更新於 2020/08/05發佈於 2020/08/05閱讀時間約 8 分鐘

韋根破產保護，究竟發生咩事？

前言：這篇文章 2020 年 7 月首次在 Medium 發表，隨著上日 ( 2020 年 8 月 4 日) 獨立仲裁小組裁定韋根上訴失敗， 2020/21 年度球季須降落第三級的英格蘭甲組聯賽，賴叔 (aka 規佬) 將文章轉載至方格子，希望讓更多華文讀者了解事件來龍去脈。

韋根破產保護，究竟發生咩事？

星期日，規佬未瞓醒就見到有讀者留言問英冠球會韋根進入破產保護程序，同洗錢或者其他違法違規嘅嘢有冇閞係。本來冇特別諗住寫，但係睇多幾篇報道，又覺得單嘢可圈可點，可以同大家分享下。睇開英超嘅球迷應該唔會對韋根感到陌生。畢竟佢哋 2005 至 2013 年間曾經躋身英超，更加曾經喺 2013 年捧走足總盃，以小球會發跡嚟講，算係一時佳話。時任班主 Dave Whelan ，年輕時曾經係職業足球員，踢過 1960 年足總盃決賽但輸波兼斷腳。佢結束職業生涯之後，喺 1995 年以 100 萬英鎊收購仍然喺第三級聯賽打滾嘅韋根，到 2018 年賣盤嘅時候就收返近 2,200 萬英鎊，算係名利雙收。世界各地嘅球會呢廿年嚟都出現好多轉手嘅消息，各方買家都有自己嘅原因。車路士係俄羅斯油王阿巴莫域治 (Roman Abramovich) 分散地緣風險嘅棋子，曼聯係加拉沙家族 (the Glazers) 堆積債務嘅倉庫暨提款機。香港亦曾經出現過英超班主：楊家誠喺 2007 年入主伯明翰，名下上市公司泓鋒國際亦易名為伯明翰環球，球會曾經喺 2011 年成為聯賽盃冠軍，但未幾楊家誠被控洗黑錢 7.2 億港元，並於 2014 年罪名成立，判監六年，至 2019 年出獄，但超過三億嘅資產已經被充公，滿頭白髮、戴住膠框眼鏡嘅佢，亦不復當年嘅意氣風發。點解話係割禾青？有錢賺咩？原來係有嘅！根據 2019 年 12 月國際娛樂發出嘅公告，佢哋同 Next Leader Limited 簽咗補充

星期日，規佬未瞓醒就見到有讀者留言問英冠球會韋根進入破產保護程序，同洗錢或者其他違法違規嘅嘢有冇閞係。本來冇特別諗住寫，但係睇多幾篇報道，又覺得單嘢可圈可點，可以同大家分享下。

睇開英超嘅球迷應該唔會對韋根感到陌生。畢竟佢哋 2005 至 2013 年間曾經躋身英超，更加曾經喺 2013 年捧走足總盃，以小球會發跡嚟講，算係一時佳話。

時任班主 Dave Whelan ，年輕時曾經係職業足球員，踢過 1960 年足總盃決賽但輸波兼斷腳。佢結束職業生涯之後，喺 1995 年以 100 萬英鎊收購仍然喺第三級聯賽打滾嘅韋根，到 2018 年賣盤嘅時候就收返近 2,200 萬英鎊，算係名利雙收。

世界各地嘅球會呢廿年嚟都出現好多轉手嘅消息，各方買家都有自己嘅原因。車路士係俄羅斯油王阿巴莫域治 (Roman Abramovich) 分散地緣風險嘅棋子，曼聯係加拉沙家族 (the Glazers) 堆積債務嘅倉庫暨提款機。

香港亦曾經出現過英超班主：楊家誠喺 2007 年入主伯明翰，名下上市公司泓鋒國際亦易名為伯明翰環球，球會曾經喺 2011 年成為聯賽盃冠軍，但未幾楊家誠被控洗黑錢 7.2 億港元，並於 2014 年罪名成立，判監六年，至 2019 年出獄，但超過三億嘅資產已經被充公，滿頭白髮、戴住膠框眼鏡嘅佢，亦不復當年嘅意氣風發。

講返韋根賣盤先。買家係邊個呢？原來係香港上市公司國際娛樂 (上市編號： 1009) 嘅全資附屬公司 Newworth Ventures Limited 。國際娛樂本業係喺菲律賓經營酒店，以及出租物業畀賭場經營者。公司喺 2017 年由鄭家純家族轉手畀聯合金融嘅蔡朝暉。

2018 年 5 月，國際娛樂喺港交所發出公告，宣布計劃收購韋根，原因係睇中球會喺第三級聯賽 (英甲) 名列榜首，來季電視轉播收益可望大增，亦有助國際娛樂分散業務收入來源。而呢單交易結果喺 2018 年 11 月完成。

隨後， 2018 年 11 月及 2019 年 10 月，國際娛樂兩度更換 CFO (Chief Financial Officer) 。呢個變動同韋根嘅交易有冇關係呢？規佬係睇唔到嘅。純粹 for 大家 information 啦。

2019 年 11 月，國際娛樂發出公告，表示已經與 Next Leader Limited 簽訂備忘錄 (Memorandum of Understanding, MOU) ，商議出售 Newworth Ventures Limited 。即係話，國際娛樂入主韋根一年，就已經同人哋傾好要賣盤，堪稱球會版嘅「摸貨」。

當時 Next Leader Limited 打算成立一隻喺 Cayman Islands 成立嘅基金，其中 51% 股權會由蔡朝暉持有，另外 49% 股權就搵街外人接貨。

2020 年 2 月，國際娛樂宣布同 Next Leader Fund, L.P. (Limited Partnership) 達成協議，出售持有韋根嘅 Newworth Ventures Limited 。 Next Leader Fund 就係上面所講，由 Next Leader Limited 做 General Partner 而成立嘅基金，除咗蔡朝暉透過 Head & Shoulders Direct Investment (一間 BVI 公司) 持有 51% 股權之外， 48% 由香港商人歐陽偉基全資持有嘅公司揸住。剩低嗰 1% 由 General Partner 持有。

咁點解國際娛樂要賣走韋根呀？公司 2020 年 5 月召開特別股東大會嘅公告就話，韋根升班到次級聯賽英冠所帶來嘅好處不似預期，球會冇話變得好賺錢，仍然每年蝕緊超過 8,000 萬港元，其中人工開支高達 1.69 億，而且球會聯賽排尾五，來季冇可能升上英超 (“which is out of the Board’s expectation” ，呢句真心好正，玩 Football Manager 都唔係咁易連續兩季升班喎大佬) ，加埋 Brexit 呀、肺炎呀⋯⋯總之唔老黎就割禾青啦。

點解話係割禾青？有錢賺咩？原來係有嘅！

根據 2019 年 12 月國際娛樂發出嘅公告，佢哋同 Next Leader Limited 簽咗補充 MOU ，列明交易作價係 1,750 萬英鎊，折合 1.84 億港紙，比一年前買入價 2.39 億，低 4,500 萬左右。

心水清嘅朋友會知道，英鎊匯價到 2020 年成交嘅時候再跌，估計國際娛樂實收 1.66 億左右，即係一間韋根一出一入蝕達 6,300 萬港元。

但係 2020 年 5 月嘅公告就話，公司其實賺咗 1,544 萬港元！喺入主韋根期間注資達 2.35 億港元，係球會欠公司嘅債務，喺交易完成後會以 8% 年利率貸款方式，繼續借住畀韋根先。呢啲財技，恕我真係唔識睇。

2020 年 6 月 4 日，韋根宣布歐陽偉基入主，呢位「有豐富從商、物業投資及經營業餘球隊經驗」嘅人兄喺球會聲明上話好期待喺艱難時期支持球會運作，「希望同熱情嘅球迷見面」。 Which turns out to be never 。事隔 26 日，歐陽偉基拒絕支付 600 萬英鎊嘅球會開支，並且將球會交託畀破產管理人。

當英國球壇媽聲四起之際，歐陽偉基發表聲明話已經喺收購球會及代球會向國際娛樂還款嘅過程中，付出 4,100 萬英鎊，之不過疫情問題乜乜乜所以迫不得已物物物。你見我都廢撚事仔細翻譯佢篇聲明，就知道純粹係講經啦。

韋根嘅國會議員兼影子外相 Lisa Nandy 形容事件係國際醜聞，要求徹查並且收緊收購球會嘅要求，避免事故重演。英冠賽會主席 Rick Parry 被發現同鄰居講起，話有傳言指菲律賓有賭盤買重韋根降班，並且話韋根前班主喺菲律賓有博彩業務。

究竟歐陽偉基呢個名不見經傳嘅所謂獨立第三者買家，係真心想搞波，定係純粹代客泊車嘅人頭？ Nobody knows 。但係咩人會喺投資超過兩億港紙嘅一個月內就將嚿資產交低，不顧而去？啲錢嘅來源喺邊度嚟？由於 Cayman funds 本身透明度有限，大概要等官府問到 Fund administrator 先至有答案。

蔡朝暉喺接受 FT 訪問嘅時候重申，同歐陽偉基並無關係，只係喺 2019 年透過中間人介紹而認識。而歐陽偉基往後仲會唔會接受傳媒訪問或者出現喺新聞報道上呢？畀啲時間大家，放長雙眼睇。 (按：歐陽偉基有喺上訴期間向仲裁小組提供資料，但事實證明無補於事)

Wigan Athletic seller blames projected losses for disposal

Wigan Athletic's former owner has said projected losses forced him to sell the club to the Hong Kong businessman who plunged it into administration just weeks after completing the purchase.

從國際娛樂嘅角度睇，投資喺韋根嘅錢應該收得返晒，牌面睇，冇蝕底。又或者對於國際娛樂嚟講，有比起韋根更加緊要嘅生意要做。

2020 年 6 月 10 、 18 及 22 日，國際娛樂先後三度發出公告，主動通知大家佢哋嘅附屬公司向菲律賓當局申請博彩牌照，已經獲得不反對通知書，現正進行申請臨時牌照嘅階段。

呢頭甩手韋根，嗰邊申請賭牌，時間貼到實一實。據 FT 報道，國際娛樂急於將韋根脫手嘅原因，就係為申請菲律賓博彩牌照掃除障礙，皆因當局唔會允許一個持有球會嘅人士喺當地開賭。

韋根而家正在尋找買家，同市嘅欖球隊嘅東主有意做白武士。球會為咗緊縮開支，已經炒咗 75 個員工魷魚，餘下嘅職球員，亦要兩折出糧。球迷會暫時籌到十幾萬英鎊，支撐球會短期嘅嘅財政。除咗財政問題，韋根仲因為被接管而被罰 12 分聯賽積分，若然上訴失敗就好可能要降班。 (按：上訴已經失敗，韋根最終以聯賽尾二降班)

英冠賽會主席 Rick Parry 日前接受 BBC 訪問，話事件史無前例，英國球壇被不禮貌對待。喺香港風雨飄搖之際，韋根球會上下面臨嘅困境，大概係大家最唔需要嘅 publicity 。

更多賴叔、規佬及職場心經的文章，請見 Pateron

賴叔 is creating 規佬筆記、職場心經、周五床上。 | Patreon

Become a patron of 賴叔 today: Read 94 posts by 賴叔 and get access to exclusive content and experiences on the world's largest membership platform for artists and creators.