「我們都是香港說書人」本土故事作者訪問：問題(一)

(回：前言)

十三郎： 點解你哋會參加呢次連載小說(暑期八回連載小說大挑戰)？

子遴： 我參加呢次連載小說活動，係因為受到你們嘅邀請。

羊之歌： 我參加挑戰是因為想挑戰自己，同時亦是一種自我滿足。

萬歲森林： 未玩過，所以想試下。

3D八爪魚： 會參加係為左刷存在感，投稿創挑得到既讚好同閱覽數比獨立發佈要多。

短頭髮： 都係嗰啲老生常談。想嘗試用文字說故事，練練文句，賺多啲經驗讓自己能隨心所欲地表達所想。還有和 Penana 的各位交流，睇睇自己有咩不足，見多識廣。

天洛卡： 因為覺得「Penana創作挑戰嘅作風」十分唔錯。香港網絡平台上嘅徵文活動同寫作活動為數不少，但要好似Penana嘅「創作挑戰」咁樣，可以喺即時交流、分享嘅同時，又帶有比賽嘅刺激感，比較罕見。每個作者既係挑戰者嘅意見提供者，亦可能係挑戰者嘅對手。但係大家仍然能夠坦白真誠咁交流意見，呢個風氣令人感覺良好。相信可以由呢次挑戰學到唔少嘢，所以參加。

沒有名字的人： 咁我之所以會參加依次嘅連載小說挑戰，其實係因為當時我無意中係主頁見到今次嘅挑戰，而且我見到漫長嘅暑假我都幾多嘅時間，所以就決定咗參加今次嘅挑戰。

十三郎： 哈哈！或者我都應該澄清一下，呢個唔係Penana嘅官方活動，係我個人自己想玩，而且我同Penana只係用戶身份，同佢哋無咩關係。再問一下，你哋覺得連載小說有咩特別？

子遴： 連載小說嘅特別之處，係唔似得一本小說咁，比讀者自由翻閱，而要由發表嘅平台用擠牙膏方式咁，逐啲逐啲刊登出嚟。情形就好似追劇咁，令讀者有追讀落去嘅趣味。

羊之歌： 連載小說會有一份責任, 定時要交稿, 自我管理要做得好。同時, 連載小說要準備充足, 例如寫第一篇之前最好有了一個大綱, 要知道自己個故事寫緊乜野, 結局係點, 以致中途不失方寸, 故事整合性才會比較強。

萬歲森林： 我覺得連載小說最特別係要度一個令人想追看嘅結尾，就好似電視劇咁，每集嘅結尾一定要吸引觀眾想追落去，當然，係好難掌握嘅。

3D八爪魚： 長篇連載小說真的很考作者耐心，因為作者會進步，會不停諗到新野，漸漸覺得原先個故事好差，作者無法更好地發揮，最後對故事失去信心，就此爛尾。所以我覺得短篇連載會更好，一個故事為作者當時功力既總覽，而且即使寫衰左都無咁肉痛。因為下個會更好。

短頭髮： 充滿期望，有不確定性，未知的。有些作者可能因讀者的反響臨時改劇情，仲有腰斬的可能。

天洛卡： 「起承轉合」係一篇小說嘅基本節奏。而連載小說就係喺基本嘅「起承轉合」中，包含多個更細小嘅「起承轉合」。始終，連載小說要考慮讀者嘅追看意欲，亦要顧及讀者嘅「記憶力」（如果故事好長好長，當連載到故事後段，讀者未必記得前段嘅劇情。）。每個章回係一個獨立嘅微細起承轉合；幾個章回可以構成另一組起承轉合；多組起承轉合最後編成一個完整故事。咁既可以保持小說嘅刺激程度，亦方便讀者去記住整個故事來龍去脈。呢個過程唔容易，好視乎作者嘅組織能力（各個起承轉合嘅緊密度是否得宜）同創作力（每個起承轉合嘅套路要盡量唔同。如果唔係會好重覆、好悶）。

沒有名字的人： 而對我嚟講，連載小說嘅特别之處就係你可以聽從讀者嘅意見，並係下一回入面改善及從中學習。

(續)