編輯嚴選

來看我个 CCC 冊櫥

　　這禮拜臺灣 ACG 界上烘个討論應該就是 CCC 欲收起來个傳聞。CCC 个全名是「Creative Comic Collection 」，一開始是中研院踮 2009 年為著欲共𪜶收藏个資料展示予國民了解，煞揣著用尪仔冊个方式，彼陣是做紙本个季刊，2015 年捌收起來，2017 年閣月刊重啟，到舊年開始做電子版，規个方向大改，變做尪仔冊為主，無一定愛佮文史、博物有關係。

　　到底 CCC 網站欲斷欲留佮，我嘛毋知，這个專欄嘛是先來介紹尪仔冊。較早紙本个時代，因為逐本買厝裡貯袂落，我就無咧綴連載，看著有興趣个尪仔冊，攏是等甲出單行本个是才買，電子時代雖然綴連載較方便，嘛是存一大堆冊佇 app 內个冊櫥攏無看，所以今仔介紹个會以有出單行本个為主。

　　守娘就是陳守娘，逐家應該有聽過个臺灣上強女鬼，本成女鬼就是咧反應古早時代查某人个悲哀，這本尪仔冊是用現代个觀點閣來畫一擺這个故事。會知影這个畫者是進前看著伊同人販賣个原創作品，彼陣就誠愛伊个圖，《守娘》个清代背景予伊會當畫足濟穿大襟衫个查某人，干焦看這就誠有價值。

閻鐵花 / 常勝

　　這本一開始講實在嘛是為著圖看个。常勝進前有踮東立出過一部《baby.》，我若像有買過一本抑是兩本，故事袂記矣，毋過這擺看著閻鐵花煞氣个面，就感覺我一定愛買！看了感覺故事嘛誠有意思，三十冬前一个家庭劇團予人規家伙仔刣了了，唯一存活个十五歲查某囝予國安局掠起來，了尾死佇一間研究所个爆炸，三十冬後个這馬出現一个用伊个名、畫伊个妝，實況刣人个殺手，當年辦案个警察已經退休變酒鬼，閣予這馬个警察揣來調查，相拍佮懸疑濫做伙个故事。

不可知論偵探 / 鸚哥洲（鸚鵡洲）、 薛西斯

　　古早做工程个人，為著工程順續，會揣一个羅漢跤來奉待，予伊食好穿好，了後共刣死——看著咧講這種風俗就知影是我會佮意个故事，而且閣是偵探故事，就毋免加介紹矣。佮頭前介紹个其他尪仔冊無仝，《不可知論偵探》个原作是薛西斯个小說〈珊瑚之骨〉，《不可知論偵探》是內底主角海鱗子過去个故事，聽講是鸚哥洲欲畫偵探故事，編輯才去揣著薛西斯來合作，目前臺灣原作佮畫者分開个尪仔冊若像猶閣無蓋濟？

這三部尪仔冊目前攏猶未煞，《不可知論偵探》算講是單元劇，但是《守娘》佮《閻鐵花》故事才講一半，希望會當順利。