尪誰？

Lán e̍k-chêng chit kúi tang tiāⁿ-tiāⁿ tī tián-sī téng-bīn khòaⁿ tio̍h 1 ūi chū-chheng sī Bí-kok Tāi-ha̍k kàu-siū ê 「尪 sian-siⁿ」, i kóng ka-kī sī só͘-ūi ê Bîn-chìn-tóng chi-chhî-chiá, ta̍k-put-sî tī bāng-lō͘, mûi-thé cheh-bo̍k phoe-phêng tiong-kok-tóng ê hêng-ûi kap giân-lūn. Lán kiò-sī i kap lán khiā kāng-pêng m̄-koh sî-kan kú liáu tō chai mê-kak. 

Thâu-khí-seng i tō-sī iōng ké-miâ teh bāng-lō͘ kap lâng lūn-chiàn, bóe-chhiú lú bú lú tōa-tiâu liáu hông kò chiah kam-goān pò ka-kī ê chin-miâ-jī, che i teh kò͘-lū siáⁿ-mih lán bô thang-chai, m̄-koh siōng-bô lán tō ài kéng-kak chit-ê lâng bô si̍t-chāi, m̄-sī chin-chiàⁿ ū tam-tng ê phêng-lūn-chiá, káⁿ chò m̄-káⁿ tam-tng (bóe-chhiú kong-khai mā m̄-sī i chū-goān--ê).

Koh lâi tō-sī i teh phêng-lūn chèng-tī ê sî-chūn (kong-khai tiûⁿ-ha̍p) kō͘ chêng-sū sò͘-kiû khah-chē lí-sèng kap kiàn-siat-sèng ê kái-phòa, che tō-sī tn̂g-kî lán chèng-tī phêng-lūn cheh-bo̍k siōng kah-ì mā chin kē-lō͘ ê chú-iàu in-toaⁿ. I í-keng sī 「Bí-kok kàu-siū」ê khám-chām ah, kàu taⁿ iáu-koh teh bú chit-thò beh chò phêng-lūn chiūⁿ sin-bûn, oân-choân m̄-sī teh kā Tâi-oân mûi-thé khoân-kéng tàu kái-chìn, mā bô kā i tī Bí-kok o̍h tio̍h ê chìn-pō͘, bîn-chú kè-ta̍t tián thn̂g hō͘ kò͘-hiong ê Tâi-oân-lâng, tian-tò sī lú cheng-ka lán ê chhiong-tu̍t kap mûi-thé hèng oan-ke ê chōng-hóng, ū-iáⁿ sī lâi loān--ê. M̄-chai sī beh kóng i bōe-phok ké phok a̍h-sī thè-hiu siuⁿ-êng bóng ōe-sian? Chit-khoán lâng án-ne bú kám chin-chiàⁿ tùi thó-lūn siā-hōe gī-tê ū pang-chān？

Koh lâi tō-sī i tùi Tâi-gí-bûn (POJ / lô-má-jī) ê thāi-tō͘ mā-sī chin pó-siú, sīm-chì sī chin hoán-tùi, i ka-kī mā bat kóng 「bûn-jī tō-sī kang-kū niā-niā」, Tâi-bûn sú-iōng-chiá tùi i ê kiàn-gī kap chit-gî, i lóng kăng tòng-chòe sī hoán-tùi-chiá, khí phùi-bīn hām lâng oan-ke. Tùi Lô-má-jī hē-thóng ê thāi-tō͘ ū-iáⁿ sī bōe-su khòaⁿ tio̍h kúi, bōe kham-tit lâng ka chí-kàu, che kàm tō sī 1 ê 「Bí-kok tōa-kàu-siū」ê ki-pún sò͘-ióng？ Chit-tiám mā-sī góa jīn-ûi bōe-tàng sìn-jīm--i ê lí-iû, in-ūi i ê hêng-ûi bô chhiūⁿ 1 ê tī bí-kok ha̍k-hāu kàu-ha̍k ê ha̍k-chiá, tian-tò chhin-chhiūⁿ í-chá kok-hāu lāi-té hit-khoán pó-siú ê sian-siⁿ, i ê koân-ui siōng iàu-kín bōe-tàng chit-gî kap hoán-tùi, m̄-chai kám hām i khì tiong-kok  hit-tōaⁿ sî-kan ū koan-hē, che iā-sī góa chin giâu-gî ê só͘-chāi……Hoān-nā ùi tiong-kok tò-tńg-lâi koh sí-ah-á ngē-chhùi-phóe--ê, lóng bōe sìn-jīm--tit.