開出家己ê彼蕊花

承載希望ê花籽， 細膩細膩按呢種落土裡。 Leh種別種花ê人 三不五時來khau洗， 笑講這蕊花無路用， 不如kā薅[1] 掉。

我笑笑無beh kā應， 因為我知逐家目標本底就無kâng， 隨在伊去講， 代誌suah無hiah-nī簡單就過去。

Beh種kâng種花ê人mā行來--ah， 勒著目眉[2] 指指揬揬—— In講， 沃水ê角度毋著， 曝著ê日光無夠， 開出ê花一定無夠紅、無夠芳。

我徛踮路邊恬恬leh想， 若beh hōo花蕊開佇koh較濟所在， 敢毋免kā種法試驗、改良？ 毋koh對in來講， 原來小可ê無kâng， 就是「beh kā這種花創死」？

無論啥物所在， 攏用kâng一套心內「上好」ê種法， 毋管氣候， 毋管土質， 敢誠實會開hōo好？

這个世界， 在來毋是kan-na “suí” kah “bái”， 亦無可能毋是上光就是烏暗。 花蕊ê色水百百款， 咱人呢？

註解 [1] 薅，讀作khau。中文意思：從土中拔除花草類的植物。 [2] 中文：皺著眉頭。