「我們都是香港說書人」本土故事作者訪問：前言

受訪七位香港作者：
子遴、羊之歌、萬歲森林、3D八爪魚、短頭髮、天洛卡、沒有名字的人

「我們都是香港說書人」 ─ 前言

十三郎：
今次訪問邀請咗一班參加咗之前舉辦嘅「暑期八回連載小說大挑戰」，主要原因係我自己想了解更多浮浮沉沉係香港網上寫作故事嘅本地作者。而今次我主要係針對故事/小說嘅作品，所以我諗咗好耐，用粵文定係用書面語？叫講故佬定係說書人？因為我本身係男，所以對「講故佬」呢個名係無咩所謂，但訪問嘅人有女作者喎！好似唔係有禮貌咁。所以都係用返說書人先。

3D八爪魚：
講故佬同說書人比，當然係說書人比較好聽，感官上亦比講故佬專業一啲。始終粵語『佬』尼個字帶有貶意。

短頭髮：
作為女作者對「講故佬」呢個名接受到 (甚至幾鍾意XD
係回答之前戴個頭盔先，我對創作呢個圈子唔太了解 (一直都係路人視角，只係有時手痕會寫啲嘢)，歡迎指教。

十三郎：
我自己係一個香港網絡上做寫作只有兩年嘅經驗，其實都唔係好了解呢個世界嘅玩法，雖然線下都有十幾年創作經驗，但有好多嘢，唔係話老資格就得，有一套日劇叫「不自然死因研究所」，中堂係其中一個法醫。有一次，佢係法庭上被質疑佢提出嚟嘅實驗報告嘅可信性，理由就係因為另一個法醫有佢五倍嘅解剖經驗，於是中堂就好直接咁講：
「啲發晒霉嘅經驗要嚟做咩？法醫係一直喺到進步緊，講嘅實驗結果。」
(大概係咁嘅意思)
當然，係科學上我到可以黑白分明，但係創作上，我哋又可唔可以咁去判定一個故事作品好定唔好？經驗又為作者帶嚟啲咩成就？

子遴：
關於點樣評定一個故事好定唔好，其實可以用八個字歸納：非為不能，而也不必。
故事創作本身就屬於主客觀嘅綜合體，係形式結構甚至佈局上，可以有公式，且看坊間教人寫小說或者編劇嘅書，就可以讀到各種嘅「公式」，但係故事內容上，要尋找必勝嘅公式，基本上係冇可能，但事實上，亦都不必。如果有可能，應該有唔少人會靠呢啲公式開班發大財，而且會將公式申請專利。再講，如果創作有必勝的公式，咁創作本身就變得完全唔好玩，唔會再有驚喜。呢種情況會偶爾出現係電視電影度，為求票房、收視。小說創作（我一直講緊都係以文字為媒介嘅創作）唔會亦不必有既定公式，創作世界猶如汪洋大海，任你暢遊，都好難游到邊界，咁樣嘅海先會令人嚮往同享受，妄想游到邊界，尋求創作嘅既定框架，就等於覺得泳池正過海洋。
咁樣係咪等如話故事創作冇得講好定壞呢？又唔係，我上面講過，故事創作係主客觀綜合體，有主觀判斷，亦有客觀因素，但呢啲客觀因素，都屬於基本功，就好似唱歌要求音準、拍子準、咬字準，否則唱者享受，聽者受罪。所有好嘅小說，都絕對可以過到客觀標準，在客觀標準之上，如何定好壞，就要講求更高層次嘅標準，例如意境、風格等等，基本上可以寫成專書討論（事實上亦已經有呢類書），係呢度唔講喇。
總結一句，故事創作可以分好壞，但唔會有絕對嘅好同壞，用劉以鬯先生嘅話概括係最合適嘅：創作，就係要與別不同。

3D八爪魚：
尼個世界真係有天才存在，天才可以用一日達到凡人用十年時間先到達既領域。但咁唔代表常人一定會輸比天才。只要有足夠既經驗，紮實既基礎，平凡既故事都可以好精彩。我覺得作者們都係係森林中屬找寶藏既獵人，天才能夠一步登天，凡人不停試誤，踩入陷阱，碌落山崖，搞到滿身泥濘，得到教訓既獵人靠經驗知道邊到唔行得，邊到係捷徑，最後揾到寶藏。

萬歲森林：
要判定一個作品好與壞，完全是個人的喜好問題或許諾貝爾文學獎會有一些得獎準則，可能會較重視反映社會，揭露人性之類……另一些獎項又會有自己的準則，例如會較重視創作性，感染力之類，例如一班評審之中，大部份都是喜愛推理的男士，那麼愛情小說便自然處於劣勢。

短頭髮：
我自己覺得係創作上經驗唔代表一切，亦絕對唔代表故事嘅好壞。我係某網睇人討論動畫劇情崩壞時有人講過(大概意思 …… 好耐之前嘅事，可能同原句差好遠)：「係一個編劇寫出爛片之前，冇人會諗到他會寫爛片出嚟。」反正大概想表達就算編劇(作者)之前經驗再多，好評再多，都有可能一時腦抽筋，寫咗啲爛作出嚟。作為讀者亦唔應該盲目，一味撐名家、老作家，有時候要承認佢地係有失水準的時候。
講番你嗰句，如果作者空有經驗，不思進取，在創作路上不會走得遠。同樣的手法、套路寫得多讀者會膩。都寫明係「創」作啦，用番個句「啲發晒霉嘅經驗要嚟做咩？法醫(說故事的手法)係一直喺到進步(改變)緊，講嘅係實驗結果(能否抓緊讀者的心)。」(指的係商業上，文學上唔知道適唔適用) (p.s. 雖然話要抓緊讀者的心，但我係拒絕快餐式作品) 不過當然唔係完全否定經驗的意義，創作者們是需要好好吸收經驗，繼而繼續進步 (做到邊種程度，也很視乎作者對自身的要求。我自己寫得開心，過到心理關口就得啦，唔理咁多。

沒有名字的人：
關於可唔可以咁去判定一個故事好唔好：咁其實對我嚟講，斷定一個故事並唔可以只靠經驗嚟判斷。我哋身為創作者，無論有幾多嘅經驗，都一定會有人話你嘅故事唔好睇。而係唔同嘅創作挑戰、比賽中，最後睇嘅，都係你所交嘅作品，而唔係你嘅經驗。無錯，經驗可以捭你更加嘅了解點樣掌控故事嘅節奏、人物嘅描寫同小說嘅文采等等，不過如果你自己睇完之後並唔鐘意自己嘅作品嘅話，無論你係新手，定係已經寫咗好耐小說嘅老手都好，都係唔會寫出一個好嘅故事。

天洛卡：
點樣判定一個故事嘅好壞…我認為，可以憾動人心嘅，就係好故事。文筆、筆風、題材呢啲較為表面嘅故事元素，會隨住世態變遷而改變，唔可以作為主要評價準則。
國家動盪嘅時候會盛行「傷痕文學」，社會昇平嘅時候會流行「愛情小說」，精神空虛嘅人會熱捧「勵志小說」，敗壞嘅世人喜歡講述「人性黑暗面」…每類題材都可以造就出好故事，視乎故事本身能夠有幾深入大眾內心。
現今一輩嘅文筆和筆風，當然無前輩咁老練同優美，但係單憑呢點，就能夠斷定佢哋唔能夠寫出好故事咩？筆風係作者嘅個人特色，文筆表達出一個時代嘅特色。想像下，有邊個能夠斬釘截鐵咁講「古代嘅文言文」一定比「民國初年嘅白話文」更好？呢個根本唔係「好」同「唔好」嘅爭論，而係時代嘅改變，係中性嘅。因應嗰個時代嘅需要，相應嘅改變就會出現。所以文筆同筆風只係一種表達方式，而唔係評論好壞嘅主要標準。不過，詞不達意、錯別字嘅使用、語法（主、謂、賓、定、狀、補）嘅誤用，諸如此類嘅基本錯誤，很大機會令讀者感到混亂，妨礙佢哋了解故事內容。咁當然係唔好嘅事情。
萬事皆變，唯有「人心」不變。所謂「人心」，就係人嘅基本情感同本性。喜怒憂懼愛憎欲，人皆有之。表達方式只係會隨住時間流逝而變化嘅軀殼，故事嘅精髓始終係憾動人心嘅能力。

(續)