Das Neue ist selten das Gute, weil das Gute nur kurze Zeit das Neue ist.
新嫣罕得是好，起因這个好 kan-ta tī 短時間是新點點
Arthur Schopenhauer
德國有 30% ê 人身體無健康，德國有 4 千外萬人有半頭風問題，德國 ê 關節炎 kiōng-bueh 成做德國國病，德國人 ê 胃腸問題愈來愈 tsuē，德國人 ê 平均歲數比厝邊法國、瑞士等等相比並齊短歲壽，特別是食食文化交德國無宛 2 體 ê 瑞士，德國少年囡仔致著 ADHS(英語 ADHD) ê 比例 mā 逐年 teh 增加。這幾日聽廣播聽著新聞講德國交法國 bueh 合作烘健康 ê 麭，初聽這段話我隨認定家己聽甲走縒，畢竟德國麭是健康 ê 代表。
第二斗聽著這段話，我想著早前 kā 社團面友無料翻譯 ê 新聞 mā 想著舊年行尞 Couleurs d'automne 秋天 ê 色緻食著交德國一模一樣 ê Croissant，德國交法國 ê 味素就是兩條無拍叉仔 ê 大通路。這个感受屬於我個人無代表事實就是如此按呢生。
交我仝途 ê 朋友聽市政府講我無 bueh 參加假日市仔隨來關心我呔 buaih 參加。我 tuì 伊講「gún 兜 ê 麭無夠市仔 ê 需求通排擔」，伊講「這 m̄ 好解決，一包配方透落去，平均 2 ~ 3 點鐘隨出一斗麭。」
我知影配方一透 ē-tàng hōo 家己褲袋仔袋龍銀 m̄ 是袋銀角仔，總是這無敆我 ê 性地，起因一粒材料純然 ê 麭，伊需要時間。
記持僫食餌 ê 我有才調 kā 彼久 ê 無料幫贊鏨 tī 大腦決定有啥物特殊，總是彼久 ê 我 m̄ 捌 uī 別人 ê 問題起清凹(nah)這久更加 buē 著清瘼，畢竟記持 mā 愛喙白。像平平是 Croissant 交 Pizza tī 德國食無路，一到法國隨食到哽胿，這个四常問題 m̄ 捌認真翻草，這久順這个議題沓沓仔巡拋荒 ê 田園是有空敆榫 ê 峇。
德國傳統麭店 kā 工廠拍貨轉來賣 m̄ 是啥物鮮沢 ê 代誌，總是連驕傲 ê 傳統攏有才調 kā 伊按至少起 18 點鐘縮短到起 2 ~ 3 點鐘，甚至按澹轉做焦，德國新世代 ê 喙斗 buē 特殊，紅龜 buē 生蟲 tsiah 龜怪。
德國囡仔一日食 ê 糖大約是 160g，鹽至少 20g ~ 30g，德國囡仔一日 ê 菜單，俗麭敆 Nutella、美國甜箍仔、Pizza、馬鈴薯片、Cola 做滾水啉，簡單一句一日食無半項菜蔬，這个現象 mā m̄-nā 發生 tī 囡仔 mā 發生 tī 大人 hōo 德國醫療負擔 mā 愈來愈重，不過𪜶是商業保險 m̄ 是全民健保，保險通吸收 ê 範圍無咱臺灣健保 ê 佛心，不過 mā 無美國 ê 窮斤算兩 hōo 人感覺破病是有錢人 ê 權利。
「恁講恁 bueh 交法國合作做健康 ê 麭」暗頭仔翁仔姐那食飯那看窗仔 ê 色緻按黃錦錦 ê 卵仁成做鹹鴨卵 ê 紅赤赤那講。
「Bitte/啥物？」翁應。
「廣播講恁 bueh 交法國合作做健康 ê 麭。」
「Gún-ê 麭確實愈來愈走縒，無傳統。」
我 kā 手拍 tī 翁 ê 頭額，「這个問題是你造成--ê」伊笑講。
「確實是我造成，總是你 bueh 踅翻頭我 mā 無意見。」
「年過五十無紅字無營養不良無關節炎，你保養甲誠好」翁 kā 醫生相紲幾仔冬 ê 呵咾搬出來。
「你 Tsiâ，你德國戰車，血壓懸甲 160 閣 kā 臺灣醫生講 tī 德國這是正常 ê 血壓。」
「較好 ê 戰車無保養 mā 生鉎，這久 ê 我保持 tī 120, SENZA SALE 交糖換醣。」
Senza sale 是德國衛生部長 Karl Lauterbach 推廣 ê 概念，講推廣 mā 無正確，總是伊是一位無食加額鹽 ê 人。
咱食 ê 物，除了自來食物無透鹽，賰 ê 齊透鹽，遮 ê 鹽一日零零星星總共過額咱 ê 需求。
德國人食偌鹹，舉 Lidl ê 白銀魚做比喻，一盒 265g，每 100g ê 鹽倚 bueh 6 g，一盒白銀魚食煞，一日 ê 鹽額 mā bueh 到磅，早前來德國我捷喝腹肚疼，彼陣 ê 我掠做脾土 buē 合，一斗上北Cuxhaven 食一尾三文魚煙腹肚隨疼甲轉去人家厝躺三暝三日，然後直接落南，結束。
這个情形 2023 mā 捌發生，不過這个狀況是我家己 kā 腹肚討疼。罕得食著食到吐 ê 亞洲料理，準做 hōo 伊鹹甲舌疼 mā 照推甲脹胿，紲落來 hōo 腹肚抗議三暝三日。
德國衛生部長 ê Senza sale 凡勢鏨 tī 心肝穎，近來 ê 我準做無致意意大利麵、麥角、麥片、核桃、優格遮 ê m̄ 管屬加工抑是自來食物 ê 鹽，我齊 buē 記持這層事，添寡鹽 tiàu 味，特別是豉鹹，像這味按 Djion 學來 ê MARINADE GOURMANDE À LA Moutarde Mielet Balsamique，肉豉三暝三日落鼎煎 hōo 赤赤抑是烘甲脆脆齊 m̄ 捌 tiàu 寡鹽，m̄-koh 胡椒從來 m̄ 捌 buē 記得糝 hōo 我起憢疑海馬敢做乾。
記持 ē 食餌，到今我猶 ē 食國中參加英語演講比賽，高職寫稿趁所費，二專交著歹物仔舞豬舞狗 bueh 十冬 tsiah kā 自由提轉來，出社會搪著無才靠勢 ê 長官到目今一搪著 gún 翁 hōo 𪜶爸母上童我隨有才調熥清飯 hōo 伊食甲喝救人，這表示我 ê 記持無退化，我只是慣勢 Ohne Salz，起因芥辣醬 100g 就有 3g ê 鹽，準做我一斗 tsiah 使用無到 20g，落冰箱冷藏 3 工，伊交德國傳統烘肉 Sauerbraten 酸肉烘相仝，豉一段時間，鹹汫自來。
這是 Google 推薦 hōo 我 ê Canada 食譜，食譜紹介伊 ê 特殊 tī 醬料：Lê-bóng 透咖哩粉 hām 楓仔蜜，我那讀那唸一斡頭隨放 buē 記 hōo 伊成做 Lê-bóng 透楓仔蜜交芥辣醬。
這是記持愛走百米，手頭 ê 標交換手隨 buē 記持比賽猶 teh 進行，抑是田螺循舊逝，較行 mā 彼逝 ê 慣勢，是佗一个？
Kein Ahnung，𠊎毋知，我 m̄ 知機 ê no sé，no idea, je ne sais pas，總是簡單出菜閣好味素。
2025.03.25 語言有越頭症，食食 mā 相仝。交家己 ê 手機仔讀 Chicken Pasta Salad，越頭搪著翁婿隨講 Heute gibt es Nudelnsalat mit Hähnchen zum Frühstück，紲落來英德兩語齊相𫝛 ê Curry 擲做一邊。
2025.06.28 三月日前 ê 新點點成做另外一个新點點，這斗 ê 我總算逐著 Curry。
