vtuber 敢是 ACG？
今仔想欲來講 vtuber，這个專欄叫「ACG 開講」，vtuber 到底敢有算 ACG？就會當討論足久。我誠久無上 ptt，聽講 C-chat 最近就咧討論這个問題。
ACG 是動畫、尪仔冊佮電動，vtuber 佮這三項一點仔關係也無，毋過人定定講 ACG 是「二次元」——就是平面个意思，佮用真人面出現个 ytuber 來比，用 2D live 出現个 vtuber 確實算二次元，但是我感覺比起這，應該有閣較根本个無仝，就親像一本小說到底敢是輕小說个彼个永遠个問題。
聽過一个講法，輕小說佮其他个小說無仝个所在是，咧讀輕小說个時，咱心中个畫面是日本尪仔冊个風格，一般小說个畫面就是真人電影,若按呢來講，一開始就用日本尪仔冊畫面个 vtuber，講是 ACG 个一部份，嘛無毋著？
除了外表畫法，日本尪仔冊个角色猶閣有性格方面特別个所在，一般上是較標籤式个角色，閣有發明專工表現一寡性格標籤个詞，譬如講刺嬌（ツンデレ）一類，一个部份我就感覺 vtuber 無一定會按呢，有个誠認真咧搬一个尪仔冊款个角色，有个是共真正个家己加一層二次元皮，出來佮逐家交朋友，無一定講就這種較好，但是 vtuber 到底是毋是 ACG？抑是講 vtuber 个 ACG 程度，就愛看遮濟部份。
vtuber 嘛愛看頻道个內容，足濟 vtuber 攏咧放送拍電動，按呢就是Ｇ（game）無毋著。
講遐呢久猶未講著我到底咧看啥物 vtuber，這馬我上愛个猶閣是南心詠，進前踮噗浪紹介過，會當去遐看，伊个聲誠古錐，性格有淡薄仔天然烏，其實誠尪仔冊款，但是聽伊咧講，伊若想嘛是共實在个家己提來水管表現。伊大部份个放送攏咧拍電動，但是我其實較愛家己迌，所以攏開佇遐聽爾，我顛倒愛聽伊開講。
南心詠
前兩工我閣看著一个新个 vtuber——悠白，伊个設定是一个我有咧看个電動 ytuber 浮雲个小妹，但是浮雲感覺就是一个 ID，悠白就有啥物蹛佇咧天頂一類个設定，當我想講伊應該是尪仔冊款个角色時，伊閣開始愛啉啥物酒這款誠人味个代誌，予我無蓋了解欲按怎看伊。
悠白
對我這種 óo-tha̍k-ku̍ｈ來講，尪仔冊款个角色可能感覺較四序，毋免直接面對一个活跳跳个人，較袂閉思，直接予我知影伊就是咧搬戲嘛予我會當放心看，誠希望台灣以後有較濟這種用角色講古型个 vtuber，我知影日本有，但是我聽無。
