世界个無底巷

FGO 第二部第三章：人智統合真國——紅之月下美人

　　　頂禮拜講映泉鄉个時，我有共伊个演出提來佮 FGO 比，毋過聽朋友講，FGO 个演出佇 2D 手機仔電動內算上好个。今仔想欲來講按呢个演出講个是啥物款个故事。

　　我兩工前才共第二部第三章「人智統合真國——紅之月下美人」通了，編劇是我誠愛个虛淵玄（Hi-ian hiâ​ｎ​）先生。伊進前个創作就看會出伊對中華文化个興趣，這回伊寫个故事是，若準講兩千外冬前个秦始皇成功發展仙術，毋但家己食甲兩千二，閣一統地球，會是按怎个世界？GO 比，毋過聽朋友講，FGO 个演出佇 2D 手機仔電動內算上好个。今仔想欲來講按呢个演出講个是啥物款个故事。

　　對咱个世界過去个主角在先拄著遐个平民，遐人大部份攏種田，麥仔收成毋但會當食，閣會當做生物能源，因為種田个技術進步，逐家輕輕鬆鬆就會當生活，逐工食飽𨑨迌。因為世間賰一个國家，嘛無人枵著，已經久無戰爭，抑無人相刣，連啥物是武器嘛毋知。仙術予逐家無病無疼，年歲到矣就順順行。規个世界可比中華思想中上理想个大同世界。

　　毋過，咱个主角是為著消滅這个世界而來。

　　踮 FGO 个世界觀內底，平行世界有分「編篹事象（pian-tsuān sū-siòng）」佮「剪定事象（tsián-tīng sū-siòng）」，奈須蘑菇（Ｎāi-su môo-koo）這个人攏愛共足平常个代誌號一个足歹了解个名，「編篹事象」是一寡佮咱个現實差不多个平行世界，平行世界會隨世間人會選擇無仝愈來愈濟，宇宙能量無夠予遮呢濟世界同齊存在，踮歷史發生重大變化个時，就會共差不多个一寡選作「編篹事象」，其他差傷濟个就个變作「剪定事象」予剪定／消滅，選擇个標準是看世界發展个可能性，傷穩定个世界嘛會予剪定——這就是人智統合真國个命運。（參考資料）

　　這是第三章，進前主角已經去過兩个「剪定事象」，攏是氣候䆀、資源少，誠歹生存个世界，干焦這个世界个人過甲若桃花源，避秦人煞毋知大秦已是地上樂土，為著咱這个人相刣、國相戰个世界，干焦會當「剪定」大秦。

　　若是你會希望生活佇佗一个世界？

　　踮大秦，管理全球干焦需要一个人，秦始皇——嘛是唯一个皇——共家己改做機械，全心為著世界生存，伊一人个思考就是世界个方向，除了皇，無人需要思考、無人予允准思考，世間毋是思考無仝个億萬人所組成，世界是唯一有思考个「真人」个世界。

　　前無偌久我拄仔好讀著一本冊《銃砲、病菌佮鋼鐵》，咧討論人類文明是按怎發展起來，其中有講著，政治大統一个所在，好个時陣會當誠好，但是有一仝若做一个歹決定，嘛無人會當救，親像當初明朝管海事个人政治鬥輸人，海洋科技就提無錢通發展，但是佇歐洲，就算講西班牙無愛發展海事，邊仔个葡萄牙、荷蘭抑是英國嘛會發展，才袂共文明个未來囥佇仝一个籃仔內。

　　毋過，文明敢一定愛發展佮進步？若準講逐个攏會當一世人食飽穿好，是毋是世界就無需要閣改變？抑是講永遠毋滿足就是人類个本性，會當思考未來、會當向望未來，才會當叫作「人」？

　　若按呢，咱敢是永遠咧捒石頭仔去山頂閣輾落來？