投稿人：少年ＫＥ ／投稿類型：文學創作
我是陣頭囡仔，我對家己ê身份感覺驕傲。
台灣ê信仰文化是真普遍，規年迵(thàng)天四界lóng有廟會thang看。Tī 廟會內底，陣頭是上kài重要ê角色。雖然伊ê重要性真懸，毋過社會對阮陣頭人ê印象猶原lóng是「陣頭囡仔就是歹囡仔」ê這種看法。Tī 台灣確實有真濟ê宮廟kap陣頭是由有烏道背景ê人來管事，毋過這並無代表弄陣頭--ê lóng是歹囡仔。
斟酌(chim-chiok)來去熟似咱這馬當(tng)時行ê陣頭文化，會當發覺到對較早已經lóng無相仝，台灣ê陣頭寬寬仔變做是台灣人文文化ê象徵之一，mā是上會當代表台灣精神ê文化資產。
我弄陣頭雖然才十gōa年，毋過陣頭囡仔ê這个名早就已經是我對人生ê解說(kái-sòe)，mā是我上大ê驕傲。自囡仔時，逐禮拜上期待ê就是會使來去tong-tong-chhai順紲趁一寡所費。扛起尪仔、拍著鑼鼓，用盡所有氣力去表演，毋但是為著服務神明，koh較要緊ê是ài妝好家己ê角色。隨著年歲沓沓仔增加，彼寡尪仔早就已經裝袂落。雖然無法度koh繼續弄尪仔，毋過陣頭ê種類有百百款，我提升家己ê能力，變做是扛著轎擔、踏著跤步替神明做跤力ê轎夫。因為扛轎ê關係，阮ê肩胛頭定定lóng是腫oaiⁿ-oaiⁿ袂輸雞胿仔(ke-kui-á)仝款，毋過對阮陣頭人來講，這是上幸福ê代誌，mā是主公予阮尚甜蜜ê負擔，更加是咱陣頭人上珍貴ê khăng-páng。
弄陣頭，是我上愛做ê代誌，mā是我這世人無可能放捒ê興趣。陣頭、廟會就親像是我性命ê一部份，因為tī內底走跳，我ê生活有誠濟kap別人無相仝ê體驗，甚至我會曉講台語、會曉按怎去和別人pôaⁿ-nóa也是踮這个環境中學--著--ê。
認真來講，我會選擇來到台文系有真大部份ê原因是因為廟會對我ê影響。廟會、陣頭陪伴著我將近欲二十冬，伊教我就ài認捌著咱台灣人家己ê台灣文化，也鼓勵我ài繼續tī廟會界內底拍拚，甚至是予我有一个會使完全放輕鬆免去煩惱生活壓力ê所在。
陣頭tī台灣已經有上百年ê歷史，伊ê存在會當講是台灣人對家己ê生活、宗教信仰ê表現kap虔誠。陣頭ê產生kap人民ê生活有足密切ê關係。用臺灣上傳統ê「Tak 牛陣」做例，藉著兩隻牛kap農民之間ê sio-tak，表達出過去農民放牛食草互相相爭地盤ê狀況。In 真實在leh 演出這種古早農村ê模樣，予後代ê台灣人會使看著台灣農業時代ê生活。陣頭就親像是一本有性命ê歷史仝款，伊記錄著台灣tī無仝時期ê人民，in ê生活情形以及in 對信仰ê虔誠。一場廟會若是ài鬧熱，陣頭是絕對袂使落勾去。伊毋但代表著彼間廟ê能力，更加是反映出咱台灣陣頭文化ê地位。
「用陣頭去看台灣」是我一直以來看待咱台灣ê方式，也是我想欲推捒(thui-sak)予koh較濟人知影ê觀念。踮咱台灣上蓋幸福ê就是陣頭ê存在，廟會ê舉行lóng是真民主自由。生活tī台灣一片土地，有誠濟無仝ê角度會使去熟似咱台灣。長期以來，陣頭廟會文化tī逐家ê心目中敢若無法度當做是代表咱台灣ê文化之一。毋過斟酌去看，tī廟會當中大部份使用ê語言lóng是咱ê母語：台語，而且誠濟ê陣頭表演lóng是上會當代表著台灣數百年以來ê社會生活。
台灣ê特色算袂清，但是身為正港ê陣頭囡仔，我真希望逐家會使將陣頭廟會文化當做是咱台灣ê一份子。台灣ê陣頭文化是獨一無二--ê，伊所展現出來ê毋但是台灣人對生活ê解說，更加是表現出台灣人上特別ê所在。
我是生活tī台灣ê陣頭囡仔。
【寫流成河】讀者投稿專欄
【寫流成河】為刊登讀者投稿的專門欄位。作為本期《開講Khai-káng》的壓軸系列，為的就是鼓勵台文系學生嘗試寫作——我們認為，持續書寫不僅能夠精鍊筆鋒，更是梳理思維與觀點的必要途徑。 《開講 Khai-káng》期許你我在這條思想與對話的長河中，能透過文字留下清晰可見的刻痕，讓河的路徑不只是靜靜流過，而有粼粼波光。
【寫流成河】是專門刊登讀者投稿ê欄位。這个專區成做每期《開講 Khai-káng》ê煞尾，是為著鼓勵台文系ê學生來寫作——阮認為，不斷ê書寫m̄-nā會當磨練文筆，koh是整理思維kah觀點ê必要途徑。 《開講 Khai-káng》期待大家tī這條思考kah對話ê溪流內底，會當用文字刻下一痕koh一痕ê記錄，予溪水毋若是恬恬leh流落去，koh閃爍著淡薄波光。
