風劫－尾聲

一下踏入門，康四海看著某囝，雄雄一陣鼻頭酸，兩港珠淚勻勻仔流落來，共怹攬牢牢。

「過去矣，一切攏過去矣。」

聽著翁婿按呢講，康夫人才真真正正笑出來。

邊仔的使用人看著頭家一家團圓，攏非常歡喜，雖然才分開半工偌，感覺起來，煞若像過了幾若年，今暗會當有這種結局，實在使人安慰。

這時，康四海雄雄想起一層代誌。

「阿山？阿山的屍體咧？」

「老爺，阿山的屍體我已經喊人共伊囥佇柴房，嘛替伊設一个簡單的靈堂。」康夫人含淚，看伊的翁婿，「一切就等你轉來發落。」

「好，真好……」康四海共牽手的珠淚拭掉，「阿山綴我上久，幫助我處理真濟代誌，咱愛好好送伊最後一程。」

兩人相對看，喙笑目笑，互相頕頭。

「姨仔，我腹肚枵矣啦！」怹的大漢囝目頭結結喝出聲。

「姨仔，我嘛是。」聽著大兄喝，小弟嘛綴咧喝。

一下聽著囝兒喝枵，康四海共康夫人忍不住笑出來，隨𤆬怹兩个做伙去食飯。

食完飯無偌久，康四海就感覺真忝，入房欲來睏，也看著康夫人共查某囝抱予奶母。

奶母走後，兩人就隨倒落睏矣，一時仔就睏去。

平靜的暗暝，冷冷的月光，康四海那睏那齁，身邊的牽手也睏甲真甜，一切是遐爾仔安祥，一切是遐爾仔美好，經過生死劫的暗暝，所有的人攏咧做一幕閣一幕的美夢，煞無想著一陣凍人心骨的寒風雄雄吹入窗。

「老爺、夫人……害矣啦！」

康夫人代先精神，聽著對房外傳入來的聲，若像奶母的聲，心中一下驚，驚是查某囝出代誌，緊起床來看覓，煞共康四海舞精神。

「老爺、夫人……害矣啦！」

聲音愈來愈近，確定是奶母的聲音，康四海也聽甲真清楚，緊共康夫人行出來看是啥物害矣。

奶母目屎是雙港流，猶袂講話就先跪落磕頭。

「到底發生啥代誌？」

「小姐……」

「小姐按怎？」康夫人喙那顫那講，「講！」

「小姐無去矣……」

一下聽著查某囝無去，康四海佮康夫人隨衝去奶母的房間，看著搖籃仔恬恬囥佇遐，倚去看，搖籃仔內只有一領毯仔囝。

康夫人看著這種情形，心內真著急，目屎一直流落來，愛翁婿趕緊想辦法。

康四海目睭金金看，搖籃內的毯仔囝，愈看是愈怪奇，敢像有寫字，一下提起來詳細相，雄雄吐大氣，嘆一聲，馬上傱出房間，也毋管某按怎咻，兩跤無停，走出大門，兩蕊目睭對正爿掃去倒爿，看來看去，啥物攏無看見，四周圍攏是暗漠漠，焦月光照著所在有淡薄仔光光。

附近的貓仔聲，微微仔響，聽入耳，康四海忍袂牢流落兩逝珠淚，看著手中的毯仔頂面彼一字，伊雙跤一下軟，尻川頓落，坐佇塗跤，恬恬仔那哭那搖頭。

這時，康夫人嘛逐到位，看翁婿坐踮塗跤，緊咧倚過。

「老爺……」

「夫人……」康四海無話通講，共牽手攬咧，直直哭。

「老爺你莫煩惱，明仔天光，咱派人去揣都好矣。」

「免揣矣……」

「按怎講？」

康四海閣看一改毯仔頂面的「風」字，就共一切攏講出來。

「風自我放我落山，我想講一切攏無要緊矣，伊無欲共我計較我無保守秘密的代誌，啥知影，伊也是無放我煞，抱走我的查某囝去拄數……」

「咱會使報官去揣？」

「免矣，伊的功夫，毋是你喝欲揣就揣有的，就算報官也是無效。」

「那按呢……咱的查某囝？」

「唉……」康四海慢慢徛起來，目屎拭一下，「只好求神明保庇伊平安大漢……」

康夫人聽著按呢，哭甲珠淚直直落。

康四海伸手幔過康夫人的肩胛，將伊攬入懷中，兩蕊目睭看月娘。

「月娘啊，請你疼惜阮的查某囝，予伊無災無難來大漢，早日轉來阮身邊……」

康四海對月娘訴出心意，珠淚恬恬滴，心內雖恨風自我，共數算佇伊的查某囝頂懸，只是這馬閣較按怎怨恨，嘛攏無意義，人海茫茫，天地闊莽莽，更加免講風自我來去一陣風，無可能揣著風自我的行蹤，伊愈想愈絕望，只好暗中向望風自我會使好好對待伊的查某囝，除了按呢，已經全無步。

一陣風吹來，捲起落葉，一片一片。

「咱好入去矣，較免寒著……」

康四海攬著牽手勻勻行入去了後，兩扇大門也漸漸關起來。

這時，一个人影對厝頂跳落來，徛佇月光照著的所在，手中抱一个嬰仔，越頭，對大門笑一下，然後，走若飛，隨風消失。

＝完＝