〈渡自家行尞，行心 ê 路〉
朋友問我人 tī 佗落？
我講，人 tī 波蘭。是按怎你 bueh 講台語？
呔討 buaih 講？
波蘭敢 tī 歐州？
是，伊是德國 ê 厝邊。
照實講，我 hōo 伊 ê 問題掣一趒。
呔討你 buueh tuì 我講台語？
自 gún 熟似到今，gún 攏講台語，我 m̄ 知影自底時愛交伊以華語破豆，m̄-koh 當伊講「波蘭敢 tī 歐州？」我知影，我 m̄ 免 kā 伊講 ê 話囥踮心肝底，伊 m̄ 是第一个抑是上落尾一个 ē 按呢節世界 ê 人，講英文抑是華語 ê 人攏較有水準。
比論講，tsuē-tsuē 知影目今 ê 我家甲暫時寄踮德國 ê 人一見面九分一 ē 按呢 tuì 我講「我掠做你已經 buē 曉講讀華語，所致，m̄-tsiah 交你講英語。」
一寢開始，我攏準做這是笑詼，沓沓仔我發覺，這是....無意神 koh 咸(Hân)豐三講到今，m̄-koh 我想著這段話....
„Aber Deutschland war damals primitiv. Als ich England verließ, mit seinem schönen und behaglichen Leben (jetzt hat es Deutschland bis zu einem gewissen Grade nachgeahmt), dachte ich: Muß ich wirklich in diesem unzivilisierten Lande leben? Soll dies meine Heimat sein? Aber ich gewöhnte mich daran, alles von der scherzhaften Seite zu nehmen.“ von Daisy Hochberg von Pleß
M̄-koh，彼久 ê 德國猶原真古樸。當我離開美麗閣四序 ê 英國（德國現此時 mā 沓沓仔 tī 幔英國衫），我 tī 想：我敢誠實愛蹛 tī 這个 猶未開化 ê 國家? 遮敢應當成做我 ê 故鄉？不而過，我已經真慣勢用剾洗 ê 角度來看待一切。
你會使得 tuì 你無認同 ê 事事項項看 buē 入眼，你會使得 kā 你感覺較高貴 ê 物件穿 tī 身軀，感覺家己 tsham 別人無相仝，不而過你猶原是你，準做蹛踮德國 ê 我 mā 清楚知影，我無可能 kā uì 台灣來 ê 語言 buē 記得了了，像嫁去美國 40 外冬罕得轉來台灣 ê 表姊，伊 ê 台語從來 m̄ 捌因為英語成做第一語言舌就接 buē 轉來過。
這是 2021.09.09 tī 一个角勢分做波蘭 ê Cieszyn 交捷克 ê Těšín 所寫 ê 心行尞，斯當時以無輾轉 ê 德語做記錄，轉來德國家私 tsiâu-tsn̂g 那翻譯做台文 mā 那請線頂台語辭典 kā 我鬥掠漏一審二審三審閣再審 ê 結果。
水，這个物質從來 m̄ 捌固定，每一个人 tī 家己 ê 部落格齊愛揣著避靜佮自在。2025 巡田園翻菜股，2021 ê 雺霧煙消雲散離，行跤花留 hōo 行跤花，心行尞留 hōo 哲學路 19 號，渡自家行尞，行心 ê 路。別人 ê 磺火燈無適合需要維生素 A ê 我，另外我 mā 沓沓仔理解，世間有太 tsuē 咱掠做熟似窮實一屑仔攏無熟似 ê 事項，像圖像 ê 阿波羅，規个導覽聽煞我猶掠伊是希臘太陽神 hōo gún 講「你有大細心。」
我接受家己 ê 大細心，自然 mā 接受別人 ê 大細心，總是大細心後 bueh 繼續 m̄ 捌字看告示，乞食攑蠓捽，假仙假觸抑是清垃儳物齊是個人選擇。搪著問題，我個人 ê 慣勢是清垃儳物。
〈修理紗窗，修理紗門〉
今仔日收著批想講 m̄ 是講 10 月 tsiah-ē 通知，是按怎這久就通知，我敢誠實有寫甲 tsiah 䆀才，m̄ 著，應當是我無 kā 伊斟酌繩清楚愛閣看一擺。
早頓食飽隨閣熥一斗電子批文件，果真，葫蘆墩白米，無錯(糙) 我 kā 豬母牽去牛墟看 m̄ 著。
認真 kā 文字繩 hōo 齊隨想 bueh kā 伊放風吹，畢竟我手頭 ê 剃頭刀有法度 kā 樹剉掉，彼是奇蹟。
當我按呢想隨看著 Muse 手捾五彩繽紛 ê 花草行跤到閣 kā 𪜶送 hōo 我，我目箍含真珠說(suat)多謝，隨越轉身行入灶跤將珍珠落鼎烰閣那烰那敆手頭 ê 花草。
一睏仔久後，一鼎我家己感覺滋味上讚 ê 真珠奶茶已經貯 teh 甌仔內 bueh 請遠兜 ê 生份人客閣試一斗滋味。
翁行倚來講「你 m̄ 是喝 Muse 無來行踏，你寫 buē 出來今呔 ē 遮爾仔緊就寫好勢。」
「你永遠 m̄ 知影你 ē 提著啥物口味 ê tsioo-kóo-lè-tòo」我笑講。
「按呢聽起來寫 Blog 誠實是一个好習慣」翁笑講。
「我 mā 是按呢感覺。」
正經寫部落格是好慣勢，伊 hōo 我 m̄-nā 有所在哭呻 mā 有所勢翻草，上蓋重要 ê 代誌是，tī 遮我總有法度揣著一寡 543 通翻草佮薅草。
第一斗參加文學獎投稿掠做只要 kā 紙本寄出去就完成報名 tshan-tshiūnn 囡仔時 hōo 老師鼓勵甲興著冊(tù-tsheh)興投「國語日報」ê 文章若有入格，紲落來消息自然來，所致當我讀著文學獎舉辦單位寄來 ê 電子郵件通知確實掣一大趒，現今 ê 徵稿文化遮爾仔無相𫝛。食飯飽電子郵件閣讀一斗，原來目今 ê 編輯需要電子檔，緊 kā 電子當寄出去，賰 ê 交 hōo 時間去決定。
〈拍麻雀桌 ê 陳守娘〉
自囡仔時，我就是麻雀桌專門納學費 ê 褲袋仔貯磅仔 ê 戇阿舍，因為這段無 hōo 朋友棄嫌肉跤筊伴莫來相伴 ê 經驗，致到這久 ê 我 m̄-tsiah 有才調理解人稱「台文里長伯鄭順聰先生」分張 ê 台語學仔麻將台語牌跤盤喙花， 順紲翻頭揣序大過年時耍四色牌抑是天九牌 ê 記持，紲落來 buē-su 探偵 Sherlock Holmes 搝著摠 mā 解題 ê 萬分確定，奕牌仔 ê 人格表現是一个人上實在 ê 性地。
牌友 A. 人媠體格讚喙水又閣好甲 hōo Freelance ê 伊從來 m̄ 捌驚惶揣無生理通做，不而過一上麻雀桌，好禮閣客氣 ê 志玲姊姊隨成做陳守娘，m̄ 是合該然講伊 ê 人格變化比 24个Bily(The minds of Billy Milligan)閣較精彩 hōo 我理解閱讀 Daniel Keyes ê The Fifth Sally, The Minds of Billy Milligan, The Milligan Wars ê 僫理解，順紲認捌家己 ê EQ 正港有夠好。這交我清清楚楚知影家己願意參加「麻雀會」ê 因端有關係，我 kā 麻雀會當做食茶破豆看人畫山畫水 ê 變工藝。畢竟我 ê 朋友是少甲倒手 ê 手指頭仔捎出來算猶有賰。
寫著奕麻雀 ê 性地 m̄ 知交家庭教育敢有相干？我 ê 芋仔爸出門奕麻雀 mā 是按呢生，有位通耍就耍，無位通耍就交人食茶破豆網晝山畫水，食飯時間一到隨轉來厝款飯頓 hōo 猶未退休 ê 牽手有燒烙 ê 飯頓通享受。麻雀桌 ê 朋友有人 ê 芋仔爸是出門耍麻雀中間有轉來厝裡行行看看是佛祖有保庇。
十外冬 m̄ 捌交遮 ê 朋友做陣耍麻雀 m̄ 知影交我相𫝛齊添歲 ê 𪜶， tī 麻雀桌 ê 性格變化敢有因為添歲較 buē 遐爾仔𠢕 tuì 人情緒叨撚兼起磺火？
