寫字（五）

倪匡曾經講過，「賣文不及買酒錢」。咁當然，如果倪老先生飲嘅係路易13或者The John Walker的話，就算以佢老人家嘅一字千金，要餐餐飲的話都可能有難度。

要賣文賣到買得起The John Walker嚟飲當然唔容易，但係要賣文賣得好價錢少少的話，其實唔難；如果你肯連埋少許尊嚴一齊賣的話。

我講緊做公關。

寫字呢項技能並非晉身公關業嘅首要技能，喺你求職時甚至乎係HR要求嘅末項技能；但係當你入職後，你會發現，其實公關業都係一個賣文嘅行業，只不過要連埋尊嚴一齊賣，好似你喺街市賣菜要搭條蔥一樣。

試想像，當你個客連一個pitching email都要vet嘅時候，你仲夠唔夠膽賣弄你嘅「I go to school by bus」級數嘅英文？

再想像，當你正在努力嘗試，喺個PR plan入面，用三千字兼海量Marketing術語去解釋一個你和同事們喺brain storm meeting中隨便湊合嘅所謂「絕世idea」嗰陣，「字到用時方恨少」其實先係你嘅umbrella message。

我諗，無任何嘅公關界鉅子巨擘，會用「賣文」嚟形容公關行業；起碼戚其義當年拍『珠光寶氣』都只不過係話你知，識扭好個花牌、識chit-chat同識冧客就係公關嘅材料，你識唔識寫字，阿差知咩！

但當你面對住每日平均200個email、公關稿、MC稿、無數嘅PR plan、開會/訪問嘅recap、news clipping嘅synopsis report，每周/每月/每季/每年嘅account report等等等等，對比起出event做穿花蝴蝶面貼面影selfie，寫字其實先係你嘅主菜。

幾年嘅公關生涯中，我寫嘅字絕對唔會比幾年嘅記者生涯來得少；只不過對像唔同，論對文筆嘅要求，公關更可能喺記者之上。

起碼，我做記者當年，就唔需要客客氣氣咁寫一封邀請函；我相信以現今香港高等教育嘅水平，未必有好多人可以寫張兩文嘅請柬而無甚錯處。

喺香港，無論傳媒從業人士同客戶，都喜歡貶低公關嘅作用，好多中小企嘅老闆甚至喜歡將「公關之嘛，我都識做啦」之類嘅說話掛喺口邊。

我其實好喜歡呢種想法。

試問，無呢啲咁嘅人去諗啲咁嘅嘢，然後自製公關災難，我呢啲「無乜用」嘅公關，又點會有錢賺？

（待續）