Tī 鄭順聰先生 ê 面冊讀著伊將華文「人和刺蝟是無法溝通的」轉譯做五組台文句 hōo 逐家做選擇。
我個人是選B「人和針鼠袂參詳得」。
一个若是連「參詳」攏無法得接受，伊應該是意神 tī 半暝看天 ê 聬儱䆀猴，致到佮伊參詳宛然請老人食紅蟳仝款白請 mā 白講，順紲 kā 這段文句翻譯做德文佮英文，不過這段翻譯是經過寶島鼓仔燈一个族群 ê 文化，你愛用伊 ê 語言思考 ê 點拄。德文原句 Menschen können nicht mit Igel kommunizieren
文化語言思考 Mit dem Igel sprechen, ist mit dem Stacheln sprechen.
英文原句 People cannot communicate with hedgehog
文化語言思考 Talking to the hedgehog is talking to the sting.
德文交英文 m̄ 是我自來 ê 語言，德文部份有才調無料請教母語是德語 ê gún 翁，伊講第二斗翻譯較敆德國人喙斗 durch die Blume 轉彎踅角 ê kā 好天舞甲罩雺。對面厝邊是美國北約軍人，準做熟似 mā 歹勢請𪜶 kā 我鬥看文句敢有英文氣味，所致滓有華文氣味是四常。
寫 bueh 6 冬 ê 部落格沓沓仔捎著寮仔門通開，Muse 無來相揣 ê 日子就巡田園翻田塗，巡著這篇文章想著 Die Igel 敢若有按「刺球豬」沓沓仔定名隨上網請教，目今 ê 台語按怎講並記錄。
台語 針蝟 Tsiam-uī
德語 Die Igel
英語 Hedgehog
華語 刺蝟
順跤跡想著 Arthur Schopenhauer 敢若是寫 Die Stachelschweine m̄ 是 Die Igel，我又閣成做一隻好玄彼隻鳥鼠是按怎 buē 振 buē 動 ê 貓，本底是 Die Stachelschweine 呔討換一个語言成做刺球豬、針蝟。
Auf Englisch wird das von Schopenhauer beschriebene Problem hedgehog's dilemma, auf Französisch dilemme du hérisson genannt; beides heißt wörtlich auf Deutsch Igeldilemma.
英語 kā 伊寫做刺球豬困境是按法文 ê dilemme du dérisson 來，雙者表示德文 ê 刺球豬困境。
資料來源 Die Stachelschweine (Parabel)，維基百科
原來如貓，按呢英語交台語 ê Die Stachelschweine 按怎講？
台語 刺豬
德語 Die Stachelschwein
英語 Porcupine
華語 豪豬
按呢德文按怎寫？kā 鳥鼠按正爿反倒爿，倒爿反正爿，原來如貓。
1. Die Stachelschwein
2. Die Stachelschwein
第一斗見著針蝟是人 tī 荷蘭 ê 露營區，伊細隻甲真正像鳥鼠按我跤兜趖去草仔堆，後來交伊見面大多數是成做打馬膠肉餅 ê 伊。慣勢伊生甲若鳥鼠大細，2014 tī 瑞典見著若球 ê 伊，一時掠做伊是刺豬驚甲跤軟 m̄ 敢烏白亂動 hōo 伊先過，按瑞典落南轉來德國閣踅去波蘭翁仔姐做陣 tī 田庄路行跤花見著一隻拄做肉餅無偌久 ê 刺球豬，gún 翁講這隻合該然是準備過冬食過頭，身體 buē 堪m̄-tsiah 去做仙，我順伊 ê 手看確實無任何外傷 ê 刺球豬看，雄雄想著 tī 瑞典搪著 ê 彼隻刺球豬，隨攑手發問「𪜶需要歇冬？」
「自來就愛」翁講。
「台灣有人飼刺球豬，𪜶無歇冬」我講。
「凡勢品種無相仝，歐洲 ê 刺球豬交熊仝款寒人來進前愛食甲若籃球，熱人來愛瘦甲若棒球。」
我順翁 ê 分拆斟酌看大自然分解萬物雄雄喝一大聲「原來彼暝搪著 ê 籃球是伊。」
「你呔知」準做我是田庄低路人猶是 buē 堪得 hōo gún 翁這類都市工業人笑我無田庄智識。
「學校攏有教」伊應。
我 ê 學校教啥？莫捎出來比並較 buē 現世。
立夏交換手 hōo 小滿，農民期待 ê 雨水無來，我向望伊來行踏 ê Muse mā 無來挨拶，露營車日子、行跤花 mā 無興搜出來整理，攝影 ê 食譜交猶未完成 ê 2014 瑞典挪威露營車日子 mā 暫時揣無鳥鼠無洗身軀，有鼠(趣)味來做記錄，就來巡田園翻田塗，看有啥物草愛挲愛薅無。
順田岸路巡文字稜，巡著這篇本底記錄 tī 添寡咖哩就是 Bombay 醬 ê 食譜，確定這味屬於德國想像 ê 印度料理 buē 閣出菜就 kā 伊交早先 mā 徙栽 ê「人和針鼠袂參詳得」敆做一篇，起因故事主角交針鼠➀仝款免參詳。
2021 順台文里長伯 ê 網址探訪伊 ê Medium，順 Medium 讀伊 ê 里長行尞錄，其中一篇寫著伊慣勢一本冊讀幾仔个版本，我 mā 是，紲落來跟綴這个主題想著彼兩本家己咱寶惜別人卻大大典典 kā 伊當做草紙 ê《喀布爾美容學校》佮《茶花女》（La dame aux camélias ），然後順這兩本冊 hōo 家己發現家己交這位朋友窮實是 Die Stachelschweine。學生囡仔因為環境成做姊妹仔伴，出社會因為慣勢繼續成做姊妹仔伴，押尾因為人生方向無相仝，準做無想 bueh 𤲍做伙現實環境猶是 hōo 咱成做保持距離 ê 姊妹仔伴，畢竟對方 m̄ 是拄熟似 ê 人。除非，對方 kā 你當做塑膠，你寶惜 ê 距離 tsiah 有機會恬靜蛻變做屬於家己孤門 ê 社交，像這段話 Wer jedoch viel eigene, innere Wärme hat bleibt lieber aus der Gesellschaft weg, um keine Beschwerde zu geben, noch zu empfangen. 本身有夠熱量 ê 人，佮意交社交保持距離，無分張哭呻 mā 無建議。
囡仔時痟《尼羅河的女兒》總是褲袋仔袋磅子無錢通去尪仔冊店借，仝班同學厝內較好過日子 ê 人拄好有我痟想 ê《尪仔冊》開喙 kā 𪜶借，捷愛經過剾洗 tsiah 有機會讀 10 分鐘，hōo 我大漢搪著人來借冊目頭 m̄ 捌結過一條線隨講「好」借出去掛 m̄ 捌限制時間歸還。所致我 ê 書櫥捷有朋友來借冊，畢竟𫝛款 ê 冊去圖書館借轉來讀愛讀甲若趕尾幫車。
一回做直銷 ê 朋友來 gún 兜行踏，見著生份 ê 阿富汗故事《喀布爾美容學校》隨講 bueh 借轉去讀，我隨 tìm 頭講好 hōo 伊直銷做無成 m̄-koh 紮一本冊轉去做無形業績，後來伊陸續來做直銷，我 ê 手骨無夠粗無才調成做伊 ê 顧客，伊離開進前看著《茶花女》（La dame aux camélias ）講「這拄好適合 gún 兜囡仔讀敢會使得借我轉去 hōo 囡仔讀」，我無加想隨應好。這兩本句按 2009 借出去到今 m̄ 捌轉來，準做伊半路步頻想著愛 hâinn 我。
「我這馬 tsiah 想著這兩本冊按你遐借--ê，這久聽好 hōo 你紮轉去」2011 伊生第二囡仔按國外轉來 ê 我順禮數紮寡滿月禮送伊佮紅嬰仔，那開講那見著滒尿屎 ê《茶花女》交冊皮 ê 女主角按媠媠 ê 姑娘成做丑仔臉兼規軀衫成做漚鹹菜，腹肚隨著火，總是我是有家教 ê 人，微微仔笑應「這兩本冊送 hōo 恁。」
後來，伊𤆬 2 个囡仔來厝來𨑨迌 mā 那做直銷，一項攏無交易成功 ê 伊見著大漢查某囡仔手提一本法國翻譯尪仔冊講「這圖書館敢若無--neh，敢會使借 gún 查某囡仔轉去讀？」
天增歲月人增歲，我增歲月 mā 增絕情，刺豬因為寒天驚寒，所致想 bueh 倚做伙，學生時代驚做孤鳥 ê 我已經無要意孤鳥插人群 ê 孤單，顛倒意愛這種交家己好好做朋友 ê 日子，𫝛款是微微仔笑，不過這斗 kā 冊按囡仔手頭收轉來講「阿姨相信圖書館有這本尪仔冊，你請媽媽揣你去圖書館借問來看。」
自彼日開始我 m̄ 免閣聽伊賣直銷，三本冊切斷無需要 ê 溫暖 hōo gún 賣囝無叫囝名，當田無從田頭行，切甲透底無來往，值得。
➀ 針鼠 = 刺球豬、針蝟
2021.12.20
