出門行跤花前幾日，m̄ 知啥物因端我 kā 翁借我讀資訊 ê 面冊口座按家己 ê 筆記註銷。
這久搜揣彼久 ê 心情猶原 m̄ 知呔討按呢決定，就 hōo 過了代跟綴消失 ê 時間旅行免閣 uī 伊踅金龜磨愖仔愖，總是目今 ê 變化 hōo 我好玄甲，伊是按怎培養交按怎慣勢？畢竟我是一个真𠢕 tuì 家己點磺火 ê 人。
這斗出門行跤花進前，準做出門忝甲貼貼轉來到厝，無牢 tī 遮我 buē 放家己收煞。這斗出門行跤花轉來，準做規日閒甲貼貼 mā buē 閣情緒叨撚講「部落格猶有遐 tsuē 現世 ê 文章，是按怎猶有法度遮爾仔貧惰骨。」
是發生啥物代誌？畢竟我無要意數字。
一日金烏猶原猶未修面，金金 ê 長鬚 tshan-tshiūnn 鼓吹花，番仔藤(槭葉牽牛)順窗仔門聊聊仔牽藤到我魂舒，我隨斡頭傱到客廳提相機，自在䖙 tī 膨椅 ê 日鬚隨無見人。
「秋仔你呔 tsiah 孤佬」那呻那 kā 相機收轉去囥，「水雞愖來久，跳來遠」秋仔講。
水雞愖來久，跳來遠....水雞愖來久，跳來遠......我敢有遮爾仔無時閒 kā 舞豬舞狗舞甲峇拄峇.....
擔頭看幔殕色風幔 ê 秋仔，海馬恬靜泅去部落格 ê 後台問「遮 ê 草稿底時 bueh 完成？」
「水雞愖來久，跳來遠」成做麻仔鎖匙引𤆬我行向勻勻仔 ê 自在。
俗語講 buē 五日粽，破裘 m̄ 甘放，四常 ê 德國節氣行到夏至 tuì 人猶 tī 帕水就 hōo 亞熱帶氣候晟養大漢 ê 我猶是涼涼愛疊領薄長䘼仔衫。
今年穀雨無來，立夏猶未行跤到 ê 德國有日鬚行踏 ê 時間已經熱甲 26 度 hōo 我成做日頭花獅仔齒，四界曝烏魚子行跤花。
舊年栽紺草花，今年栽麥仔，舊年栽麥仔，今年栽番麥，那曝烏魚子那認踮臺灣從來 m̄ 捌要意 ê 鄉土，外國 ê 月娘(臺灣)確實較圓較媠。
「西班牙 hōo 我感覺足自在，無像德國」巡人兜田園想著臺灣因為德國 hōo 我流喙瀾，海馬隨泅去翁某做陣討論白露抑是秋分落南去西班牙抑是葡萄牙 ê 對話。
「德國確實是較特別寡，至少以我跍過 ê 國家無一个所在 tshan-tshiūnn 德國按呢，你明明就講德語，對方閣 ē 特別熱情提醒你講德語」聽翁驚我反悔 buaih 去西班牙抑是葡萄牙，開始下性命做說客，我唯一想 ē 著 ê 反應就是 hōo 伊 m̄ 知影愛按怎紲話 ê 這段話。
歐盟自 2011 hōo 臺灣入境免簽證 ê 福利，見來德國交伊做翁仔姐，gún 就捷訂 Ryanair 去西班牙蹓蹓行行，總是我無德國人 ê 喙斗有才調田螺巡舊逝，較行 mā 仝款像翁 ê 朋友逐年 ê 長途旅行孤Mallorca 一位無變化，2011 人 tī 泰國 mā 搪著一位連續 12 冬齊來泰國曼谷歇假 ê 瑞士小姐。
食食無法度外甥仔點燈火，一切照舅(舊)，旅行 mā 相𫝛 ê 我連續三冬飛西班牙 hōo 我鼻仔塞牢需要交伊分手➀ hōo gún 翁 tī 這 12 冬感覺心破一大空需要去西班牙補心網。12 冬後 ê 我願意 kā 按算 ê 匈牙利交保加利亞轉做西班牙，坦白講孤孤 uī-tio̍h 這搭有納錢 bué 空間 ê 部落格有新一个新國家通展風神，另外 gún 翁提議 ê 聖雅各之路 mā 吸著我 ê 興趣，準做 gún 無按算行 Drei Wege - Tres Caminos 任何一條路，gún kan-ta 按算直接行踏上顯明 ê 目標。寫著聖雅各之路，我屬世俗人無綿豉 ê 意志行一逝 Tres Caminos m̄-koh 這齣按 Bibel Tv 看 ê 影片，非常推薦 hōo 無拄好泅來遮 ê 生份朋友。
「當 gún 小妹決定釘根踮西班牙，我 mā 足想 bueh 跟綴伊 ê 跤步，總是我有兵役問題」驚我有兩樣心，半路退悔 ê 翁緊 kā 小妹自在 tī 西班牙過日子 ê 代誌搬出來。
「目今 ê 伊是西班牙人 m̄ 是蹛 tī 西班牙 ê 德國人，你感覺伊敢猶原自在無壓力？」我問。
「臺灣 mā hōo 我感覺足自在，無像德國」伊知影我 ê 14 隨換舌講臺灣 ê 自在。
「你 tī 臺灣 m̄ 捌蹛超過三月日，你是以遊客身份行踏臺灣，掠日咱轉去臺灣蹛一冬，看你敢閣 ē 按呢想，總是我相信臺灣猶原比恁德國好鬥陣 buē tuì 講台語抑是華語 ê 你講，請講台語抑是華語」我講。
外國 ê 月娘永遠比家己 ê 故鄉媠閣圓，無出門一逝正港 buē 感覺家己 ê 月娘媠閣圓，是講呔討來到德國感受遮爾仔深？那巡田園，那看田栽，那喃來喃去，機身顯明 ê Wizz Air 按頭頂畫一條白線，tshan-tshiūnn 我一路喃來喃去 ê 話絲 tī 閣莽莽 ê 天揣無一蕊雲做對話。我 tī 德國送出去 ê 喙帆比 tī 美國交印度閣較低，而且低甲連蠓 mā buē 倚近。
Wizz bueh kā 人載去佗位，當我跟綴 Wizz ê 煙尾飛，頂月日交翁做陣巡田園伊講是彼坵是玫瑰萵仔菜栽，我講彼是若木耳 ê Eichblattsalat 栽 mā 飛入我 ê 目睭仁，啊，正港是木耳生菜，緊翕一張相寄 Telegram hōo 翁看白紗網掀開自在曝日頭 ê 菜栽是佗一位。
「Siehst du, ein Lila, bitte」交台語相𫝛兩光 ê 德語送出去，順大滷湯 ê 味素 tuì 木耳生菜流喙瀾，啊，我想著矣，我有才調按戇皮包戇餡成做識皮包識餡，齊是喃來喃去 ê 成果，這款自在做家己，規矩過生活莫四界牽拖 ê 人生態度，gún 翁敢有才調莫開菝仔票，踮臺灣生活無到一冬隨喝「我 bueh 交你臺灣切甲透底，臺灣 hōo 我無自在。 」
那巡舊年 ê 草花田今年 ê 麥仔田，天頂彼條按 Wizz 掖落來 ê 煙絲 mā 散做無色無形無味 ê 往過，我有才調享受寂寞稀微，捷 kā 需要恬靜空間 ê 翁敢有才調？Hm̀，按伊喝 Instagram 口座 bueh 刣掉到今猶原規欉好好，無剉交一堆網路口座來看伊 ê 享受寂寞交稀微，彼是較早睏較有暝。
目今 ê 伊反對面冊，反對 Instagram，反對 Google 遮 ê 普世 hőng 黏黐黐 ê 楚門➁互動，簡單一句遮 ê 世界無照伊 ê 需求行，所致伊需要一直向外追求伊認定 ê 美好。像痞客邦 hōo 伊想像，所致伊來到痞客邦設立口座，當伊發覺痞客邦無法度帶 hōo 伊滿足，伊隨講我若閣跍 tī 遮就交英國 AI 喋詳阿媽 hōo 詐騙犯白了工、浪費時間。
我 tuì 西班牙彼三冬 ê 記持，少甲連臨時臨曜決定行踏 ê Andorra 攏比伊 tsuē 閣較清楚，除了想著粉紅仔粉紅 ê 伊，我 ê 記持 tsiah 有才調清楚牽藤到我人 tī 西班牙 ê 佗一搭，記持呔討按呢生，我想交我無老人食麻油雞，愛腦熱(熱鬧)有相干。彼三冬 ê 西班牙行跤花，無儉 tī CD ê 幫贊，我 ê 記持捎無彼陣 ê 我 tī 德國、荷蘭抑是西班牙。
目今 ê 電腦若猶有才調讀 CD 相片，我敢猶 ē 答應今年來去西班牙？
我 m̄ 知機，總是巡田園，翻田園，舊年 ê 紺草花田今年 ê 麥仔田宛然 2022.10.24 心情練跤花，我猶原是彼片田，我清楚知影我 ê 角色，我 buē 因為任何變化成做任何生張，m̄-koh 我 ē 順遮 ê 變化沓沓仔修正我 ê 無四序，像戇猴搬石頭，食飽傷閒，自揣麻煩 kā 好好仔 ê 日子舞甲隱痀拋捙輪，食力閣歹看。
這久 ê 我學習著寫部落格是做議量 m̄ 是拚連署。是，拄開始寫部落格我有一个龜怪 ê 認定，空間 bué 落去無好好仔使用傷過無彩人物，這久認為準做杜猴損五穀愛我一月日使用甲 15g 彼是較早睏較有暝 ê 代誌。
痟貪真正 ē 軁雞籠，不過順家己 ê 跤步做事工，Tsiâ 是愛食米粉 ê 缺喙，沓沓仔就看現現 hōo 我捎著寮仔門來開，莫舞死家己。
➀ Ich habe die Nase voll, die macht mich fertig.
➁ Sea Heaven在哪裡？請去問那位「真實的人」von Hái 佇遮啦！
