘅波斯文化融入其中，令加拿大變成一個寫波斯文，飲伊朗茶嘅地方，幽默咁表達佢對家鄉溫尼伯(Winnipeg)嘅眷戀。
最後帶一筆講講 Alireza 一同合導「伊朗荒唐九宮格」嘅拍檔Ali Asgari。呢位硬派寫實嘅導演喺康城首映回國之後，隨即被沒收護照同禁止出境8個月，而喺軟禁期間佢就按家庭回憶拍成紀錄片「酸雲蓋天德黑蘭 Higher Than Acidic Clouds」(入選今年香港夏日國際電影節)，Alireza 都係監製之一。而佢嘅新作「Divine Comedy」即將喺威尼斯影展「地平線」單元登場，講述一位伊朗地下導演諗辦法避開審查，放映自己作品嘅黑色喜劇。
之前喺IFF果陣因為場次問題錯過咗「殺有介事」，睇咗嘅朋友不妨分享下。又，唔知我仲有冇機會喺台灣補番呢？
