「錢有收到無？」一句嘛無問

一、央朋友帶錢予囡仔

我有一个朋友，伊的老爸車禍，無張持過身，伊高中畢業，無閣讀冊，隨去賺錢。伊是上大漢的，抑有３个小弟。

老爸過身的第２年，伊的老母想欲賺較濟的錢，咧朋友的鼓勵下去日本做工課。厝內面予我的19 歲的朋友照顧。

伊的老母去日本11年，干焦去的第２年轉來一擺，毋捌閣轉來。老母央定定佇日本、台灣走來走去的阿姨共伊賺的錢紮轉來予我的朋友，毋過，阿姨無交予我朋友，閣共伊講，伊的老母佇日本跋筊欠筊錢，予伊不敢問較濟的話，煩惱伊的老母佇日本有危險，「依然對這位阿姨畢恭畢敬，心裡指望阿姨有天可以將母親平安帶回台灣。」

伊逐個月的薪水，愛還伊的老母去日本前標會仔的錢，佮厝稅，賰的錢無若濟，定定愛共同事借錢。２年後，伊的二弟高中畢業，開始賺錢，經濟壓力才無彼緊張。

「我和弟弟知道阿姨回國，去她家，她只給我們日本帶回來的巧克力，完全沒給任何現金。那時候看到阿姨家全是舶來品，羨慕她很會賺錢。沒想到原來都是侵佔母親辛苦賺的錢換來的。」

伊老母上尾轉來台灣了後才知影，隨衝去彼个阿姨兜，「阿姨打電話來，說我媽瘋了，叫我去把她帶回家。」

我看伊寫的，心內感覺足艱苦，國際電話貴，會使講幾句就好；厝內若無裝電話機，敲予朋友、厝邊仔，請朋友傳話；寫批講嘛會使。因為信任朋友，一句攏無問過：「我央阿姨紮轉去的錢，你有收到無？」害in過甲遐艱苦。是誠條直、信任朋友，抑是無想遐濟？

二、吩咐伊的某予後生錢

我的朋友講，伊的大家、官欲搬去中部進前，共台北的一間厝賣掉，大宫吩咐大家予後生佮查某囝一人５百萬。

厝內面的錢是大家咧管的，這５百萬大家無予後生，共錢家己用掉。伊的大官嘛誠奇怪，後生定定轉來厝，拄著，一句：「我吩咐in老母共賣厝的錢予你５百萬，你有收到無？」嘛無。

落尾疫情期間，in翁仔某的頭路攏無去，手頭賰的錢用完，無錢，翁去共大家借錢，大家講伊無錢，借in一萬箍，我朋友氣甲對伊翁罵：「你／她將我們的小孩當大便嗎？」

大官進前賺真濟錢，足好額，予大家烏白亂開，開甲這馬無錢，我講彼是足恐怖的代誌，２个老歲仔將來若有影無錢，敢講我朋友in翁仔某愛鬥出錢？in２人閣加２个囡仔，家己的生活就忝死矣！

這２个攏是，話講出喙，想講人會照伊講的做，連事後「確認」的動作嘛無。知影無提的時，攏是幾若年了後的代誌。