不專業足球筆記（十四）︰利華古遜破拜仁壟斷 歷史性德甲封王
1. 通常我既足球筆記既開頭都係講香港波為主，但啱啱過去呢個星期，歐洲四大聯賽入面德甲率先出爐咗聯賽冠軍，德甲奇兵利華古遜歷史性取得德甲冠軍，咁就講講佢哋先喇。
2. 啱啱果一輪聯賽，我諗大部份非拜仁既球迷，應該都好期待利華古遜奪冠既一刻。無他既，因為呢個德甲冠軍係利華古遜自1904年成立一百二十年以黎既首個德甲聯賽冠軍，而且佢哋成功挑戰巨人成功，打破咗拜仁慕尼黑響德甲十一年黎既壟斷，花生fans梗係鍾意睇到呢啲以弱勝強既賽果喇。
3. 結果利華古遜都冇令大家失望，佢哋以五比零大炒雲達不來梅，主場捧盃而回。而佢哋今次首奪德甲，亦令到今季加盟拜仁慕尼黑諗住一賞冠軍心願既英格蘭隊長哈利簡尼仲要繼續等一等喇。
4. 我曾經以為意甲既國際米蘭係最有機會做四大聯賽入面最快捧盃果隊，不過拜仁自從輸咗場六分波比利華古遜之後，佢哋表現就更加唔穩定，變相最後利華古遜最後提早五輪封王。
5. 講下外流港將既表現喇，今季兩位新加盟中超既兩位中超新丁安永佳同埋周緣德都有波入。無獨有偶，兩人所效力既深圳新鵬城同河南隊都以一比一賽和對手。
6. 安永佳同周緣德入果兩球其實都唔算係靚波，都係混戰中執雞同射入，但係響中超入到波已經好難得，希望佢哋繼續黎料！
7. 唯一比較可惜既係效力滄州雄獅既孫銘謙，響頭四場都係正選出場之後，尋日連續第二場坐後備，仲要冇得出場。咁多個港隊球員入面，我最欣賞就係佢，希望佢可以快啲再次有上場既機會喇！
8. 講起外流港將，謝家強效力既Radcliffe Football Club拎到Non-League Premier Division(第七級)冠軍。而我從球圈朋友中聽過安達臣對於謝家強響呢個聯賽打滾完唔夠一年竟然跟唔上港隊訓練強度黎睇，其實呢個聯賽既強度都唔高，但拎到冠軍始終係開心事黎，梗係要開心share一下喇。
9. 值得一提既，係謝家強自己要事業發展先離開香港返英國既，唔存在佢球技退步先被逼踢業餘波，雖然係好可惜(因為響亞洲盃外圍賽既時候安達臣講過，謝家強係佢手上最強既中堅)，但都祝願謝家強英國事業成功，一家來也融融！
10. 仲有一個比較值得一提既趣聞，就係U23亞洲盃分組賽，日本隊對中國隊既分組賽上面，竟然出現咗現實版健威既場面，認真搞鬼。
11. 事緣係日本隊開波冇幾耐已經領先一球，但係佢哋既中堅西尾隆矢一下完全完全冇必要既肘擊食咗紅牌，令到日本全場陷於被動。不過中國雖然佔盡優勢，但都係撕破唔到日本既十指關，於是佢哋就諗到派出兩米既二號門將于金永做中鋒，不過好可惜果陣都已經係88分鐘，最後都係冇用。
12. 雖然好似好搞笑，但中國U23教練成耀東就話其實于金永係前場出身，因為身高先比人叫咗去做龍門，佢哋都排練過佢用中鋒既陣式，係秘密武器咁話喎。
13. 今次先講住咁多，下次再見。
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
#不專業足球筆記 #專欄 #足球專欄
#利華古遜 #拜仁慕尼黑 #德甲 #拜仁 #安永佳 #周緣德 #中超
#孫銘謙 #謝家強 #U23亞洲盃 #日本對中國 #亞洲盃 #西尾隆矢
#紅牌 #肘擊
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
thread: https://www.threads.net/@leafopen3
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
