編輯嚴選
有限世界無限情

2021/01/12閱讀時間約 3 分鐘
AVG 个選擇支設計
  這禮拜我總算是共《薄櫻鬼》通了,對開始到結束差不多兩個月,開五十外點鐘,按呢對我來講兩個月已經算緊,因為這回我攏用規暗个時間一睏頭共一个角色个路線走予了,而且無共逐个人个語音攏聽完,主要就是看故事爾,會開遮呢濟時間實在是因為角色有 12 个,是我奕過个文字戀愛電動中上濟个。
《薄櫻鬼》通關禮
  這馬欲揣著遮呢傳統个文字冒險嘛無簡單,雖然這是十外冬前个電動,十一冬前个《Steins;Gate》嘛蓋有變化,我想是因為這个電動誠認真咧戀愛,上重要个是用一个故事予你看著這个查埔人个會予人欣賞佮疼惜个所在,無欲予你耍啥物特別个系統,抑是予你看著啥物以外个故事。
  我耍過个 AVG 誠濟攏會配合主題設計選擇支,譬如講《心跳文學社》會當予你揀字作詩;《Steins;Gate》个對話佮動作攏袂當揀,但是會當揀手機仔个批欲按怎回;前作《Chäos;HEAd》嘛是袂當揀對話佮動作,干焦會當揀戇想个方向——欲血臊抑是仔;《Sweet Pool》佮《Chäos;HEAd》有淡薄仔成,干焦會當揀本能佮理性,甚至毋管你按怎揀,主角做个代誌攏差不多,雖然了後會影響著結局就是矣。
  我家己感覺 AVG 設計選擇支个困難是,愛予選擇影響著結局,閣袂當影響著中央傷濟代誌,若無故事會寫甲死。《薄櫻鬼》內底就有一个問題是,誠濟情感个發展攏囥佇揀有著加好感个選擇了後,意思是你若揀袂著就看袂著,按呢就會感覺盍會隨佮男主角遮呢熟?強逼人若是想欲共相愛个經過看予完全,就愛攏揀著个,失去電動予人家己操作个意義。
  目前我感覺設計了上好个是《Steins;Gate》,《Steins;Gate》是查埔囝咧奕个 gal game,內底上重要个女主角其實干焦兩个——真由里(Ma-iu-li̍​k​)佮紅莉栖(Âng-nī-se),佮其他女主角做伙个結局攏是時光旅行中个插路,你若停佇遐就佮伊做伙,繼續行就到別个路線,完全家己決定。真由里佮紅莉栖就無仝,你若無特別做啥,行到最後就是佮從細漢个朋友真由里做伙,若踮這个熱天行入紅莉栖个心,才有機會行著伊个結局。頭前有講過,《Steins;Gate》个選擇支是看按怎回手機仔个批,若回甲予紅莉栖對你有好感,伊才會寫批佮你參詳心內事,若無,故事到後壁真由里會寫內含意愛个批予你,簡單來講,若有行著彼个人个路線就看會著伊个情批(?),就袂有我拄才講个問題。
《Steins;Gate》畫面
  嘛是有寡 AVG 根本就無想欲予你揀,這種通常本身有誠完整个故事想欲共你講,有性格誠強个主角,《Fate/Stay Night》是其中代表之一。伊有三个女主角,但是規定你一定愛先佮 Saber 做伙,然後是凜,最後才是櫻,因為伊用三个戀愛故事欲講个是理想个三个層次,一定是先有理想,然後了解著愛行啥物彎路才會到位,最後發現原本个理想為著家己佮所愛个人干焦會當放棄。雖然按呢無當揀就無成電動,但是利用佮三个無仝人做伙个可能性,嘛是共戀愛 AVG 个形式用甲誠好。
  故事个完整佮耍者个自由定定是倒反,這嘛是 AVG 設計个趣味。
千晴
千晴
∮ 攪動暗黑鍋的一次元魔女 ∮ 本行:編故事 / 副業:修理人 興趣:宅到山上 home: http://1d-sorceress.weebly.com
留言0
查看全部
發表第一個留言支持創作者!