Fate/Grand Order & 募戀英雄
今仔我一下班就有一項重要个代誌——欲來抽這張卡。
抽卡——踮現代手機電動內底是一个誠重要个趁錢方法，甚至足濟人講著手機電動就會想著抽卡，前幾工我看著這篇咧講《曠野之息》佮《原神》个文章，內底寫著一句：
《原神》是用手機電動定定用个商業模式，設計無必要个無方便佮痛苦來增加玩者課金个意願，而且用通關、拍贏 boss、入去新个區域來當做課金个獎厲。——《原神》上䆀个毋是抄，是希望你感覺伊有抄
換巧機仔了後這五、六冬，我嘛奕過袂少手機仔頂懸个電動，但是除了若單機个電動，會當一直耍落去無蓋濟，目前有咧耍个就 FGO 佮募戀英雄，若講著「設計無必要个無方便佮痛苦來增加玩者課金个意願」，我感覺 FGO 算較少，募戀英雄差不多算無。
FGO 上好用个萬能輔助「諸葛孔明」一開始就有當抽（雖然了後無偌久才變強），到這馬台灣版第三冬，嘛是足好用；江湖人稱金鑠鑠个「Gí-lú-ka-muí-siu̍ｈ」是誠強个全體拍手，嘛是開始到這馬猶閣袂輸人。而且 FGO 時不時會加強（？）角色个機能（毋過最近若像有人予改歹去），毋但較歹抽个五星角色會改，人人攏有个一星至三星嘛有 機會改，袂講「一代魔神一代強」，予你無抽新个就袂當奕。
按呢 FGO 欲按怎趁錢咧？嘛是抽卡，咱先來看這位小姐你欲抽毋抽：
伊是 FGO 日本版上新活動个五星角色，傳說中邪馬台國（Iá-ma-tâi kok）个卑彌呼（Hi-mi̍h-khōｏ）王，看著這个人、這个面（猶閣有這个奶），毋管機能按怎，我就是想欲欲，雖然台灣版閣愛等三年。
對角色个愛，定定是 oo-thah-khu 上大个力量。
募戀英雄个卡閣較無路用XD，雖然叫「英雄」，消珠型个電動嘛是靠家己較實在，定定角色徛佇咧邊仔，但是我耍甲強欲共放袂記。
雖然講無路用，毋過為著這个人，我嘛是一直抽就是矣。
而且，募戀个卡毋但有機能，上重要个是有故事，你若想欲了解家己佮意个角色，就愛抽卡才有法度看伊个故事，這會予人財產敗了了，毋是咧講耍笑，莫怪朋友講這就電子牛郎店XD
我唯一想著用「無方便」予玩者開錢个就是，伊个活動需要一直耍仝一關來得分，若有紮彼回當咧抽个卡，分數个較懸。
除了開錢以外，營運嘛希望玩者盡量開時間佇个電動，想欲看著家己佮意个角色絕對是一个真好个理由，手機電動佮單機無仝个所在猶閣有，若無倒就會一直有彼个角色个新物件，予你繼續維持感情，所以我認為手機電動（抑是 法差不多个網頁電動），是上好賣角色个方法之一，這是單機做袂到个，就愛好好利用。
