2021-03-30|閱讀時間 ‧ 約 15 分鐘

《漢城》結局篇 V — 祝君好（下）

只望停在遠處祝君安好

「無論如何，我永遠愛你。」

愛，係靈長類動物最複雜嘅感情、最複雜嘅感覺。

愛係一種間接嘅感覺。即係話，冇一個直接動作稱為「愛」，好似𠵱起棚牙係笑，或者流淚係喊。最直接最簡單，你都要去擁抱一個人，透過「擁抱」呢個動作，從而轉化為愛嘅感覺。

於是，為咗得到愛與被愛嘅感覺，我哋開始向所愛嘅對象，做出種種嘅事情，令到被愛嘅人，得到愛嘅感覺。然後，條件反射，我哋同時都感覺幸福、被愛。

為咗愛，我哋不斷付出，不斷為最愛嘅人，供給最好嘅；我哋亦都會用盡所有嘅方式，去保護最愛嘅人。

但，如果保護最愛嘅唯一方法，係離開佢呢？

如果，只有離開 Chloe，先可以保護佢，令佢得到最好嘅生活；如果只有我從佢嘅生命中消失，先可以實現到我對佢嘅「愛的承諾」，咁我是否應該就此離開？

「為咗 Chloe 著想，我諗你係時候離開韓國、離開佢。」

美恩嘅一句說話，令到空氣凝住。

「我估唔到，呢句說話，竟然係出自你把口。」喺我心目中，美恩係個為愛情寧願犧牲下半生幸福嘅典範；而家竟然由佢嚟開最後一鎗。

「呢啲說話，唔係我講邊個講？」美恩好認真咁望住我。「呢啲醜人，唔係我呢個姐姐嚟做，邊個做？」

「你可以唔好講㗎，冇人迫你。」一種「難以置信」嘅感覺令我有啲火。

「我知你而家好嬲我，以後都可能會好憎我；」美恩好平靜咁講。「但我希望你聽我講完我想講嘅嘢先。」

「你講啦。」我好冷淡咁答佢。

「你仲記唔記得，當日喺球場，你介紹銀美妹妹俾我識嗰陣，我同你講過嘅嘢？」我點頭。

「弟弟，如果你真係當我係姐姐的話，你真係要好認真咁處理呢件事呀！如果你決定同 Chloe 一齊的話，你一定要好小心咁處理你同佢嘅關係，否則分開事小，你可能會破壞佢一生幸福㗎！」

「我講嗰陣，雖然都係好認真，但係我冇諗過，事情竟然會發展到呢個地步；」美恩嘆氣。「如果你哋再喺埋一齊的話，你真係會破壞銀美妹妹嘅一生幸福！」

「你會唔會有少少搞錯咗？」我好串咁答佢。「我想同銀美結婚，就係希望可以俾佢下半生嘅幸福；即使呢個只係個目標，但我會盡我所能去達成。我唔明，點解咁做會係破壞佢嘅一生幸福。」

「我知道你好愛佢，我亦都認同你嘅目標；坦白講，你對銀美妹妹嘅深情同埋付出，已經超出我嘅預期；」美恩講嘢好鍾意望住人對眼，我好怕同佢有呢種眼神交流，但避無可避。「只不過，你有冇諗過，銀美妹妹要犧牲幾多嘢，去交換你對佢嘅愛？」

我其實好想繼續串佢同單打佢，但咁做都於事無補；我冇再出聲，等佢自由發揮。

「妹妹喺醉到不醒人事之前同我講過，佢要同你遠走高飛、去香港生活；但係同時地，佢好擔心，唔知自己一個人離鄉別井生活，會唔會適應。佢更擔心嘅，係當佢同佢爸爸脫離關係之後，佢仲可唔可以見到，佢最愛嘅媽媽同嫲嫲……」

「喺香港，有我照顧佢，唔會有問題；」我好倔咁答佢。「至於佢想見佢媽媽同嫲嫲的話，我可以隨時陪佢返嚟探親；三個鐘機之嘛，唔會有問題。」

「弟弟呀，你究竟係天真，定係同我鬥緊氣呢？」美恩繼續目不轉睛咁望住我。「脫離關係，唔係一啲今日講完、聽日可以當冇事嘅嘢嚟㗎！佢爸爸會登報紙作出聲明，所有法律同人事資料記錄庫都會有呢個記錄在案，日後銀美妹妹無論想做任何同政府有關嘅嘢，或者係一啲大型韓國企業工作，呢個記錄都會俾人翻出嚟算賬！」

「韓國嘅社會觀念，普遍唔會認同妹妹嘅做法。佢哋會覺得，呢個女人好有問題，一係非常忤逆、一係問題大到連雙親都要大義滅親同佢脫離關係！弟弟呀，你再諗清楚，如你你哋無風無浪、白頭到老，咁好多嘢都唔會係問題。但係萬一，我係講萬一，如果你兩個有啲乜嘢問題出現的話……」美恩頓住，好凝重咁望住我。

我唔知係怯定係點，我避開佢嘅眼神。

「就好似當日我提醒你嘅『萬一』一樣，如果你哋分開咗，到時銀美妹妹嘅選擇，就只有一個語言不通，亦無親無故嘅香港，同埋世人唔會接受佢嘅故鄉韓國；因為你嘅關係，佢喺韓國都會同樣係無親無故。」美恩講到呢度，有啲眼濕濕。「到時，你叫佢點過埋下半世？你而家係攞緊佢嘅下半生生活同幸福，去賭一鋪呀！呢鋪輸咗，唔會係離婚咁簡單㗎！佢連個安全網都冇埋呀！」

「仲有，你留意吓佢嘅精神狀態；」美恩仍然繼續講落去。「然後佢嗰頭白髮，我真係好擔心佢，再係咁繼續落去，可能會迫出個情緒病……」

美恩一點不漏咁將我嘅 worst case scenario 講晒出嚟。我想駁佢，但唔知點駁；因為佢呢番說話，正正係我嘅夢魘。

「弟弟呀，愛一個人，除咗想同佢白頭到老之外，仲要無條件咁保護佢，同埋係有需要嘅時候，為佢作出犧牲；」美恩抹一抹眼淚，繼續望住我。「銀美妹妹對你千依百順，如果你而家叫佢陪你跳樓的話，佢諗都唔諗就拖住你隻手跳落去。佢唔理智，但係你要理智呀！」

「你哋搞成咁，我好抱歉。如果你真係愛佢的話，你應該要為佢作出犧牲。只要你離開佢、離開韓國，佢都仲有個機會，回歸之前嘅平淡，同埋幸福。」

「你而家係攞緊佢嘅下半生生活同幸福，去賭一鋪呀！呢鋪輸咗，唔會係離婚咁簡單㗎！佢連個安全網都冇埋呀！」

美恩走咗之後幾個鐘，呢句說話仍然繼續喺我腦海中不停回帶。

坦白講，呢番說話，令到我好嬲美恩；十八年後嘅今日，我都仲好嬲佢。但同時地，我亦嬲佢唔落；因為佢只係講出咗個事實。

一個好殘酷嘅事實。

我嘅計劃，係冇 plan B 嘅。其實感情事，何嘗有 plan B？感情嘅 plan B，通常係指「一腳踏兩船」。好明顯，呢個唔係我哋 case。

但係一般正常個案，兩個人離婚，最多係毀咗一段婚姻、一段感情。情傷過後，雙方仍然可以向前看；只不過係兩個唔同嘅未來。你嘅父母兄弟姊妹朋友，唔會因為你離婚而離棄你；你嘅未來僱主，唔會因為你離過婚而唔請你。

但係如果我執意要帶 Chloe 遠走高飛的話，如果有乜差池，我仍然會擁有以上嘅一切；但佢就一無所有。

一無所有。

我望住瞓喺我側邊嘅 Chloe，佢仍然未酒醒，攬住美美、一臉純真咁瞓。足足三個星期，我冇見過佢瞓得咁甜。

我輕輕撫摸佢嘅臉蛋同白髮，吹彈可破嘅肌膚並冇被違和嘅白髮所掩蓋，仍然係當日喺東大門清麗可人嘅小美人。

小美，我嘅一生中最愛。如果我嘅離開，可以為呢齣悲劇畫上句號；如果我嘅痛，可以挽回你應得嘅幸福；咁就等我行最後呢一步啦。

星期日，上午九點。

我冇瞓過，成晚就係望住酒醉熟睡嘅 Chloe，心中盤算住，點樣同佢講分手。

兩年前，喺狎鷗亭江邊，我同佢講過一次「分手」。兩年後，當我哋已經去到談婚論嫁嘅階段，點解我哋仲要講分手？點解個天要咁撚樣玩我？

Chloe 從佢嘅酩酊大醉中幽幽轉醒。佢睜開眼望一望坐喺佢側邊嘅我，然後爬過嚟攬住我，叫我一聲「老公」。

「老公，我好頭痛呀……」佢皺住眉。「我諗我要瞓多一陣；你肚餓的話，食住少少嘢先吖，我瞓醒再煮俾你食。」

我點一點頭，將佢輕輕𢭃起，放返落床；等佢再瞓過。

我好似個已經被綁好喺電椅上面、等待處決嘅死囚，望住行刑室裏面嘅電話，拖得一陣得一陣；希望電話喺最後關頭響起。

如是者，三個鐘之後，Chloe 再次轉醒。

「有冇好啲呀？」我問佢。

「唔！」佢大力點頭。「好好多喇！我煮嘢俾你食吖！」

都好嘅，死囚都有最後晚餐啦。

Chloe 好熟練咁，滾咗個芽菜湯同埋煎蛋餅，再煮咗少少飯；我哋喺茶几上食「早飯」。

「老公，sorry 呀……」Chloe 喺差唔多食完嗰陣，開聲打破沉默。「我都唔知自己飲咗咁多㗎；你係咪嬲我呀……？」我擰一擰頭。

「小美，」無論點拖都好，我都係要開聲嗰個。「我有啲嘢想同你講……」

「咩事呀……？」敏感嘅佢，察覺到有唔妥；臉色一沉。

「我哋再係咁落去，都唔係辦法；」我盡量壓抑自己嘅情緒，好冷淡咁講。「既然個問題都係解決唔到，不如我哋分開，了咗件事。」

我好留心咁望住佢。佢冇任何反應，過咗一陣，佢面上慢慢出現咗個笑容，一個好古怪嘅微笑。

「我可能飲得太多，仲未清醒；」Chloe 想起身去廚房。「我想飲茶，你要唔要呀？」

「小美……」我叫住佢。

「頭先煮得咁少，你唔飽㗎；」佢冇理我，繼續一路講一路行去廚房。「不如我煮多個拉麵你食吖！」

「銀美呀，面對現實啦！」我欄住喺佢面前。

「現實？現實咪就係唔夠飽囉！」佢嘅笑容消失，眼眶開始含淚。「你唔夠飽唔得㗎！我唔可以俾老公捱肚餓㗎……我……我……我都決定跟你去香港、遠走高飛，我連爸爸媽媽都唔要，我只係要我老公；點解仲要分手喎？我哋應該結婚㗎！你搞錯晒喇！」

「我哋唔可以永無止境咁，喺個死結度 drill 落去㗎。」我答佢，仍然努力保持冷淡。

「咁咪唔好 drill 囉！咁你帶我去香港，我哋從新開始生活咪得囉！」佢望住我，眼中仍然有一絲希冀。

「你有冇諗過，如果去到香港，我再好似今日咁，同你講分手的話；」我望住佢。「你會一無所有？」

「咁你咪唔好同我講分手囉！」佢開始急，眼淚流得仲急。「點解要分手喎？我哋兩個都咁愛對方！」

「其實，我唔係真係咁愛你……」我嘗試打沉佢，但似乎連自己都呃唔到。「同你一齊，都係為咗解悶啫……」

「你就算殺死我十次，我都唔會信你呢句說話！」佢斬釘截鐵。

「點都好，我已經決定咗；」我唔想再糾纏。「Visa 到期之日，我會自己離開；我同你，就咁算啦。」

佢企咗喺度，完全冇反應。

「唔係㗎……唔係咁㗎……我哋應該講結婚㗎……」佢開始自言自語。「我哋食緊早飯……然後會去街……我哋會買嘢……買啲去香港用嘅嘢……唔係咁㗎……唔係……」

「小美，你唔好咁啦……」我埋去扶住軟弱無力嘅佢；佢撥開我，跌坐咗喺鋼琴前面嘅地下。

「唔要分手……我唔要……唔要咁樣……」佢開始失控、越喊越大聲。「我唔要分手呀！唔要！我哋要結婚㗎！我唔要分手呀！」

「小美……」我再忍唔住扮冷淡，喺佢後面攬住佢。當我貼近佢身體嗰陣，我除咗感覺到劇烈嘅心跳同埋急速嘅呼吸之外，我仲感覺到，一種不由自主嘅顫抖。

「唔得㗎！唔得㗎！蠢蛋係我老公嚟㗎！小美唔可以冇咗蠢蛋㗎！我唔要呀！」佢竭斯底里咁嚎哭。「小美唔可以冇咗蠢蛋㗎！小美唔可以冇咗蠢蛋㗎！我唔要呀！我唔要分手呀！我唔要呀……小美唔可以冇咗蠢蛋㗎……小美唔可以冇咗蠢蛋㗎……蠢蛋係我老公嚟㗎……呀……」

《聖經》話俾我聽，神愛世人。點解神嘅愛，可以令我哋咁痛苦？究竟係邊一種愛，要兩個深深相愛嘅人，面對咁殘酷嘅現實？呢啲算係乜撚嘢愛？

祢俾人釘咗喺個十字架度，釘咗二千年，喺咪釘撚懵咗祢呀？！

我再忍受唔到屋裏面嘅氣氛，衝咗出庭院。抑壓咗幾個星期嘅憤怒、怨恨、無助、徬徨，再加上湧上心頭嘅怒火，完全集中喺我嘅拳頭之上。我對住庭院嘅櫻桃樹，一拳一拳咁擊向樹身，同埋樹前嘅泥土上。

廿拳？卅拳？四十拳？我唔知。直到我背後，有一個人好用力咁攬住我。

「唔好呀！老公！」Chloe 喺背後死命咁攬住我。「你應承過我，唔會傷害你自己㗎！小美唔俾你傷害自己！」

然後，我先發覺，櫻桃樹、泥土、雙拳，全部沾滿血、肉、泥嘅混合物。

冷靜過後，Chloe 用毛巾包住我雙手，然後車咗我去美恩嘅醫院。

建國大學醫院急症室。

我喺診斷室坐咗喺床上面，護士幫我包紮緊傷口。打咗好幾針、照咗X光，等緊結果；Chloe 喺外邊等候室等緊我，我唔俾佢入嚟，因為我驚嚇親佢。

呢個時候，美恩同急症室主診醫生入咗嚟。佢哋同我點一點頭，然後美恩將我雙手嘅X光片，攝咗上個燈箱度。

「馮先生，你嘅八節拳頭骨都裂咗；」醫生同我講。「我諗你會有好一段時間都練唔到拳喇。」佢對住我笑一笑。

「還好冇碎到，所以唔使開刀。我哋會俾一對保護托你，你日常時間就戴住佢，等啲骨埋口埋得好啲。止痛針藥力過咗之後，呢幾日可能會好痛，所以護士會俾啲止痛藥你。」

「朴護士長，」醫生轉頭望住美恩。「佢喺你朋友？」美恩點頭。

「咁我交俾你處理喇；」醫生再轉頭望住我。「唔好再打拳住喇！」然後佢走咗。

美恩示意幫我包紮嘅護士，佢好識趣咁出咗去。

「打裂八節拳骨；」美恩笑一笑望住我。「要唔要姐姐幫你整裂埋其餘嗰兩隻？」佢嘅笑容好快僵住，然後一的眼淚畫過佢面上。

「弟弟呀，」佢輕輕攬住我，我感覺到佢喊緊。「姐姐對你唔住！我當日唔應該咁努力撮合你兩個，令到你哋而家咁痛苦！對唔住呀……」

「傻啦，點會關你事喎！」我安慰佢。「要發生嘅，始終要發生……」

佢抹乾眼淚，幫我完成包紮，然後送我出去。喺等候室嘅 Chloe 見到我行出嚟，隨即衝過嚟攬住我，然後問我：「你冇事嘛？醫生點講？」

「冇事，」我餘下冇包嘅指尖摸一摸佢塊面。「慢慢就會好返。」

「妹妹，我……」美恩開聲，想捉住 Chloe 嘅手臂，但係俾 Chloe 甩開佢。

「我哋唔需要你嘅可憐；」Chloe 冷冷咁答佢。「唔好誤會我哋嚟呢度睇醫生，係因為對你嘅信任。我帶佢嚟，係想你親眼睇吓你自己嘅傑作！冇咩事我哋走先喇，朴護士長。」聰明嘅 Chloe，又點會估唔到，美恩曾經對我「苦勸」。

美恩欲辯無辭；好無奈咁望住 Chloe 扶住我走。

我哋返咗上車，但係 Chloe 冇即刻開車。佢輕輕捉住我包紮好嘅雙手，輕輕喺上面錫咗一啖，然後不停撫摸傷口上嘅紗布，熱淚盈眶。

「老公，」佢望住我。「見到你咁，我好心疼，我好辛苦呀……我哋唔好再咁樣傷害自己、傷害對方喇；如果再試多一次咁嘅事情，我寧願死……」

我點一點頭。

「我哋開開心心咁，過埋呢個幾月；之後嘅嘢，就交俾個天啦！」佢淚流滿面咁望住我；我點頭答應，然後緊緊抱住佢。

天若有情天亦老。我哋就睇吓，呢個老天，仲可以點樣作弄一對有情人。

聽你不斷呼叫我劃破寧靜我的心下墮在難過講不出愛沒結果口和唇緊緊閉鎖

哭也一話都不說害怕連累你一生日月憾無缺只差跟你曾遇過給過你太多波折

寧願沒擁抱共你可到老任由你來去自如在我心底仍愛慕如若碰到他比我好只望停在遠處祝君安好雖不可親口細訴

說太多話我想說但我還是要啞口道別任由我天空海闊流著血只要你白似冰雪

（待續）

分享至

成為作者繼續創作的動力吧！

《當首爾仍是叫漢城的那些年》

追蹤

《漢城》結局篇 V — 祝君好（下）

作者的相關文章

IF的沙龍的其他內容

你可能也想看

發表回應

《漢城》結局篇 V — 祝君好（下）

作者的相關文章

IF的沙龍 的其他內容

你可能也想看

發表回應

IF的沙龍的其他內容