喺漢城居住，搭地鐵係生活嘅一部份，甚至係一大部份。由於地面交通喺日常嘅大部份時間都係處於一個災難性狀態，潛入地底似乎係唯一嘅選擇。漢城嘅地鐵路線應該係地球上最混亂嘅，沒有之一。好多時轉車係要行好很遠嘅一段路、上上落落。對於我哋呢啲俾港鐵縱壞晒，行過對面月台都嫌遠嘅港豬而言，喺漢城搭地鐵同行入迷宮冇咩分別。
喺回程嘅地鐵上面，我同曹先生展開咗個答問大會。
其實以當時我嘅狀態嚟講，我實在唔係好有心情去傾偈，因為太多資訊要處理；但係為咗能夠作出更有效嘅處理，我唯一嘅選擇係繼續接收更多嘅資訊，直到我有足夠嘅資訊去作出決定，如果唔 hang 機的話。同好多人嘅想法一樣，我覺得呢個offer嚟得太快，坦白講係有啲兒戲。整個 interview 根本就唔似 interview，佢對我根本就冇足夠嘅認識，就係傾嗰一陣，佢點知我係唔係教細路嘅材料？掉轉頭講，我對呢個城市、呢間學校、呢份工作嘅認識都只不過係不足廿四小時，我又憑乜去作出一個咁重要嘅決定呢？
曹先生就覺得，一試無妨，反正距離學校嘅暑假仲有個幾月（八月尾，所謂嘅暑假就係得一個星期；語言學校嘛），我可以一邊試一邊摸索，到時再決定簽唔簽約。佢亦建議我，如果到時有心留低的話，最好就學吓韓文。
有心留低先算啦！坦白講，我到呢一刻嘅信心真係唔大；但同時地，心中又有一種無比刺激嘅挑戰感覺，覺得呢個係千載難逢嘅歷險之旅，處理得好嘅話，可能好好玩呢！
好似 Indiana Jones 咁。
講吓講吓，一粒鐘嘅地鐵好快就過咗；曹先生同我喺忠武路落咗車，佢話要帶我去食韓國嘢。說來慚愧，我呢隻門口狗，琴晚一支公唔敢自己去食韓國嘢，結果只係食咗 KFC。
撞鬼佢嗰碟鐵板豬肉辣到呢……
如果我真係要喺韓國落腳，我條脷頂得順，我個胃都頂唔蒲囉！
飯後，曹先生有事要先返教會做嘢，佢叫我考慮好之後再聯絡佢。我同佢道別後就向明洞方向漫無目的咁行，坦白講我有啲心不在焉；始終，要作出一個咁重要嘅決定，我個腦要處理嘅資訊量實在太大。
但係行路始終要帶眼，人生路不熟，我唔敢盲中中咁亂行，更何況七月嘅明洞街頭，咁多小背心+短褲長腿嘅韓妹來來往往，我又點可能集中精神咁諗嘢呢。
後來發覺女多得滯，一路行一路睇都唔係辦法，索性搵間有窗口向街嘅cafe坐低慢慢睇。
喺 cafe 坐落，靚女 waitress 笑容可掬咁捧咗杯 cappuccino 俾我，我開咗包喺免稅店買嘅純薄荷萬，有煙有啡有女睇，思路似乎開始暢順啲喇。
的確，以目前情況而言，我係 nothing to lose 嘅。我冇家庭負擔、剛畢業冇工作，又同女朋友分咗手一段時間，家庭經濟感情嘅包袱我都冇，呢個時候唔出嚟闖盪江湖見識一吓等幾時？老咗又邊度有回憶？
就係咁，第二日嘅早上，我打電話俾曹先生，話我接受 Esther 個 offer，條件係我要八月尾暑假後先簽約，同埋我要星期五先正式返工，因為一來我仲有兩晚民宿，住得唔好嘥；二來星期五返新工，有咩死人冧樓搞唔掂，我都係頂一日就有個週末緩衝一下。
（待續）
