校園重遊：以為是喜，原來更傷感

母校玫瑰崗學校至term end 就停辦，23號係最後一次Open Day, 幸好表姐通知，否則錯過了一定會好可惜。自小學畢業後都未返過去，懷住好興奮好興奮心情返去。

學校安排左校車喺灣仔上車，想當年校車車隊非常有氣勢，想起當年如果做到車長就好威，可惜無論prefect 定車長，班長都未做過，一直都係一個 nobody.

到達學校時都有啲迷惘，學校分幼稚園，小學，男中同女中部，大約記得去小學嘅方向，到達左最想去嘅操場時，嚇然覺得個操場細左好多，以前一級由A至M班至少十班，一班有三十幾人，就算係分上下午班，每次早會都有成千人，咁細個操場當日點容得落？

上到班房亦好似細左好多，點解啲嘢同記憶咁大落差？仲有個library點解完全無印象嘅？嗰刻覺得自己好對唔住自己嘅記憶，點解童年咁重要嘅光陰會唔記得左？

其實好多嘢好似架校巴咁，車仲有，但完全唔係我以前坐嗰款。我怕睇以前嘅家庭相，有老嘅中年嘅同年青嘅都離開左，睇住啲相，覺得現在就好似一幅puzzle無左幾塊，無論嗰塊幾唔起眼，個puzzle都已唔再完整。亦有啲地方每次去都會心戚戚痛，我唔想去諗，但感情係一種反應，就好似天氣冷人就覺得凍。我無法預告某個情緒會出現，所以無法去預先阻止。