Siren
前兩工我轉去有 PS2 个舊厝，佮小弟做伙耍《Siren》，這个電動阮兩人已經耍欲十冬矣，彼是 2003 个電動，2005 出二代。彼當時我踮餐廳食物件，看著餐廳个雜誌內底咧介紹當時當出个《Siren ２》，看一下有夠佮意。
《Siren》个世界是按呢，天頂落著紅水，人沃著紅水就漸漸變做屍人，若有空喙吸收好，變閣較緊。屍人佮屍人鬥陣過𪜶个好日子，袂老閣袂死，有个屍人足家婆，嘛希望你佮𪜶仝款快活，看著你就來共你拍，予你緊死死去做伙來做屍人。
電動內底上特別个系統就是幻視，會當看著別人——佮別屍人——看著个視野，主要是欲予耍者覕屍人，但是嘛會當偷偷仔看屍人怹咧創啥，譬如講有屍人會看電視，有个會食意大利麵，有个咧摒掃⋯⋯雖然屍人踮電動內底是為著拍耍者才設計个，除了拍人嘛有家己个生活，我誠佮意這種設定。
頭前有講著，屍人袂老袂死，若耍者共𪜶拍予倒，過一段時間閣會爬起來，所以銃子踮這个電動內底是足有限閣無當抾个資源。毋過有武器應該愛偷笑矣，有个角色是國小个囡仔，予屍人驚一下就驚死矣，啥物家私攏袂當用。所以《Siren》个耍法通常是盡量莫拍屍人，會當覕就覕，會當共𪜶引予開就引予開，絕對無無雙這款代誌。
毋管是一代抑是二代，會當操作个角色攏有十外个，有時陣會行鬥陣，有時陣閣行家己。重點是，甲先生欲過一个門，可能愛乙小姐踮進前个關卡先提鎖匙共開。
中央有一關愛拍倒一个走足緊个屍人才會當過，阮用幻視共偷看伊走去佗，看著邊仔个狗屍人若卡牢，後來行去就看著狗屍人佮阮欲逐个屍人卡做伙。
設計 Siren 个外山圭一郎猶閣有設計其他有名个恐怖電動，譬如講《恬山崙》。伊最近離開 Sony，家己組工作室，嘛是誠濟人向望《Siren》佮《恬山崙會當踮這个新公司繼續出。
