Gō͘-goe̍h cha̍p-gō͘ thàu-chá-khì , gō͘-tiám thóng bô kah cha̍p-gō͘ hun, chúi-khì chiâⁿ-tāng ná beh lo̍h-hō͘ ê khoán. Thang-á-gōa ê chiáu-á-siaⁿ hiàm góa cheng-sîn.
Siā-khu thâu-chêng ê gîm-chîⁿ-tiâⁿ khòng-khoah bô-lâng chiàm-ūi, tú-hó ē-tàng sió-khó-á chò 1-ē-á ūn-tōng. Bô kàu 10 hun tō lûi-kong ná tân hō͘-chúi ná tih-tih-tu̍h-tu̍h nāu-jia̍t--khí-lâi. Lán kiò-sī Thiⁿ-kong thiàⁿ--lán teh lo̍h-hō͘ ak-chúi, soah m̄-chai sī I teh su-liām A-hôa ê ba̍k-sái bùn kah kui-sì-kè, to̍k-to̍k lín chia-ê bô-sim-koaⁿ ê m̄-chiâⁿ-lâng teh hoaⁿ-hí khèng-chiok, khèng-chiok bô-chèng-gī ê siā-hōe koh tit-tio̍h hō͘-chúi ê chhiâⁿ-ióng iân-chhiân sèⁿ-miā.
A-hôa lī-khui í-keng 34 tang ah, kap Nylon kāng-khoán, lán lí-sióng ê siā-hōe kám ū koh-khah chiâⁿ-iūⁿ ah？ In 2 lâng ǹg-bāng lán ē-tàng khí-chō ê Tâi-oân-lâng kok-ka kám ū koh-khah-chē lâng ka-ji̍p lâi pī-pān ah？Góa kan-na khòaⁿ tio̍h lú chē siàu-liân-lâng chú-tiuⁿ 「Tâi-oân sī 華人自由燈塔, kóng 中國話 sī lán siōng-tōa ê kiōng-sek」chit-khoán ê siaⁿ-sè lú lâi lú chē, phah-piàⁿ Tâi-oân kiàn-kok ê lâng lú hông phì-siùⁿ kap pâi-thek…… Bo̍k-koài kin-á-ji̍t thàu-chá-khì tō teh lo̍h-hō͘, tân-lûi-kong, lán kám iáu-ū lâng iàu-ì siā-hōe ki-chân Tâi-oân-lâng ê ǹg-bāng？ Kám iáu-ū lâng iàu-ì Tâi-oân bîn-cho̍k ê ǹg-bāng？ Kám iáu-ū lâng teh iàu-ì A-hôa kap Nylon chāi-siⁿ sî-chūn ê lí-sióng kap kià-bāng？He kám sī kō͘「Giân-lūn chū-iû」tō ē-tàng kái-soeh chiâu-chn̂g--ê？
