不專業講影視漫（一）
不專業講《野驁射手/踢出我天地》
1. 講過新一年會嘗試寫多啲唔同既嘢，其中一樣係影評、劇評、書評、漫畫評等等。前兩者都幾花時間要去睇，而家仲係好忙暫時未得住，遲啲可能會多啲時間，咁就到時先算，不過後兩者就相對易小小，去廁所、做家務、返工都可以偷到小小時間出黎睇幾頁。
2. 第一次寫呢啲評論，寫得唔好屌細力少少，唔該。
3. 為咗幫自己既小說取靈感，其實我係好多唔同類型既作品都會睇，但其實就漫畫黎講，我最鍾意睇既其實係好似《Slam Dunk/男兒當入樽》呢類既熱血體育作品。最好就係足球喇，我夠熟吖嘛，但其實只要係大路小小既運動做主題我都OK既，最緊要我知道啲人響度做緊咩，好似《排球少年！！》呢啲我都OK。
4. 《野驁射手/踢出我天地》其實都已經係一套幾舊既作品，我細個就已經聽過呢個名，但因為見到作者既名，諗緊係咪另一套超自然既體育作品，所以一直都未開始睇…
5. 冇錯，個作者係高橋陽一，將《足球小將》入面既足球描述到好似神仙打交咁…雖然足小係經典，但睇睇下都唔想再睇落去了。
6. 直至早幾個月，響讀者TG group入面同其中一個巴打吹水，佢話《野驁射手/踢出我天地》係一套好好睇既作品，所以我早前都睇咗呢套漫畫，其實又真係唔錯既。
7. 先旨聲明，下面可能會有劇透，大家如果驚既話請迴避一下。
8. 我睇既係漫畫版，同動畫我估應該有唔少出入，不過大致上劇情既走向應該唔會爭太遠既(我諗)。
9. 《野驁射手/踢出我天地》既主角係一個叫做葉恭介既少年，一頭橙髮，成日打交既不良少年。不過佢本身並唔係一個咁既人，佢本身係一個熱愛足球既少年，有一個日本足球界超新星哥哥，效力緊AC米蘭既葉成介，但響中學既時候因為知道咗自己同哥哥並冇血緣關係，又因為啲人成日拎自己同哥哥比較，所以響一場比賽入郁手打人大鬧球場，之後就退出咗足球界。
10. 退出咗足球界之後佢成身既精力無處可以宣洩，唯有周圍打交，做咗不良少年，然後因為一次意外，比城陽茜丘高中足球部經理人森一人執到佢既學生手冊，從而知道咗佢就係葉成介既細佬。
11. 之後既劇情，寫出黎好似好老土，其實都係講葉恭介點樣響啲隊友同埋朋友既幫助下，逐漸進步，然後最後響友情同埋愛情都兼得既情況之下，勇奪全國冠軍，然後去埋阿積士做職業球員。
12. 睇落係老土架喇，但其實大部份體育既漫畫都係咁，響追看緊既時候就會睇到好熱血，加上高橋陽一描寫果對新生三人組既時候都寫得幾立體，各自都背負唔同既故事，呢啲情節其實都認真唔錯。
13. 只係同高橋陽一既成名作《足球小將》唔同，呢套漫畫既節奏快到痴線，中間某啲成長經歷就只係輕輕咁一、兩集帶過，尤其是個巴西中場羅杜里哥同埋混血龍門公司先生，佢哋中間經歷過一啲艱難既經歷差啲要離開球隊。唔係話要拖好長，但交待得真係有啲快。
14. 不過整體而言，成套作品都算係一套好唔錯既作品，節奏明快，6本搞掂，比賽入面見到球員們既成長，雖然講葉恭介真正既爸爸係邊個、校醫堂本香織係主角哥哥男朋友呢啲情節有啲韓劇feel，但overall黎講真係值得一睇既。
15. 下次再睇下有咩作品想同大家講。
更多專欄內容︰ https://vocus.cc/salon/leafopenleafopen
#漫畫評論 #讀後感 #野驁射手 #踢出我天地 #飆悍射將 #野狼前鋒 #高橋陽一
#漫畫評 #漫畫 #中文 #日漫 #足球漫畫 #足球
廣告時間 -
ig: leafopen3instagram.com/leafopen3
fb: leafopenleafopenfacebook.com/leafopenleafopen
方格子 https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
