編輯嚴選

倒流著位無容易

　　恁敢有聽過「倒流」？

　　這是我踮絕望教師內底看著个概念，一本好看个尪仔冊一開始可能無蓋有名，若有一工予改做動畫片，就開始有足濟人是先看了動畫片，才去看原本个尪仔冊。這禮拜我開始看《咒術迴戰》，其實這本尪仔冊佇我「這世人總有一工愛看」个名單內底足久矣，一直到這馬動畫出來，閣聽講做了袂䆀，想欲追放送个時間來看一个，才緊來補尪仔冊，這敢有算一種倒流？

　　一般上來講，我是原作派，尤其是電動，家己親身𨑨迌佮用看个差蓋濟，毋過動畫片佮尪仔冊比，毋免動手較好配飯，這馬閣有「痟動畫」這種方便閣合法个所在會當看，就較有衝動欲拍開。毋過我嘛是會盡量先去看一下仔原作，但是彼陣看《鬼滅之刃》，尪仔冊看一半看袂落去，動畫就無看；《約定个夢幻島》是尪仔冊看了傷歡喜，煞貧惰閣看一擺動畫。

　　《咒術迴戰》一開始予我感覺就是普通个少年故事，對頭到尾攏咧相拍，我是看到釘崎出來才決定愛看落去，嘛毋是講特別佮意伊，但是看著一般故事二男一女个主角中，唯一个查某毋是作為查某个代表出現，是作為釘崎這个人，代表伊家己，按呢予我對這个創作者有信心。而且閣聽講動畫个節奏掠甲袂䆀，予我想欲看動畫欲按怎共一直相拍个部分搬甲較精彩。

　　目前尪仔冊我看到 31，動畫看到上新个​３​。感覺動畫開場袂䆀，一開始就共主角虎杖縛佇咧滿是符仔个房間，聽五條先生講伊已經予人判死刑，才來講是按怎會發生。有寡尪仔冊內底講過爾个部分嘛配了加強氣氛个鏡頭。毋過故事講甲比我想个較慢，毋知影拍算欲做偌久？我感覺至少需要半冬。