第七章：「紫黑氣息」

過了一會，待啊水整理思緒過後，黃公公便著啊水進入自己的寢室內。啊水進入寢室後，只見黃公公的書櫃被推至一旁，接着黃公公對著原是書櫃的位置注入氣息。突然，有一暗室出現，走進去，則有一條長長的間道。一邊走，沿途都逐一亮起了昏暗的黃燈。

「頭先我講咗咁多比你聽，都係為咗等你明白你『異』同『常村』。」黃公公道。

「雖然我仲未接受到，但的確，我嘅黃色之氣點練都係比唔上其他同齡嘅人。」

「係，咁係因為你未認識到自己真正嘅能力。我本來係想你過返一啲平常人嘅生活，但係你依家面對嘅、所知嘅，都唔容許你過依種生活，所以我要帶你去一個地方，但要少少時間，你仲有無嘢想問我？」

「係黑衣人攻擊我嘅時候，佢哋提到紫黑氣之氣同最後我背脊出現『水藍眼』保護咗我，究竟咩嚟？」

「紫黑之氣，我哋『常村』有兩個人有依種氣息，但一個死，一個無可能會救你，所以應該有啲嘢搞錯！而『水藍眼』其實係有個叫藍光嘅男人係你仲係BB嘅時候注入你體內嘅，希望係你危險嘅時候救你一命。而藍光係我哋村『二英雄』之一，佢係你BB嘅時候救咗你一命，或者咁講，延續咗佢啊哥紅光嘅希望，歸根究底，你無評級，其實都係因為紅光係臨死前注入佢嘅氣息係你體內，為咗保護你，為咗保護佢啊哥嘅希望，所以注入咗『水藍眼』係你體內！」

「紫黑之氣、常村、異、紅藍光、水藍眼……好複雜……不過我最唔明嘅，點解我哋無做咩傷天害理嘅事，都要追殺我哋？」

「就係依個社會唔合理嘅地方……」說完這句話後，兩人前方慢慢出現白光，走到盡頭之時，啊水望向眼前的景象後，雙腳駐足，目定口呆起來。