昨昏翁上網路納病院寄來 ê 飯錢，一日 10 歐圓伊蹛院五工總共 50 歐圓，這筆錢差不多是 gún 兩个人倚 bueh 兩禮拜 ê 菜錢。
伊那納錢那哭呻病院 ê 菜色䆀、份量少閣敢獅仔開大喙。本底已經廕掉 ê 腹肚火又閣 hōo 挓著就交伊捙拚 tsiâ 較𠢕六月蚶，開臭喙。
「Buē 啊，呔會貴菜色齊是你心愛--ê 上愛出 ê 菜」我講。伊出院進前 hōo 我 tī Telegram 詈甲伊叫天叫爸叫阿爸齊無應效，這久愈 m̄ 敢紲話。我因為腹內火猶原若野火揣無方法通廕就繼續剾洗伊食飯配菜脯，儉錢予爸母閣爸親母親，牽手拋捙輪。
伊清楚知影這斗 ê 數膽 m̄-nā kā 家己舞甲頭較大身，連龍鳳生活 mā 舞甲若隱痀拋捙輪，食力閣歹看。
𠞭膽進前伊講「你敢會使得出寡 buē hōo 我走腹 ê 飯頓？」，膽 hőng 𠞭掉伊交代「千萬 m̄ 通 kā gún 爸母講我蹛院𠞭膽，𪜶 ē 煩惱」，我頓胸坎仔保證「Buē」，押尾我接北爿敲來 ê 電話講我歹心，刁意故毒𪜶後生閣 m̄ 講伊蹛院。
「你總算 kā 貓仔按袋仔挈出來（die Katze aus dem Sack lassen），我 mā 證實我無喙唸經，手摸奶，跤踏查某間，弄狗相咬」，腹內彼葩火猶原是柴樠點火較光油僫廕火。
「我猴穿衫變人...」uī-tio̍h hōo 牽手廕火，伊自備日本剾刀倒剾家己。
教育部臺灣台語常用詞辭典有一个例句按呢講「老歲仔人若身體勇健、心情樂暢，手頭閣有寡，就較有才調踏入到食清、睏宮、人精英的坎站。」，我猶未行到半老老，身體算健康、心情樂暢只要 gún 翁莫遐爾仔綿死綿爛愛哭愛綴路，跟綴𪜶爸母 tuì 我激派頭、起交繃，我手頭 mā 有寡，無論台灣抑德國無一項 kā 伊伸手，除了菜錢，我 ê 世界照實講是食清、睏宮、人精英，呔討這久成做這款面肉，規日交𪜶激氣講話欺負人？
我恬靜 tuì 伊金金相，步頻見著 Hannah Arendt ê 面 ....「平凡 ê 惡質」，Hannah Arendt ê 這篇報導有 tsuē-tsuē 無仝面 ê 討論，其中兩个討論上捷 hōo 我提來 tuì gún 翁講「Buaih 就請你離開恁爸母成做一个獨立 ê 人，莫妝娗家己 ê 惡質。」
- 邪惡不平庸：令人喪膽的「魔鬼的自白」，道出漢娜鄂蘭的世紀錯誤
- 見證極權之惡，成為基進的善：《漢娜·鄂蘭 Hannah Arendt》
人兜 ê 惡質我無興造孽，總是我清楚知影我無可能按 A 轉做 B kan-ta uī-tio̍h 我 ê 身份轉變，像 “ Unsere Mütter, unsere Väter ”Viktor ê 老爸認為順人意就有好日子。
「咱兩人明明互相意愛，呔討總愛豬八戒拜天公，家己刣家己，我無理解這个問題，總是我清楚知影我是豬八戒我 buē 拜天公，所致你意愛 ê 交繃，認為 ê 大端，我齊無興趣相趁相喊，攑香綴拜，起因遐 ê 表面是掛目鏡假紳士，buē 藏得。」，話聲一落塗陳思宏《鬼地方》ê 主角 mā 出現，虛華閣𠢕目空赤 ê 姊妹仔鬥爭，行 buē 出家己問題 ê T，隨笑出來，家甲做來遮呔討人生變甲遮爾仔 Drama，故事內容經過十一冬已經 hōo 我 buē 記持了了 ê Strangers in the House（我們一家陌生人，聯經）ê 標題 mā 宛然藏水艦浮出水面，「Strangers in the House ê 故事交恁兜完全無相干，不而過恁兜 ê 感情宛然這句話 gún 兜一家伙仔是生份人，咱是半路做龍鳳愛我泅入恁兜 ê 氣氛，你 kā 我這隻 hōo 你認為 ê 三斑徙走較緊。」
這是 2021.07.06 ê 心行尞這久翻頭轉去看，放手是唯一 ê 祝福確實無 m̄ 著。伊食慣勢 ê 毒一時之間無法度解毒，不而過我會使得。自放𪜶爸母自由飛，我 ê 人生是彩色，至少 tī 2024.05.21 翁仔姐做陣去戲園看 Garfield，影戲結束伐向停車場我 tuì 伊講「我若拍 m̄ 見，你 buē tshan-tshiūnn Jon 按呢艱苦」，伊回答「你無 tī 我 ê 目睭仁，我隨成做 Jon。」，這是空喙哺舌抑是真心真意我 m̄ 知影，總是自我放𪜶家庭飛 mā 放家己自由，我 ê 人生又閣恢復食清、睏宮、人精英，德國 mā buē 閣遐爾仔鬼仔所在，準做我猶原一日到晏搪著鎂食無夠額 ê 鬼。
這 m̄ 是《鬼地方》ê 讀書心得，不而過有興趣會使得參考阿愷之聲Podcast SP10：逃出彰化的文學？來念陳思宏《鬼地方》Kevin Chen “Ghost Town”。
