啥物因端 hōo 你起心動念開始寫部落格？你敢捌想過這个問題？這个問題自 2019 以我自帕水就認捌 ê 歌聲記錄雨堡 Regensburg➀行跤花心行尞，伊就宛然秤繚 hōo 我不斷輪迴 tī 秤錘佮秤盤揣平棒。
自第一篇文章恬靜出現 tī 痞客邦，自海明威 ê 中畫有才調以帕水 ê 歌聲一字一字以倉頡輸入法記錄踮遮，自意愛 ê 食譜有才調轉做帕水 ê 歌聲記錄踮遮，自發見帕水 ê 歌聲 m̄ 是此在此山中，雲深不知處(tshú-tsai-tshú-san-tiong，hûn-tshim-put-tì-tshú)偏僻甲無地通請教，倚 bueh 半老老萬事 ē 做 m̄-koh 那做那無攬無拈 ê 元気總算免閣倚靠酸素罐 hōo 家己嚓嚓趒，像窗仔外 ê 膨鼠。
自 2019 接受生份人 ê 建議 bueh 分張𪜶讀無 ê 文字請到部落格分張，我按一日一篇到現此時有著來，無著汰，有著食，無著煞，隨緣交有樣看樣，有例趁例，巡田園，翻田塗，接新枝。2025 翻頭看 2019 uī-tio̍h 相片風格交向時分張 tī 面冊社團是日月蚶 ê 一面白，一面紫棕色 ê 白汫無素交挽頭折脰，無人 kā 我囉 kā 我噪耳，我卻成做家己 ê 相拍雞仔一日到暗交家己掰手面。
相片遮爾仔䆀閣敢豬屎籃仔也提出來品並，現世。M̄ 驚虎生三支喙，只驚人有兩樣心，遮 ê 白汫無素呔 ē 䆀。
2019 到今，我猶纏 tī 這个蜘蛛絲，飛 buē 出去，不過向時 ê 綿豉一日食兩頓，頓頓齊愛翕相 ê 龜怪堅持自 2013 抑是 2012 車日子露營轉來，按早起頓交下昏飯齊愛翕相 ê 綿綿精精轉做 kan-ta 記錄早起頓，然後骨力承綿綿精精逐日愛翕早起頓轉做看天公伯 ê 面腔。
接受看天公伯 ê 面腔有一大部份是 2024 瑞典挪威車日子露營 tī 挪威徛北極箍仔 ê 搪著一對按英國來 ê 翁仔姐交義大利來 ê 先生，逐家坐仝桌冇談天氣人生，義大利先生講「遮 ê 天宛然等待情人轉來 ê 少年，時時㴙㴙落，時不時愛穿雨衣騎鐵馬，煩矣」，德國來 ê 先生 gún 翁隨紲喙「德國 ê 雨水已經厚甲若蠓 hōo 人心情鬱卒，料想 buē 到遮 ê 雨水比傳說 ê 蠓閣較厚」，一年迵冬齊愛聽伊哭呻天公呔無照伊 ê 向望上下班 ê 我白睚一反「遮是挪威，落貓仔狗仔雨是四常➁ 」，看四个外國人講家己母語 ê 英國翁仔姐微微仔笑講「㴙㴙落 ê 貓仔佮狗是 gún-ê 日鬚。」
這段對話 hōo 我想著落霎霎仔雨隨攑雨傘 ê 我來到德國見著𪜶搪著雨來天 mā 無啥攑雨傘抑是幔雨幔 ê 慣勢到這斗車日子露營到瑞典挪威轉著若風颱雨 ê 西北雨瑞典人照常走標照常牽手散步 ê 畫面，我想著按丹麥坐渡船聽法國老師冇談伊搪著 ê 瑞典人分張伊去法國爸母兜行跤花 ê 故事「法國 ê 熱人熱甲 buē 蹛人，後回去法國揣 gún 爸母愛安排 tī 寒人。」
瑞典交挪威寒人落雪莫算在內是雨水綿綿甲無料阿菇窒倒街，殕色是瑞典交挪威上四常 ê 色緻，遮 ê 人順大自然享受人生，我呔討綿豉跟綴德國人 ê 跤步，萬事愛珠光口紅 buē 使得白板。
猶未行踏瑞典交挪威僫得理解瑞典交挪威呔討愛露營車無愛布棚，眼界按德國湠到正港 ê 歐洲北爿，彼若小 Bá-suh ê 露營車是這角勢露營上好 ê 伴 m̄ 是 uī-tio̍h 奢颺展寶。
2024 交翁上北車日子露營 uī-tio̍h 天公伯 ê 面腔，gún 翁仔姐 mā 成做相拍雞仔相觸 buē 離。
「天色殕殕是 bueh 按怎翕相」翁講。
「遮 ê 天氣就是按呢生」我講。
這款對話合該無啥大問題，總是當伊成做跤帛 hōo gún 僫行出門，彼就若洛杉磯 ê 火燒山，燒 buē 離。不過我感謝這場大火，伊燒出 gún 翁掠食老出癖無閣做老嬰 mā 燒出我 ê 耳空掩 teh 去偷提鈴 ê 食菜，食菜，食到肚臍為界，講無要意窮實是要意甲 buē 死 ê 紅龜生蟲，龜怪。
我清楚知影我 ê 部落格是門庭冷落(bûn-tîng-líng-lo̍h)，開門十二冬 tsiah 見一人來探頭 ê 我愛這款清幽，總是呔討猶原纏綴面冊 ê 交繃「豬屎籃仔也提出來品並」，Warum，是按怎按呢生？
我需要深入大腦 kā 食入腦海 ê 毒撈 hōo 清氣啖啖，2014 tī 挪威倚北極箍仔交這對英格蘭翁仔姐冇談，我得著答案。
「Gún kan-ta 鐵馬交遮 ê 必需品，賰 ê 就交 hōo 當地 ê 環境引𤆬 gún 挵險。」
這對翁仔姐兩台鐵馬兩跤鞄，鞄貯布棚、胃腸藥、感冒藥仔、雨幔、替換 ê 衫褲無半項煮食 ê 家私，穿插 mā 無四箍圍仔𫝛款是騎鐵馬旅行 ê 人遐爾仔鐵馬穿插，《幸福路上》阿媽分張 ê「妹妹啊，你相信是什麼，妳的人生就會是什麼，要用心的眼睛看世界。」
你認為自在，世界就自在。你認為無自在，世界 mā 無自在，像近來聽 SWR1 ê Podcast 談著「你無需要啥物攏 ē 曉，m̄-koh 你愛對代誌保持興趣」一段舊漚舊臭 ê 套頭話講出目今 ê 問題。
驚蟄(kenn-ti̍t)交換手 hōo 春分養飼德國、奧地利交瑞士 ê Bodensee 無食著氣象局預測 ê 雨水，gún 遮滿心期待雨水 ê 人類 mā 跟綴 Bodensee 雺霧罩連天行入洘塭底 ê 殕色。
青花仔菜總算按漲懸價一蕊 1.69€ 踅翻頭轉來到 0.89€ 一蕊，無趁這个機會出菜，後過愛等到底時。雞心豆緊浸水透暝，Lidl ê 美國番薯猶原大落價緊去款幾粒轉來備，萬事 tsiâu-tsn̂g Canon 揤落去，那野馬 ê Auto mā 無四界無烏跳格，一切是遮爾仔順序呔討翕出來 ê 相片猶是鐵仔土色。
你認為自在，世界就自在。你認為無自在，世界 mā 無自在，我是 tuì 面冊交繃多情抑是猶無理解啥物是坐清，是佗一个 tsín 捎無摠，圖先儉踮電腦，等心情坐清 tsiah 來處理。
春分交換手 hōo 清明，氣象局 ê 預測猶原若菝仔票，不而過那洘塭底 ê 鐵仔土色勻勻仔𪐞日仔花到齒科回診彼一日，規个天色養天花齒科附近 ê Kaufland mā teh 菜蔬、番薯、塗肉林檎大落價，這是一个好吉兆 。
踮臺灣捷感覺家己是盼仔 m̄ 願交伊行到透流 ê 齒科療程，換到德國總算無一斗斷站 kā 伊自頭行到尾 ê 好心情 mā hōo 我按養花天得著清心通腹腸 ê 恬靜交家己啉一杯咖啡看重翕 ê 相片。
「我猶原感覺伊䆀甲 buē 見人」正爿 tuì 倒爿講。
「媠䆀宛然壁頂 ê 擦仔，2022 你感覺伊媠，2025 你嫌伊鎮地」倒爿講。
Tī 台頂搬，tī 台跤演，悲歡離合，糊塗人生，一齣 koh 一齣，永遠 bē 煞，《日子》台語曆日仔詩 4 月 18 ê 戲宛然海豬藏出水面。這齣漚戲 bueh 拖棚到底時。
你認為自在，世界就自在，tshan-tshiūnn 你認為雞心豆是肉，伊就是肉，我 ê 世間 tī 這秒交前一秒 hām 後一秒完全無相敆，菩提本無樹，何處惹塵埃，青花仔菜鴟鴞喙豆番薯盤落喙心脾感受飽滇 ê 滿足 tsiah 是千年萬世。
你 m̄ 免啥物攏 ē 曉，不過你愛 tuì 代誌保持興趣。2 月日專工去捷克越南市場鉸頭鬃，順便外甥仔點燈火，一切照舅(舊)踅捷克超市揣寶。捷克人順超市菜蔬來推測，捷克人合該愛食豆。這斗行踏捷克超市搪著珠仔豆、秮仔、鴟鴞喙豆齊俗賣 hōo 我那款那 tuì gún 翁展啥物號做正港 ê bué 著俗貨較贏咧做工課。
踮德國罐頭鴟鴞喙豆俗過鮮沢鴟鴞喙豆，捷克敢 mā 按呢生，keine Ahnung。總是按這斗來去捷克越南市場鉸頭鬃所生 ê 好玄，我得著鮮沢鴟鴞喙豆煠好正港若肉 ê 好味素，愛甲。
➀ der Regen 雨，落雨。Burg 有軍事用途 ê 城堡。
➁ Raining Cats and Dogs
