上天已安排了我步入修練的路！

前言:我的故事，就由2001年開始說起吧，其實自小巳發生多次靈異奇怪經歷！都是上天給我安排的啟示要我行的路，故事較長篇，多謝梁師傅給予此平台小女子！希望世人能明白一D無意義嘅事不要輕易去做，不要盲目去拜神相信坊間神婆神棍，只有通過實際的行善績德，正確的修練，才能改變命運！

大約2001年，在元朗木橋頭村弟弟家住了半年，佢娶了老婆，大家一起住唔係咁方便，我們一家又要搵屋搬了，在同村租了一個地下連花園單位，由於以前經常家宅不寧，我去元朗某紙紮舖請了尊觀音回家，個老細話幫我開埋光，諗住從此再没有靈界朋友可以入到屋。
住左約三個月左右，認識了附近一個鄰居，叫阿微，住隔離座二樓連露臺，我們經常來往，有一晚去阿微家吃飯，我個仔當時二歲左右，我又陀住细女，吃完飯閒聊時，我個仔首先不停指住露臺出面，之後個樣好害怕咁伏在我身上，唔敢望，後來又望向露臺，跟住直頭驚到喊話要走，我同阿微都知佢應該見到嘢，咁我就抱住佢返屋企先，當時的我亦身懷六甲！，
返到屋企，心想有觀音坐鎮唔洗怕，開電視睇，點知部電視睇睇吓，突然在畫面左上角出現左一個透明的青綠色影，我熄電視隔一會再開返，個撻影都在，我唔理佢，當時決定明天一早去找紙紥舖老細。
第日朝早，開着電視都係咁，我同老公都見到左上角嗰達青BB嘅影，我地唔知究竟係電視機壞了定其它原因，我出左元朗同纸紮舖老細講晒昨晚發生的事，(我個觀音係佢開光，佢梗係唔會話自己唔得)，佢解釋話隻鬼一定入唔到我屋，是在阿微家想跟隨我返屋企，點知入唔到，咁啱走左去屋外天綫度，所以攝住左干擾左電視，即係隻鬼企左喺魚骨天綫度，唔洗理佢，遲些佢自己會走！
之後我在此屋再住了大半年，個青色影日日陪住我們，直至細女出左世二個月，業主要賣樓，我又要揾地方搬了，搬走後個電視正常返，個影再冇出現！

今次經地產揾左間前所未有，後無來者的超級鬼屋，之前那些真係濕濕碎，位於公庵路旁的一條小村，大X村，我住近村囗，條村得一條路，屋與屋之間好疏落，後來發現再入其實得好少人住，有好多荒廢嘅屋，荒廢嘅猪場，去到盡頭係田和山，呢間係瓦頂平房獨立屋，室內400呎二房，新裝修，圍住間屋有個好大好大的花園，花園起碼二千呎，環境其實真係幾正！但真係好猛！我奶奶重專登來幫我拜四角。(所以拜四角係冇用，重惹到入面廢屋大量的靈體來想攞食。)
第一晚入住，那年係2003年一月份，夜晚老公去咗返工，得我同對仔女在家，一個三歲大，一個二個月大，間屋D光管閃左幾吓，神枱燈下層地主首先啪一聲燒左，我已嚇了一跳，過一會，到上層觀音燈都啪一聲熄滅，我抱住個女，個女又哭，我開始感覺到四方八面湧現的陰氣，深知不妙，第一晚已經好後悔搬來……
之後在此屋發生很多怪事，太多太多了，詳列如下:
1）神枱燈每隔幾日，嚴重時日日熄滅，已檢查電力系統正常。
2）最恐佈觀音像面容變得異常，滿臉怒容。
3）老公性情大變，異常暴燥，因小事夫妻常吵，曾掟嘢，摑我，住這裏之前和搬之後很正常。
4）細女每日晚上定時2-4時無故哭得很棲厲，没有任何原因，無論如何亦设法令她静止。
5）每次侄仔（4歲）來睡也會滿腳瘀青。半夜大無端端叫，無端端大哭。
6）我個仔經常病，經常睇医生，出入急証室，入院，後期右耳失聰咗，搬走之後隻耳又正常返，連耳鼻喉專科医生亦無法解釋。
7）我每晚睡覺一睡落床，就聽到鬼叫，又笑又喊，時近時遠，好難形容那聲音，好悽厲好恐怖，很多時我嘗試落床出花園找尋聲音來源，一落床就聽不到。
8）門前對出有棵大樹，我成日覺得有好多人坐在樹上，亦在樹上見過有黑色人影閃動。
9）後期有人話我知，我個頭那段時間不停輕微晃動，我自己唔知，睇返這時期拍的vedio，才發現自己當時咁古怪。
10）我咁大個女未試過，亦係唯一一次，原因不明，連續二星期，日日發高燒，全身紅到好似愊地圖咁，個樣好核突好嚴重，日日出元朗打敏感針，連医生都比我嚇親。
11）有時我會突然間，無故覺得好憤怒，走出花園不停行來行去發洩，好像有人在撩我個心，我唔識形容，我成日打比我個friend問她，究竟我發生什麼事，她也覺得自從搬來這屋後，後不妥，建議我搬，但搬來搬去我已很累，經濟也不容許，又怕奶奶閙。
12）同奶奶講，她叫我買些金銀衣纸溪錢在家門囗燒，她說燒些東西就冇事，我有照做，但情況變本加厲，根本唔夠派，只有再引多些來攪我地，好似些難民想攞野，難民太多了唔夠分！
13）已請風水師來看過，錢又花了，陣亦擺了，無效無改善！

續……講返個風水師先，佢睇唒全家八字，驚我唔夠死，再嚇多我一鑊，話我細女同我老公八字相剋，不能一齊住，最好比人教比人湊，否則我老公過唔到42歲，當時我老公好似38，我聽到之後真係想暈低！点解咁驚嚇，因為之前住木橋頭村時，陪阿微去睇相，咁我又睇吓，個相士又係話我老公4拾幾歲有個大劫，唔知過唔過到！我當時都無為意，當佢吹水，但二個不相識的專業風水師，正職相士都先後係咁話我老公，比着你地害怕嗎？(呢part欲知後事如何，下回分解)
講返間屋，擺完風水陣，设有好轉，依舊聽到鬼聲，仔病，女哭……同之前一樣，又唔搬得又唔知向誰可再求助，住了差不多一年，農曆年前，我老爺死得好突然，因喪事，我奶奶要我用紅紙封左個神枱，我唔肯，雖然觀音地主幫唔到我，但在這荒山野嶺鬧鬼的地方，反轉張紅紙係白色，將個神枱上下層咁樣封法，我無法接受，我暪住我奶奶話封左，其實我無封！
我從未辨過喪事，唔知過程係咁恐怖！我不怕鬼，但見到死屍係我死穴，由於我係大新抱，原來過程係要我去揀棺材，當日在寳福山儐儀館，當我要在頗黑暗的棺材倉庫，自己爬上木梯遂副棺木去研究去選擇，揀壽衣，經過人家的靈堂，之後又要返呢個猛鬼屋企，我巳陷於崩潰的邊緣！我真的好害怕簷仰遺容，嗰種屍體死灰發脹感覺，又要我在放先人的房間出出入入，大殮當日，我呢個大新抱，毫無心理準備底下，被要求貼住副棺材，我老爺嘅遺體腳部，去量度老爺睡姿，睇佢呢樣睇佢嗰樣，我那些時候被嚇到魂不付體，我知道自己無法再撑下去，回家唔敢瞓，唔敢沖涼，唔敢郁，女又晚晚都喊到我心都離埋，老公又未
收工，我就來痴線了！終於我朋友介紹了一個大陸工人比我，她可以逗留三個月，名義上係來幫手做家務凑細路，實際上我係想搵個人返來陪伴壯膽，這個人叫霞姐。
霞姐來了十天，出奇地我有覺好瞓了，聽唔到鬼聲，我個女連續十天半夜都冇喊過。
我開始留意霞姐，佢有時會在花園同空氣講嘢，有一次食晚飯，食食吓佢突然講:人地有交租架！人地都好窮架！當時我開始心知呢個工人唔簡單，種種跡象顯示，佢知道一D嘢！
當晚吃完晚飯，專登等佢做晒嘢！我捉佢坐低同我講清楚，我問佢点解對住空氣講嘢？開始佢唔肯講，直到我話我知道呢道有嘢，佢來前和來之後的事，佢先肯表露身份，原來佢在大陸是一個仙姑來的，佢識算命，問米等，佢可以和鬼神就咁直接溝通，但最近比人走咗一大筆錢（會銀），所以先肯來做工人的。
霞姐話那些靈界想攞食，攞錢，佢地先係呢度地主，所以我觀音慈悲，開光的人又冇法力比到佢，觀音都愛莫能助，只有愁容滿臉，熄神枱燈來提醒我，佢話係我命格好硬，一般嘅鬼都頂得吓，小鬼會怕我，但惡嗰D唔會怕我，比着第二個一早出左大事，因為呢附近太多鬼了，佢來了十幾天，晚晚都一大堆，在我家範圍有幾十隻，甚至過百，佢留意到有一晚最少，都有十幾隻，再入村那些廢屋重有成千上萬，叫我最好係搬因為太多了，佢又話叫我小心老公身體，尤其是4拾幾歲嗰段時期，第三個咁講我老公，但當務之急係要搬，我第二日如實和我奶奶講，佢鬧左我一大餐話好租埋D咁嘅屋，跟著借錢比我地搬。
霞姐叫我地唔好在家講搬嘅事，以免被佢地聽到，搬當日好怪……待續

终於霞姐陪我找到一間元朗市中心合適的屋，搬走那一天，沙士後返學前都要量體温，很正常，送了兒子上校車，打算趁這四至五小時趕緊先搬神枱去新屋先，諗住第二轉先搬傢俬電器。
兒子剛到校，老師就打電話來，話兒子入班房前，量體温發現發燒不準上課，要家長到校接回，我話啱啱都冇事，請老師過一陣再量過，如有燒再通知，咁老師隔左幾個字又打來，說巳再check了，越燒越高，要我即刻接回，咁我同老公唯有乜都唔搬住，即刻坐車去幼稚園接兒子再去睇医生，医生量體温又話冇燒，再檢查其它又乜事都冇，医生重話是學校的探熱器壞了，我覺得如果壞点會得個仔有問題，真係攪到我一頭霧水，東奔西跑，浪費時間！
自從分別有三個人都同樣地說我老公幾年後4拾幾歲會有個大劫，我一直梗梗於懷，搬定左就又捉住霞姐問，專登封一封利是比佢幫我算吓我老公情況究竟係点，佢話佢淨係知道大约年份，異常兇險，至於係咩事和関於D咩佢唔知，我求佢救吓我老公，佢話佢冇本事冇把握，我為此哭了，真係好擔心！
第一位睇相佬講我當佢吹水，第二位風水佬講，我當佢危言聳聽兼反感，因為講到要我細女離開先冇事，我最憎，我知道自古以來，戲都有得做，話子女剋父剋母，有很多人都因此而對D小孩好衰，如果因此而憎恨自己的兒女，係一個悲劇，我絕不會咁做！到第三位霞姐又係咁講，當時的我意識到個天在提醒我，在話我知要做D野！
霞姐見我喊晒好可憐，佢應承幫我，介紹佢師父《南叔》比我，他人在陽讧，專業的，幫過好多人，包括救返當年走投無路垂死的霞姐，要請佢落深圳見吓我老公，睇吓有冇得救！
到约見霞姐師父南叔的日子，我們一行六人，包括我，我老公，老公朋友叫阿倫，霞姐，霞姐個女那天中午在東門某酒樓包左間房食飯，南叔首先幫阿倫起卦算命，講吓事業運程，重要係感情方面，話佢妹妹（嬰靈）一直跟住他，出於妒忌心，不想他結婚，所以過去每次拍拖都不超過一年就散，阿倫話呢個係事實，但因是她妹妹佢冇所謂，由得她吧！（後來大约隔左二年，阿倫驚自己會孤獨终老，請霞姐處理左佢個妹，而家結埋婚了）
到幫我老公起卦，佢肯定話佢過唔到42,係妹仔剋（鄉吓話），即係我細女，重要加埋娶咗我，我又命硬，講到我阻住佢發達，如果娶其他人佢嘅運會好好多，又話我成日扭老公計，佢對就得我好辛苦等等，又講將來會如何，三年後五年後會点等等（事後引証是不中的）咁無知的我當時比佢講到好內疚，覺得自己害咗個老公。咁最重要梗係叫佢救我老公，佢又起支卦話有救，唔係人人有架，不過關乎人命係大法事，佢要為此親自去海南一趟，尋找他的祖師，去那處要睇天氣，可能要阻佢一頭半個月云云，比較麻煩，咁當然要多些費用，（究竟有冇去都係一個謎）始終這些係虛無飄渺的事，如果我信就幫我！咁我信，我的想法時，雖然未發生，亦不知究竟我老公會否過唔到42,驚被說中，但求心安理得，傾好價錢，差不多五位數字，說多不多，說少不少，就做呢場法事，買個安心！落實了南叔就叫晒我們出去，我老公留下，幫佢落法，我們不準觀看，佢講明佢出來時佢一定要直走，不能再說話，佢話一個月後再見面比尾數兼做埋些手尾，亦交帶我們這一個月內，不要和任何人說此事，否則無效！……待續
小資料補充:南叔和霞姐係有D料的，好多巳發生的事，很近期的事，都被他們說中，之前我亦有介紹過朋友比霞姐算命，佢地嗰派講之前和當時的事很準，尤其是洩及靈界，但所預測的事，經過時間的冼禮，後來証實都不準！……待續

再到約定之期，我同老公，霞姐又上琛圳會南叔比埋尾數，今次又係包間酒樓房午飯，南叔話已成功去了海南，幫我老公處理時，發現我們夫妻有着很深厚的感情，但缘份麻麻，為証我們能白頭到老，必須削弱我一些東西，已免我太强，如我同意，要取我的頭髮去作法，不另收費，事已致此，我亦唔爭在比佢做埋。走時又係在我手心唸一輪咒，用手指畫了些字在我手心，吹了一囗氣，揸埋我隻手，今次可以同我們一起走了，亦都可以同人任何人講，因已完事，不過南叔叮囑以後若有任何人話算到我老公有事，不需再做任何嘢，因他已幫我們處理好！
此外，他亦說我細女（當時一歲幾，命好，非常聰明，到六歲就會表現出來，叫我拭目以待，霞姐這幾個月一直在我家做工人，之前都係咁講，話我個細女其實好叻，很好命，將來可以賺好多錢！要做佢契媽。再之前，細女出世，我奶奶亦問過，又係話佢命好，自己帶嘢來，將來有錢又有面。
講返霞姐先，佢在我家做工人，日日傾偈，佢又幫助我，脱離咗間鬼屋等等，等等，又做咗我女契媽，(不過佢規舉要年年比契媽錢)，我覺得佢係一個高人，據我了解，佢点解會有神通，就係幾拾年前，佢走投無路，犯左嚴重官非，去到要上吊尋死的階段，係南叔用法術救返佢，幫佢立左一堂師父（即係安神安觀音，佢地叫立師）,拜左十幾年，突然有一天，不準喝水，不得吃飯，不準睡覺，仰床連續三天，到第四天揸住架單車高速周圍標咗一日，開始同佢D師父接觸到，看到鬼神，可直接溝通，佢call D師父到佢就識幫人算命，問米,係佢堂師父（一班唔係一個，在佢耳邊講佢知，即係佢D師父不在，佢就係一個普通人，佢靠佢神枱成班師父令佢變成一個神婆）,她說南叔在陽讧很有名氣，經常幫D政要做法事，經他立的師，個個也很厲害，不過好似佢咁舒服的很少有，通常要唱曲，每次請神請鬼都好辛苦的，好好似佢咁樣通到靈的有好多個，經南叔立的師，就算冇通靈的亦保平安，有法力，唔似我個觀音咁，想幫我都冇能為力，佢地D用山雞血開過光，開光的人又勁，先有咁嘅效果！但如要通到靈的，要看缘份和立師上位當時講明要呢種能力先有，如只要保家的就唔洗講，無知的我梗係又要求南叔幫我立返堂師。我只想真正受到神靈的保佑！唔想再比靈界滋擾我們一家。
補充:坊間好多問米婆，神婆都係呢種。坊間一些靈煤，無啦啦突然降個所謂神，去扶助佢，唔係有缘就係有天命，話要去帮人，其實係比D陰神侵佔左。
呢停唔洗學唔洗修練，就識帮人做嘢，係個陰神控制左佢。
另外有一種係專登養鬼去攞料。

在元朗市中心租，住了唔夠一年，房署派咗屋，又要搬了，不過今次係最後一次，我要求南叔帮我在新居立師(安觀音),佢地嗰派日子和時辰看得很重，可能要搵兩三年先有日子啱我，佢吩咐我搬時用將觀音像，香爐，杯碟等物品用紅紙包住，全放進纸箱，放上神樓頂，即係騰空神樓上格什麼也不放，等佢擇日，地主，灶君可以入伙時照搬，照供奉，立師佢收得我好平，三位數字，佢話上次老公嗰單我巳比左錢佢賺，今次唔會要得多，要我耐心等候日子，當時的我都覺得佢好公道！當時係2004年！期間我多番追問，佢都係話未得未有，我唯有等啦！同期霞姐另外都介紹左個人叫阿儀比南叔立師，佢都等咗幾年，终於等到2007先擇到日子比我，阿儀都係早我一個月立的，我只想保家，阿儀想要通靈的，聽聞阿儀好快就能夠聽到佢堂師說話，和開咗陰眼！
到立師的日子，南叔要提早四日去我家住，我上咗羅湖接佢，四日要對住個言語不通的鄉吓佬，其實都好難捱！老公又要返工。成日對住南叔，就係咁聽佢講嘢，响度估吓估吓，佢話原來佢唔識字，佢阿爺係一個好叻的法師，佢一出世佢阿爺就話傳人终於出現，之後冇耐阿爺就過身了，直至南叔長大成人，佢阿爺就入夢揾佢，帶佢上天下海遊地獄，教佢起卦，將所有本事晚晚在夢中傳授比佢！
原本我打算呢四日邀請埋霞姐來，但南叔反對所以冇叫，佢爆話唔like霞姐又嘈又貪心喎！我估可能佢地分贓唔勻，南叔要我準備的立師祭品記得的包括大山雞一隻，保留山雞血，柚葉，紅立燭，硃砂，生果，六隻茶果，花生，未煮的齋，五隻酒杯五隻茶杯，等等，佢擇的立師時間是半夜四点，話啱我命格喎！(當時信任佢，真係唔識分析有冇問題)，睡之前佢專登攞神櫃頂塵封左二年幾的纸箱落來，幫我用柚葉清洗觀音像，和香爐等物品，我覺得都好求其吓，洗得唔夠乾淨，用红纸包返放回纸箱，我見佢將個觀音像仆轉，趴响度咁放，即時個心實一實，感覺好似好唔安樂好唔尊敬咁！忍唔住同佢講，問佢係咪應該整返觀音像坐返响度，点知佢照搬返上櫃頂重話唔好理佢！我冇瞓等四点，差不多夠鐘就行出來，望上纸箱，見到觀音自己坐返正，因為見到觀音個頭，之前因為趴轉左係見唔到的！被此情景嚇咗一跳，我即刻叫佢起身睇吓，問点解咁架，佢望咗一陣，回答我唔洗理冇事的，我間屋係冇裝房門的，南叔睡梳化，佢成晚冇動靜，我好肯定佢冇起過身做過手腳，因為放得咁高要搬椅子先攞到……續

終於夠鐘開始我期待巳久的立師儀式，南叔首先攞我個吉的香爐，去窗邊用三個毫子，好似擲骰子咁，佢話問吓觀音同意不，結果係同意的，佢話如果三個毫子全是字，或全是公仔的話代表不同意，佢就唔會幫我立，即刻走！
跟住佢開始用鄉下話好大聲咁諗咒，最特別係在行去窗邊招手，幫觀音用硃砂及山雞血点睛開光，攞左神枱其中一隻洒杯，佢飲左一啖，比我飲一啖，跟住佢吩咐我之後都要放五杯茶，五杯酒供奉，放生果，花生，糖仔餅仔，未煮嘅齋，重有初一，十五放三隻或五隻稯，茶果，過年過節要用三牲拜祭，我問点解觀音要用肉，用酒拜？佢答我是護法食的，作主的觀音本身食齋！
重有一樣嘢，南叔叫幫觀音買頂紅帽，話咩當官喎！我揾唔到地方有售賣，佢用紅紙摺咗一頂戴在觀音頭上，我覺得好怪，一開始巳睇唔順眼，之後供奉此觀音像期間的五年內，始終係紅纸，耐咗會殘舊，我曾多次致電南叔及霞姐要求可否唔要頂紅纸帽，佢地話唔得……
南叔走前講，叫我放心，觀音會招兵買馬，幫我揀D適合嘅神仙進註，經佢立的師個個都係咁，其他人一般最快约四五年就埋到班，招到大约七八個得力的，就會好有助力，到時一係識幫人做嘢變靈媒好似霞姐咁，但霞姐都唔算勁，因為降師時佢只係迷左三日，如果霞姐迷夠七日就勁囉！咁我唔要求要做野的，只保家宅的能力卓卓有餘！
立師之後嗰一兩個月，我有時會好唔舒服好暈，成日打去問霞姐，霞姐又話我過咗咩月份，就會好D，都係咁，终於我又致電南叔，佢話我D師父坐呢D三神層嘅神櫃好唔舒服，又窄又迫，佢唔舒服我点會舒服云云，係香港先興用D咁嘅神櫃，佢地係用四方形的八仙抬，換左佢好D，又好似好有道理咁，咁我問可否自己換，佢話唔得要佢來，價錢要當日換完即時問佢D師父要收幾多，放心唔會好貴，佢交帶張枱物料要用榆木，平D，成張要冇一粒釘的，四方形麻雀枱size,做高少少，我又用咗四千五元去訂枱，枱送到就請佢來做儀式…

到換神枱那天，南叔擇的時辰又係要半夜三更，一点幾，開始冇乜特別又冇唸咒，佢就咁將個觀音像放落新枱度，我加咗一盞蓮花燈上去，我本想加一對佢話唔好，佢話心中一盞明燈，咁我照佢意見思放在觀音像右邊！放好所有泊埋張枱就上香，跟住先到戲肉，佢問我攞張紅纸平放在神枱，反轉白色嗰面向上，佢燒咗D灰落纸上面，叫我用隻手係咁慢慢平搓D灰，搓吓搓吓，張纸慢慢浮現左D字出來，好神奇，大大隻字2800，佢話係佢D師父意思，要收我$2800，唉！好肉赤，心想連接送招呼佢又洗咗成萬，我當時已决定今次係最後一次！洗濕咗個頭，我又感覺自己個心唔係幾受落，決定以後無論發生什麼事亦不會再找他！送南叔過關後打比霞姐講返過程比佢聽，佢聽完冷笑咗一下，言談間我感覺得到霞姐係知南叔攪咩戲法，不過唔肯講比我聽，佢叫我放心，南叔能力是真的，但近呢兩三年，又中過風，人格好似有變！我形容吓2007年立師之後嘅情況:
好處係
1）工作，財運好轉
2）冇再好似之前咁比靈界滋擾 我的家人，引致兒女無端發燒之類的問題
3）好似樣樣順境咗，我有時會有好機缘，貴人運
4）每天早上上香會比提示我，由觀音的面容表情香路，我就知道當日順利定運滞
5）我用紙仔去問事求指引會好準，比到答案我
副作用係
1）我手腳和体温一年比一年冰凍，由一個長期成身好似火爐的人慢慢變成一個冰人，我以為年紀問題
2）一到秋冬長期咳嗽，一年嚴重過一年，点医都唔好，咳到好痛好辛苦講唔到嘢
3）成日好想行房事，想的時候如老公不在，我會好辛苦發炆熷，我以為係女人進入所謂狼虎之年
4）心跳不正常，心痛，又係医唔好，去到2010年好嚴重，過左2011農歷年又好返些
5）最麻煩係間中突然好暈，嘔，天旋地轉，要即刻搵床瞓低，跟住感覺自己不斷向下跌落深淵咁
6）長期周身骨痛，肩頸好累好硬

其間都有同霞姐通電，再有心咁了解吓霞姐有冇此情況，原來佢又係身體好差，但佢好受落，好服氣，完全冇質疑，佢亦好響往得到通靈問事的能力，多多少少都令佢有收入，佢D師父幫佢全家，兒女揾到食，總之佢信佢班師父信到十足，佢叫我要好好供奉，可能我的觀音覺得我唔服，霞姐教我唔舒服就走去誠心同觀音講以下呢番說話:“請佢有怪莫怪，如果係我做錯就原諒我，求求釋放我肉身，如果係我有事請幫我化解，如果係師父間的問題請觀音娘娘慢慢解決，不要愁”佢咁講之後我火火地，我有嘗試去說服自己，但可能自己性格敏感，會質疑！我實在無法控制自己的心去百份百信服！
漏咗一個壞處未講，就係我發現自己講話越來越囗齒不清，力不從心，當時又係以為自己年紀大引致。
我後來同霞姐傾吓傾吓，當時已2011年，越發現有問題，佢話南叔每立的師交帶的祭品上都有少少不同，南叔吩咐我初一，十五，要用紅臘燭拜祭，原來霞姐那個觀音係要用白臘燭的，聽到真係嚇死我，佢唔講尤自可，知道後我開始有D驚我個觀音像，唔知点算好，点收科！唔通又洗一筆，点同我老公交待好呀！我心灰意冷，第一次在香港神具舖搵師傅開光又唔得，冇料到成日比鬼攪，第二次南叔又整到古古怪怪，我已經對所有法師好冇信心，唔敢亂咁再揾人，再做任何事，我亦唔敢同我老公商量，因前前後後做過咁多事，用左咁多心機時間金錢，佢亦一直頗為信任南叔霞姐，我唔知点講好，就係咁拖延自己呃自己，照上香照拜神，但個心成日打緊交，有時覺得冇乜嘢，安慰自己心多姐，觀音係神係幫我的，有時又覺得個神枱好恐怖，觀音像面容好陰森，心底不期然發毛，老公夜晚返工，觀音背部隔住牆就係企江，每晚沖涼都驚驚地，唉！
身體越來越差，心臟好返些，又好似有情緒病，越來越對什麼也冇興趣，成日好暈，隔幾個月又咳到肺癆，腸胃又唔好，開始肚瀉和便秘交接出現，D腸好唔舒服，成日陰D陰D咁肚痛肚脹唔知点咁，有時會攪到瞓唔到，即係一瞓低又想苛想苛咁，去厠所又苛唔出，瞓低又去廁所，重重覆覆好煩，肚好實好脹好大，食過好多健康產品都唔得……待續

講返霞姐的幾單威水史先，如果唔係你地唔明点解我咁信佢！佢只係帮我做左4個月工人，之後就係我细女㛃媽，以大陸人講法我地就變咗親戚！
有一次霞姐過年來香港，去我家住咗幾日，我那住九龍的阿媽又來見吓佢，探望吓，咁飲茶時，霞姐突然同我媽講，叫佢呢二個月最好唔去再來搵個女(即係我），又叫我媽今年出入小心些，去邊都最好乘坐D好大型嘅交通工具，例如地鐵，無得揀先好搭巴士，小巴，的士要避免！咁到那年年尾，大約11月，我媽來探我，在我樓下踏單車，我媽開得好慢，突然間有個人架單車在佢隔離成陣風咁經過，佢窒一窒人連車打横瞓低，一隻腳整碎晒D骨，要即時白車送院，第二日做手術，霞姐叫要我去出事現場幫我媽做D嘢，燒D嘢和破雞旦，咁我媽就會康復順利，冇咁痛苦，但最好比錢搵D婆仔去唔好自己去做，咁我搵唔到就自己去，去完足足病咗個幾月，而我阿媽都瞓左四個月医院，佢好彩唔知係味我做咗嘢，佢凈係做咗一次手術，傷口康復得好好，但同病房隔離幾個，冇傷得咁嚴重的又發炎又要做多幾次手術！
霞姐的第二件威水史，有一次，我外婆很老了，九拾幾歲，在台灣病程告急，医生話應該過吾到，係呢幾日走了，我媽即時向公司請假，買晒機票諗住第二日起程，要返台灣見外婆最後一面，咁啱嗰晚我同霞姐講電話提起呢件事，佢叫我媽唔洗飛過去，叫佢去退機票，佢話我外婆今次一定冇事，實過到呢關，叫我媽無謂浪費假期和金錢，佢其實好好，佢知我媽冇乜錢，所以為佢着想，点知我媽都係想飛過去，後來外婆真係冇事，起碼大半年後先過身！
講多單比你地聽，有一次，嗰陣霞姐重係在我家做工人時期，老公D同事知道我屋企來左個高人，成班慕名而來搵佢指點迷津，個個都話準，其中一個同事個家姐單嘢最精彩，個個拍晒手掌，可能因為涉及靈界係霞姐最精嗰範，佢說得出佢丈夫祖墳嘅所在之處，周圍的環境，佢地幾時去過祭祖，當日發生過咩事都知，話其中一個祖先已得道，因為佢地當日接咗此位祖先祖墳的氣，又形容埋嗰位祖先嘅相貌，佢呢位祖先由那天開始就扶持佢地一家，令佢地生意，財運突飛猛進，但呢位祖先只會扶多佢地幾年，就會功成身退！叫佢地好好把握！當時人話佢全中，佢個祖墳係佢形容咁樣等等，當場個個都覺得霞姐好叻！
咁耐以來當然唔止呢三單，所以就導致我咁信任佢！但佢後來先知原來佢D師父係咁樣拜法的！
講返自己，一直拖吓拖吓，用盡各種方法都冇法子解決身體的問題，霞姐都巳經帮唔到我乜嘢，佢叫我打比南叔同佢講吓，我唔肯，我話過唔會再揾呢個人，霞姐亦有來過我家小住幾天，佢試過行埋去神枱度同我觀音像傾，內容係:｛你係大神來的，唔好咁小氣，成日咁嬲啦！咁小氣點做大神！｝我嘅情況係，我都唔知点解自己個心唔肯屈服，好似霞姐，阿儀咁全心全意對待佢地自己班師父，佢地覺得什麼也理所當然，包括用雞用肉用白爉燭，我無論如何亦係有抗逆之心，所以我估佢唔肯放我肉身，經常鎖我魂頭，導致我好辛苦！
2011年，有一段時間我個香爐好奇怪，日日旺爐，連續幾星期，我問霞姐，佢都覺得日日係咁好唔尋常，但佢D師父唔肯講咩事，霞姐要靠佢地先知，所以答唔到我，淨係叫我小心火警……待續

經過旺爐事件之後有一日，我D仔女返晒學，我老公因為返夜班，日頭通常都係瞓覺，我日頭有時就會出吓街，佢嗰日瞓瞓吓到下午，聽到有人開門返來，整呢樣整嗰樣，佢覺得係我啱啱返來，佢意識醒咗，不過以為自己太眼瞓擘唔大隻眼，就問咗句，你返咗來嗱？咁佢聽到我把聲答佢，係呀！你唔洗理我，瞓啦！咁佢郁唔到又睇唔到之下，又以為係我味繼續瞓啦！隔咗一陣醒咗起身返工唔見有人，打電話比我，問我唔係返咗屋企嘅咩？点解又出左去嘅！我話我一早出左去冇返過來，佢話頭先明明有同我講嘢喎！冇理由格！之後同我講咗呢件事，我老公平時唔係一個疑神疑鬼嘅人，我唸唸吓唔對路晚上就打去問霞姐！
同霞姐講完，佢叫我即刻打開門窗，同空氣講:如果你唔係我屋企人，我同你冇仇無怨請你立即離開！佢問佢班師父知唔知咩事，又係唔肯講，霞姐話此東西如果不肯走，我將會都幾大件事，佢已經求左佢班師父飛過來睇睇，但D師父唔開囗，佢都冇辨法，唔知會發生咩事，佢又話知道呢期我觀音娘娘成日唔知去咗邊，經常不在，不過點都會有一兩位師父留守的…！
捱到2012，我個肚大到越來越嚴重，個個朋友都成日話我，叫我減吓個肚腩啦！真係好肉酸呀！我冇晒法子，連消腩丸，瀉藥都食埋，尤其是夜晚，照镜真係好似有左六七個月咁，又實，又陰陰痛，無論坐或瞓低都好似個波咁，唔會摺埋，其他病痛又持續，甚至乎無端端會好想嘔，要即刻去嘔，直到年尾，有一天細女家長日，有位同學仔媽味，之前我地唔熟，係在仔女活動嘅時侯認識傾下閒偈，平時冇联系，咁見完家長話一齊去飲茶，傾開拜神，我話比佢聽我点拜法的，佢聽到覺得好有問題，就爆比我聽佢二公婆都係法科弟子，佢好懶冇乜料，佢老公叻D有研究D,佢亦重來不會同人透露佢有學法科，唔知点解會同我講，講吓講吓，佢話不如幫我同佢老公傾吓我個觀音咁拜得唔得，咁我就拜託佢啦……待續
(為咗大家睇得方便，呢位朋友化名阿芳，佢老公化名阿華啦)！
同阿芳飲完茶當晚，佢打比我話，佢老公阿華都覺得帮我開光的程序好有問題，(我冇透露過我的身體狀况，全程只說我點樣立師）咁啱過二天阿華會放大假，原來阿芳的妹妹是住在我樓下，隔幾層的同一單位，咁佢地會探佢妹妹順便上來帮我睇吓個觀音，阿芳又問我攞咗個名，和出生年份，帮我問吓佢地師公（人來的），師公唔洗見面唔洗來就可以問事，我覺得好似揾到救星咁，姑且睇吓能否打破我的困局和我對我觀音的疑問，我冇問過佢地屬於什麼教派，當時就算講我都唔識，所以費時問，但個心唔知点解突然間我好想入門，我都覺得自己有呢個諗頭好白痴，連乜頭乜路究竟幫唔幫到我都未知，我都唔知点解會咁有衝動，可能呢D就係叫缘……
阿芳帮我交了名給佢地師公，好快就打來覆我，阿芳話師公問我個肚係唔係好脹，D腸會有D嘢响入面了住了住咁痛，要我即刻去照吓個肚先，我當時真係好錯愕，第一個反應係:師公点知架，一來出奇我個肚的情况，佢点會知，我冇同佢地講過，二來好驚自己有絕証，三來我明明係問我個觀音有冇問題，點解冇答我嘅，咁我又追問阿芳，佢話等阿華上來睇左先講，佢千叮萬囑要我去照吓個肚！
好快阿華放假和阿芳一起到我家，阿華望咗我神枱一會，大家坐低傾，佢冇講有冇問題先，只係問我重想唔想保留此觀音，佢咁問我，我就視線望住觀音像，嗰吓我突然覺得觀音表情好慈悲，唔知点解個心生出好不捨得，好心酸的感覺，我就答阿華如果冇問題我想保留，阿華話你自己考慮，係睇我自己如果唔想要佢先幫我處理！佢全程都唔肯講究竟有冇問題，叫我快D去照肚，佢地話留意睇我個肚真係好大，我比佢地用手督吓，佢地都嘩嘩聲話好硬好實，佢講咗比我聽佢地係咩門派，我未聽過，我話我想學，佢話唔好急住，真係幫到我先講！佢地坐咗一陣走左，我個頭好多問號，决定過二天等老公放假陪我去元朗照肚。……待續

我老公陪我去照肚，我打算淨係照X光睇睇先，我張X光片好快出來，個化驗師循例同我入房傾吓，大家都見到張片好多一個個圓形的印在腹腔，一撻撻咁，尤其大腸最嚴重，佢都覺得好奇怪，化驗師問我係唔係便秘得好嚴重，好耐冇大便呢？我話唔係，我呢期食緊消腩丸，一日去幾次，佢摷左二三張其他人的X光片比我睇，解釋比我聽一張係清楚見到有個位生咗粒嘢，佢話人地有事係咁，另一張係有嚴重宿便，但又冇我咁誇張，又唔係好似，重有一張係正常，好清的！佢都好似未見過我呢個情況，跟住佢話不如幫我照吓超聲波，免費唔收錢，我梗係話好啦，之後直接帶我同老公去第二間房，叫我瞓上床整高件衫，佢都覺得好奇怪，話我個肚咁凸，好似人地有左BB咁，跟住幫我揸啫喱，遂個器官照，一路照一路解釋，呢個係胃，脾呀，冇事好靚，到肝，有少少脂肪肝，好輕微，話好多人都有，到膽，好清一粒石都冇，膀肛呀等等，冇事，佢一路話D内臟好靚，之後又帶返我去頭先睇片間房傾，佢話少少脂肪肝都唔會引致我個肚咁大，重sale左我幫佢買盒健康產品，成五舊水！
照完嗰晚打比阿芳通知佢情況，同佢講話内臟冇事，化驗師覺得我食D健康產品清清佢就得喇！我不停追問阿芳究竟我個肚咩事，佢話師公驚嚇親我又驚我唔信，唔准佢地話比知係咩事，淨係叫我快D去照，佢都好想講，佢知道我係咩事後攪到佢瞓唔着，我又追問阿芳觀音問題，阿芳話原來阿華覺得我整咗好多錢，又唔敢直接話我知我個觀音好陰，係陰神，阿芳決定話不如直接帶我去搵佢師公！
終於阿芳帶我去揾師公問個明白，阿芳話師公好好人的，我去到見到師公好忙，原來佢開食堂的，我地坐埋一邊等，终於冇乜食客時，師公先得閒些坐低同我傾，我問佢可否告知究竟我咩事，佢答我話你張X光片睇到，我話化驗師話冇嘢可能係宿便，不過有D好奇怪嘅印，師公話咁你去照埋磁力共振啦，用科學check清楚D先講，費時我唔信，我話唔好啦師公，磁力共振好貴架我比唔起呀！由你無啦啦講中我個肚有事我已經相信你，請你幫吓我啦！我信你呀！講比我聽啦！師公話:你中咗蠱呀，大约一年前有個湖南女人落的，要折磨我，短期內唔會有性命危險，只係辛苦，你個肚嗰D係細菌，微生物！不過越漚越多上到心肺就難講了！每到陰陽交替嘅時辰，佢話我夜晚個肚特別脹和唔舒服的！實情亦是如此，講到呢度師公又走咗去做嘢先，唔知点解我聽到咁情況，我一D都唔識驚，可能我經歷不少，我的命運太多古靈精怪嘢，我反而釋懷了，每日自己受嘅苦迷團解開了，因為我知師公一定救到我，反而阿芳好驚好擔心，嚇到佢瞓唔着落晒形！
等咗一陣，我又問觀音問題……
師公的食堂有另一位佢地門派的弟子在，化名阿詩，阿詩和阿芳好老友，以我後來所知，阿芳因為我的問題困擾所以有同阿詩商討不如直頭帶我來找師公，所以阿詩亦到場了解和幫手請求師公幫我，可能師公對我印象唔係咁好，覺得我好迷信，好愚昧，當阿詩問我觀音的詳情時，我由大X村住鬼屋識霞姐做工人時開始講起，講到霞姐話入面有成千上萬隻鬼，忙碌的師公已經聽到火火地，出來講咗句嘢窒我，之後我都唔敢再講落去，我唔知点好，嗰刻開始我越來越暈，所以現在對當刻的記憶比較模糊，記得係隔咗一陣，師公义住條腰炳我，大約係話:你比人呃完一次又一次都唔識醒！你大人嚟架！無腦諗架？用酒用肉去拜觀音！你作孽呀你！你知唔知拜陰神要還架？你點還呀你？阿詩好似當時叫師公唔好咁勞氣，我一路聽師公炳我，我開始睇嘢越來越曚查查，聽嘢又曚查查，好迷好遲鈍，跟住乜嘢都入唔到腦，阿芳後來都話知我突然好呆滯，我記得臨走時師公應承幫我解蠱，吩咐阿芳叫阿華打比佢，教佢點做！叫我等阿華放假先處理，忍多幾日。
之後阿詩揸車車我和阿芳返屋企，全程車佢地同我講咩我斷晒片，返到屋企我即刻要瞓落床，天璇地轉…
見完師公，暈完，第二天我清醒返就喺度諗，昨天是否我個觀音突然令我意識迷糊，企圖控制我，抽走我的精神，真係好似食咗朦仔丸咁，令我斷片，唔比我再同人地交流，我思前想後，我知道佢有幫我，但自此我亦肯定到原來一路以來令我不適，我覺悟到係唔關年齡事，唔關有病事，唔怪得醫極醫唔好，原來係佢，唔知點解我感覺到呢排佢同我打緊感情牌，我唔知点形容比你地聽，總之令我好不捨，內心交戰，好難作出要唔要佢嘅诀定，但再保留佢學師公話齋我點還呀？我之前都唔知咩叫陰神，原來有分的！
過二天我打比阿芳，阿華明天放假會來幫我解蠱，咁我地约咗個時間，開頭講其他話題時我重好精靈，我有問佢:你又話師公好好人嘅，点解佢好似好惡咁架？阿芳話佢都係第一次見佢咁鬧人的！跟住講吓講吓，我講返當天迷糊的情况比佢聽，話題提到個觀音，我開始又感覺到迷糊，反應開始遲鈍，阿芳都聽得出我突然的變化，我更加肯定係我觀音攪鬼，佢唔比我同人研究佢，我頂唔順好暈要收線去瞓床！
我瞓在床上越來越辛苦，心跳到嘭嘭聲，又心悸胸悶頭暈作嘔，呼吸困難，肚又唔舒服，乜都出齊，阿華要返工約左要聽日先幫我處理，我嗰吓辛苦到好想死，都唔知自己會否捱唔到聽日，我知道肚内的蠱同我嗰位陰神一齊夾攻緊我，好似要迫我打退堂鼓，要我辛苦到要求佢地唔好來，我都醒水，經驗話我知，我要控制自己個心死都唔諗，唔作出決定住究竟要唔要處理我個陰神，咁樣控制思想真係要好高技巧，我諗唔係人人做得到，我驚佢read到我諗乜會即時處決我，令我痴線甚至攞我命，所以我係咁諗其它嘢唔唸呢個問題，另一邊箱，阿芬同我收線即刻打比阿詩，同佢講我嘅情況，由於阿華開緊工所以佢搵阿詩，佢地都覺得我而家嘅處境好危險好無助，跟手阿芳問我攞咗個名同地址，阿詩用佢地門派嘅方法（不能公開）去幫我渡過咗一晚保住我平安先，因為咁阿詩陪我辛苦咗一晚加一個早上，因為同時間我有咩不適佢完全感覺到，阿詩同我做咗D嘢我好咗D，冇咁辛苦但都係辛苦，我都好感激阿詩否則我都唔知點捱，佢呢次真係做咗架兩！直至第二朝……待續

到第二天早上，不適感好咗一陣間，約咗阿華佢地中午一点左右上我家，我成朝同我老公坐响度等，太约十一点十二点，奇怪的事又發生了，我開始控制唔到自己，坐立不安，係咁想行走，在屋企行來行去，我用意志力支撑住自己，我唔可以比任何嘢控制我思維，到大約十二點半，我又好暈，不停去嘔，連白泡黄膽水都嘔晒，真係好辛苦，手騰腳震，個心跳到好快，比着第二個可能會辛苦到屈服，叫佢地唔好上來，我老公見到我咁樣都好驚好擔心，终於等到阿華，阿芳，阿詩三個到晒，我嘔得重厲害，阿華開始寫符，開頭佢有佢寫我有我去嘔，慢慢我開始定下來，可以坐低，佢寫完就燒符比我飲，我信任佢地，我重來冇問過佢地會點做，過程係點等等問題，所以我事前係乜都唔知，總知我覺得佢地肯花寶貴嘅時間去幫我，又唔係講錢，我唔應該質疑人地，我都攪成咁咯！横又死掂又死，所以毫不猶豫一囗氣飲晒D符水落肚，跟住阿華叫我坐响梳化度，双手攤開，問我有咩感覺，好快我覺得……
…之後阿華，阿芳，阿詩坐晒响度望住我，我估唔到原來一D都唔似睇電視，冇開壇作法冇做咩大龍鳳，連香都唔洗燒一枝，食符後淨係叫我坐响度攤開双手，要我自己感覺吓，冇提示冇指引要我自己講出來有咩感受，隔咗唔夠五分鐘，我開始覺得個肚入面好熱，越來越熱，好似煲水咁，慢慢滖起，阿芬伸手摸吓都話係好熱…
……阿華打比師公交待左一吓我嘅情況，（真係唔好意思阻住佢老人家做嘢，食堂那時間應該好旺）跟住好型咁吩咐我立即將D蠱排出來，我都唔知應該點做，點排法呀？漸漸我感覺到個肚D熱力向上升緊，升到胃，升到胸囗，升到喉嚨，我一路講比佢地聽我覺得點，阿華一路叫我將D蠱排出來，嘗試吐佢出來，我白白痴痴咁做左幾吓吐的動作，跟住同佢講吐唔到喎！佢叫我合埋眼静心D，個心惡D咁諗將所有蠱，微生物立即消除排出體外！到我感覺D熱力升到上耳朵的水平線時，卡住咗，無法再上升，阿華係咁吹我排出來，我一時情急就講:唔得呀！出唔到嚟呀！佢地個個望住我，包括我老公在内，我全程合埋眼，D熱力卡咗响耳朵個位一陣，我個心一路喝D蠱出來！突然間我感覺到左邊後腦，耳朵後面開咗一個洞咁，感覺大约五蚊銀大小，有嘢由嗰度走出來，跟住我依舊合眼話比佢地知:得喇！搵到位出緊來喇！我聽到佢地話我個頭有煙出，重叫我老公埋來睇，我唔敢郁，我又聽到阿詩講話我做得好好，反應好好，係要我信先幫到我，阿華叫我專心继續排唔洗理佢地……待續

續……我係咁合埋眼排咗大約半個鍾，期間眼角自己流眼淚，阿華問我做乜喊，我話唔係喊係無端端自己流出來的，跟住佢叫我休息吓先，我一開眼就指住個感覺有洞的位置問佢地，係唔係呢個位置出煙呀？佢地包括我老公都話係嗰個位，（D煙唔係好誇張的煙,係隐隐若若的，大概係好似你冲完好熱嘅涼，出來時D皮膚有少少煙咁）我嗰個位感覺到排到好疲累，阿華又打比師公報告吓，跟住聽到指示又開第二次符，食完符又叫我繼續排，我又排多半個鐘，我感覺都係嗰個位出來，整整吓差不多四點，之後阿華吩咐我總之勤力D每日一得閒就攤開手排，教我排時個心諗住要排所有蠱，微生物，細菌，陰氣，我見時機成熟，我就開囗同阿華講，我決定唔要個觀音，請佢幫我處理，阿華話你係決定唔要啦嘛！我好肯定咁應佢係，當時我老公都唔知我有咁嘅決定，（之後先解釋返比佢聽點解）阿華又打比師公轉告，原本打算即時幫我封咗佢，但師公指示話唔好今日（可能時間太晚），要我由現在開始不要上香，等阿華下次放假先攪，嘩！我好驚！重要對多一個星期，阿詩話阿華巳落了命令，叫我不用害怕，總之我唔好再郁神枱D嘢由得佢，放心等阿華來！
雖然佢地冇話要收我幾錢，但基於人情世固，我都準備咗一封利是比阿華！
送佢地走時，我偷聽到佢地話，原來我個肚都關靈體事，可能我隻嘢呢幾日會去找佢地，我聽到D又聽唔清楚，問佢地即係咩，叫我唔好理咁多，可能費事解釋咁多驚嚇親我……！
續……之後嗰個星期，我每天加加埋埋都排二個鐘，因為我怕死好想快些清除肚内嘅蠱，佢地講明幫咗我一半，有一半都要靠自己去勤力坐响度排先得，總之個原理係越比時間去排就越快请除，越懒就越慢！阿華話過情況可能會有反覆，總知有問題就打比佢！咁我嗰個星期都冇乜問題！亦再冇任何不適！
等到上來封觀音那天，阿芳和阿華一起到，重叫埋她妹妹和妹夫上來（住我樓下）,原來他們亦是同門來的，阿華開始用佢地門派嘅方法幫我封晒神枱所有東西，期間我坐在梳化睇住睇住過程，我見到觀音的表情變化，（我一直以來都有此功能）我睇住佢越來越無助，越來越面容扭曲，我嗰刻心情真的唔係好忍心，但為了自己健康，家人着想，我不能和她共存，我要擺脫她的操控！
完事後佢地話放心，我班陰神唔會敢再返轉頭！我可以自行棄置神枱所有物品，我驚！所似請他們幫我搬晒去掉！
阿華今次又開咗幾條符比我地護身，以免我地一家再被靈界滋擾！
我又問阿華可否收我為徒！佢話叫我唔好急，對佢地了解多些先講！
阿華交帶話南叔霞姐佢地可能會知道我冇再拜呢件事，但任佢地點查都唔會知道係邊派封佢壇的，佢應為我冇必要同佢地交代的！所以雖然我有同霞姐联絡，但冇講發生咩事！佢真係到現在都唔知，之後佢每次問佢班師父我的任何事，佢班師父都封嘴唔講！
……講返我個肚，真係一天比一天冇咁脹，封完壇兩三曰之後有一晚，我又有少少嗰種暈出現，我拿拿聲又走去排，越排越覺得我肚內開始越來越凍，慢慢擴散，我越來越暈，唔係好對路我開始好驚，打比阿華，佢話佢一早說明可能會有反覆，是我的陰氣作怪，作無謂挣扎，佢教咗我一些方法要點做，要我比些信心繼續排，我過咗嗰晚再沒有出現此情況！
我日日好勤力咁排排排，連我老公都睇住我好轉，成日吹趕我去排，又過咗幾日，又好奇怪連續有二晚，相同時間，大约七點至十點，我肚瀉得好厲害，不停咁瀉一些淺綠色的水和糞便，係好淺嘅綠色，好似翠肉瓜的皮咁嘅顏色，我重未見過的！之後個肚真真正正細返晒
佢地走咗之後，我同我老公都覺得佢地好似現代捉鬼天師，好型！
續……餘下嘅日子，我不取怠慢，除咗排蠱排陰氣，阿華feel到我心臟有問題，亦有教我点做，好咗好多，我足足排咗個幾月，囗齒不清等等問題亦全部回覆返正常，期間我有約佢地出來飲茶，我好想入佢地門派，了解咗少少佢地門派的事，阿華話佢已經有幾個徒弟，又要返工連瞓都唔得閒瞓，驚教唔到我所以唔打算收徒弟，叫我問阿詩，阿詩考慮過又話有私人理由唔收，而師公佢地話巳十幾年冇親自收徒弟，亦講過唔會再收，我只見過師公一次，冇理由自己走去搵佢，我又唔識去佢食堂，咁我又好想所以成日求佢地是但一個收我為徒也好，我唔知點解好有呢個慾望，當佢地正式拒絕晒我之後我好惆悵，阿詩安慰我話我係味屬於呢個門派是上天安排咗的，如果整定係就遲早都係，如果整定唔係我亦冇損失，但我就係覺得好想好想，日想夜想，可能呢D叫緣，我甚至傻到有一晚向住個天，喊住求佢地主壇衆位先師比個機會我入門，我一定會比好心機學的，终於又有奇遇……待續

續……當我好想入門，向天祈求後，在我排蠱的過程中，因為係類似合眼静坐，有一次，我見到一個人樣，只是面部，很清楚，戴眼鏡（我之前見係冇戴），大大個樣，歴時數秒，個樣有些似師公，但我只見過一面，當日見面時又六神無主，佢又走來走去工作很忙，其實我已經唔係好記得佢個樣！呢個静坐見面情況我只試過一次，亦不已於為然，冇乜在意，當係自己幻覺！
隔了十天八天左右，收到阿詩來電，原來佢當時去咗食堂揾師公，發現十幾年冇收徒弟，亦已說過唔再收徒弟的師公正在收一位男徒弟，事前係冇人知的，比阿詩撞到正，所以佢即刻幫我講說話，嘅然師公收得一個，亦游說佢收埋我，師公係識嗰位新男徒弟，佢地交往咗好耐先到呢一部，令師公破戒收佢為徒，而我真係機缘巧合，啱啱撞正剛剛，從此我就和師公展開了一段師徒之緣，改稱師公為師父了，亦得知點解我會在静坐中見到佢個樣，之前我亦唔知佢原來間中有戴眼鏡的，我在静坐中見到的眼鏡就係嗰副，一模一樣，由此證實我唔係幻覺，一早上天已有提示，佢就係我師父了……完

解一解話先，我而家已經完全好番晒，所以好想同大家分享，比大家知道呢個世界真係無奇不有，亦希望有人能引以為監，唔好學我咁愚昧亂拜神信錯人，唔係個個好似我咁好彩遇到貴人打救！
我個肚嗰D蠱唔係蟲，未變蟲，重係細菌，微生物，所以x光片一個個印在腹腔和腸臟！係唔會嘔蟲的！
蠱有分好多種，睇嗰個人點落，落D咩！幾時變蟲快唔快死係落嗰個人決定！
師公話我嗰種蠱係嗰個巫師用未出世嘅胎兒製造，所以我啲徵象係會似孕婦！信不信由你！

嗰個同期立師的阿儀，佢冇我咁抗拒，佢好受落，冇質疑，應該唔會點罰佢嘅，不過老公之後死咗唔知關唔關佢拜的師父事，聽聞佢已經開咗陰耳和陰眼，我本身唔識佢，我都係聽霞姐講的！
重有中蠱和拜陰神係兩單不同事件，只不過係在我身上同期執行姐！

已分享完畢，我已步入修練之路，每天打座，展開人生的另一頁，最起碼我和家人挽回健康，我奪回被侵吞的靈魂，回復清晰的思維，囗齒！但修練的旅途上，會遇上很多打擊，考驗，磿鍊意志，企圖打沉修練者的堅持與信心，但每能過渡一関，也能精進一些，這是當時人才能感受得到！

為了私慾貪念，去借助外力，同魔鬼交易，最终只有得不償失！小女子敢斷言，跟本设有一間是正廟，真正的神靈不會希罕金錢衣紙，香火，三牲酒禮，亦不會作為凡人的求财工具！這些只是靈界需要！
正神存在於宇宙中，天地中，心中！不存在於廟堂中，神像中，商店中，神棍的囗中和神壇中！

問：一口氣看畢全文, 很為您高興重過新生活, 但很無奈人真很醜惡.....我們活在什麼世界下呢 ?

回：辛苦了，殷師太，希望看到你的帖的人，都能獲得經驗借鏡，不走迂迴的路。修煉確實辛苦的，也崎嶇，能遇上涼的更難，希望每個人都能找到他她靈魂的歸宿。

問：對！梁師傅，能遇上凉的，正確的，來自宇宙的，巳很難！
得到了肯用功堅持的，更難！

問：多謝分享，本身我也遇到這奇異的事，頭上響下不少問號，也遇到有心人幫忙，雖然現在也不確定是否痊癒，只能不停提醒自己静心，希望事情已告一段落

回：有空也可寫寫你的異事，讓大家從別人中獲取經驗。

參考資料來源：http://www.leungjingyuen.com/forum/viewtopic.php?f=3&t=3311