【拄著代誌愛冷靜】（台文）

阮老pē自細漢就定定佮阮講：「拄著代誌愛冷靜」。這句話確實無毋著，但是偏偏阮兜一家伙仔脾氣攏是歹性地。

便所水道頭的樹奶歹去，透早老bú叫老pē緊去處理，老pē落去樓跤水電行買零件了後轉來開始動手。

不知是天氣傷熱，亦是老bú佇邊仔囉嗦的原因？舞一睏我佇客廳就聽著老pē的聲音愈來愈大聲，口氣愈來愈歹……舞煞伊家己惦惦坐佇膨椅看手機仔。

過了一睏仔，

老pē：賊～啊我水道頭創好啊，妳攏無佮我鼓勵鼓勵（*）？

九：啊你phí phé叫，我是袂按怎佮你鼓勵鼓勵？

老pē：……

擱過一睏仔逐家正常講話時，我刁工對老pē講～

九：拔～咱拄著代誌齁，愛冷靜。

老pē：妳莫佇遐龜笑鱉無尾啦！

那是按呢看起來，阮兜一家伙仔，毋是肖龜就是肖鱉！

好啦，天氣遐爾（hiah-nī）熱，食冰退火啦！

（鼓勵：拍手👏的那個愛的鼓勵）

如需要華文翻譯，再請舉手🙋‍♂️