查某孫出世，嬰仔佮老母攏平安，紲落來就是號名這件代誌。
未生進前，查某囝佮囝婿就佇參詳號名的代誌，我嘛共我想著的名傳予查某囝做參考。
囝婿的爸母去請相命師號名，傳幾若个名來予囝婿做參考。落尾，囝婿共in想欲號的名傳予伊的老母看，老母傳轉來的意見是：「相命師講，其中有帝王的名字，無適合查某囡仔。」
啥物？是啥物意思？我共查某囝講，可能其中有一字的邊仔爿是「禹」，禹是「帝王」，袂使用做查某囡仔的名？
阮查字典，彼字的意意是:「質地似玉的美石」，「玉佩」耶！
原來人佇講適合查某囡仔佮適合查埔囡仔的名是按呢喔！查某囡仔的名愛溫柔、共人鬥相共的，袂使家己出頭。
查某囝講：「in毋知嬰仔的老母就是領導者，做頭仔。按呢我就一定要號這个名。」哈哈！
