［性別講看覓］—跨性別５：無手術換證

台灣有人佇捒這个政策：毋免手術就會使換證，其中代表的一个社團是「性別不明關懷協會」。

In認為，身軀頂懸的器官攏是家己的器官，伊家己無無愛，毋願為了改變證件頂面的性別共遐仔器官割挕捒。猶有一寡仔人，in有當時仔認為家己是查埔，有當時仔感覺家己是查某，無一定，就是「非二元性別」，無法度選一種性別。

幾若工進前，我看著新聞佇寫，德國已經實施免手術換證，新聞佇下跤註１。台灣猶有誠遠的路愛行。

協會內底有一个社員朋友，伊共我講：「若無查埔佮查某的框架，就無需要改變性別，跨性別矣！」

譬喻來講：有的查埔想欲穿裙佮懸踏鞋，抹粉點胭脂，因為查某才會使按呢做，伊想講伊愛改做查某才會使做，當然想欲做查某的人不只這仔理由爾爾。因為社會中有一寡規定佮框架規定查埔會使做啥物，袂使做啥物；查某會使做啥物，袂使做啥物，想欲做彼件代誌的人就愛變成彼个性別才會使做，按呢講來，變更性別的理由嘛誠譀。論真來講，只要逐家想欲做啥，攏會使去做，毋免看伊的性別，就毋免遐爾麻煩去變更伊的性別。

註１ 德國立法保護性別認同 變更性別不須醫師評估

註２ 鍾明軒。唱歌彼３个攏是伊。

註３ 這是鍾明軒的面冊

https://www.facebook.com/ZhongMingXuan

伊是查埔。進前伊家己拍的生活影片，出門踅街仔路，攏會化妝，喙唇抺胭脂。表演的時陣，查埔頭鬃，穿裙；伊想欲按怎打扮就按呢打扮，無佇講是查埔款，抑是查某款，伊甲意的打扮佇伊的身軀頂面攏會出現。