世間上難是好好過日子
可能會食虧，可能會予苦毒。
萬不一予你所救个對象反背，做過个善事予人放袂記，失去家己辛苦建立个物件，最後干焦賰眾多冤仇人。 就算按呢，你嘛是愛好好仔愛人，好好仔做善事。莫驚食虧，愛去創作毋是破壞，愛原諒捌人，愛予絕望个人希望，愛予悲傷个人快樂。
然後愛保護弱者莫予壓霸欺負……就親像你為著阮去戰不死之神仝款。 ——《世界盡頭个聖騎士：死者之街个少年》
這可能是我這世人看過，寫甲上好个輕小說之一。
我本底無啥愛看轉生型个故事，若主角轉生去捌个世界，一世人活佇咧遐，嘛袂閣轉來咱个世界，按呢前世佇佗位敢有要緊？有个故事若像會予主角用咱个世界个智識，去遐完成捌人做袂到个代誌，但是文明毋是一个人就會當完整𤆬走个，有時我會感覺傷唬人。
這个世界盡頭个聖騎士前世是一个 NEET，小說內底無講著是按怎伊會成為 NEET，甚至完全無講著主角个其他過去，因為彼攏無重要，重要个干焦伊白白行過一世人个後悔，予伊決定愛好好仔活過新个這世人——我真正無看過遮呢拍拚生活个輕小說主角。
作者有寫著家己有咧耍 TRPG，感覺會著伊足骨力解釋角色是按怎變強，若像有一个 DM 咧共電。主角威廉（Ui-liâm）對紅嬰仔个時就予三个身懷絕學个「人」抾著，第一集大部份个時間攏咧看威廉按怎學習，除了訓練體能、了解智識佮魔法，閣愛學按怎生活。
……換話講就是莫等馬勒（Ma-li̍k）交代，愛掌握著款內頭个先後，考慮著啥物代誌是必要，而且佇馬勒出手進前先做予好。無想到這誠難。
我頂改看著主角學按怎款內頭，是佇《昭和少女傳奇》，主角是日本戰前个少女。這款對人生遮呢重要但是定定予人袂記个代誌，看著一个傳奇故事中遮認真講著，我感覺袂䆀。
我一開始抄个彼段，是威廉欲離開共伊晟養大漢个爸母進前，伊共當做阿母个馬勒留予伊个話，我家己感覺嘛是這个故事个中心思想。來到第二集，威廉若拄著歹決定个代誌，嘛會定定想著阿母講過个這話。按呢看起來，這个故事有夠正向，無怪主角會做聖騎士，但是這種正向是知影世間烏影了後，家己猶是堅持行佇正路个正向。
第二集一開始有一段予我印象誠深，威廉發現家己拄熟似个人𤆬一大陣人去做土匪，伊共阻擋了後，才知影𪜶个庄頭予怪物破壞，才來搶物件食，𪜶予掠著了後，險咧予搶个遐人決定共遮土匪刣刣掉，雖然𪜶可憐，但是放𪜶走，𪜶若毋是枵死，就是閣去搶捌人。最後威廉按怎解決，就請逐家家己看。
分享至
成為作者繼續創作的動力吧！
© 2024 vocus All rights reserved.