第98屆(2026)奧斯卡最佳國際電影嘅競逐正式開跑；而今年打響頭炮嘅係-- 土耳其 !
土耳其文化部電影總署公佈，由15人組成嘅遴選委員會從14部電影中，選出由 Murat Firatoglu 執導嘅 「One of Those Days When Hemme Dies (Hemme’nin öldüğü günlerden biri)」代表該國出戰下屆奧斯卡。
本片乃Murat 自編自導自演之作，講述主角Eyüp喺大城市搵工失敗且欠落一身債，無奈返到鄉下嘅蕃茄乾田打工；不過「有汗出，冇糧出」，Eyüp已被拖欠兩星期薪金，而工頭Hemme卻只掛住催促工人追quota，兩人因而為生發生激烈衝突。烈日當空，加上欠債同生活壓力，Eyüp一時火遮眼返屋企攞槍，準備一野打爆Hemme個頭；但佢嘅復仇之路卻因為村民嘅各種小事而橫生枝節……
「One of Those Days When Hemme Dies」係導演首部長片，入選上年威尼斯影展「地平線(Orrizonti)」單元並獲評審團特別獎；另喺土耳其阿達納金球電影節，從金棕櫚大導 Nuri Bilge Ceylan 手上接過最佳電影殊榮，成件事可謂「素人的勝利」--皆因導演嘅正職其實係一位律師。
Murat Firatoglu。
Murat Firatoglu 1983年生於土耳其東南部城市錫韋雷克(Siverek)一個有10兄弟姊妹嘅大家庭，父母經營攝影館，自小就被光影同文學耳濡目染。18歲果年到迪亞巴克爾(Diyarbakır)修讀法律，並接觸到當地嘅電影學會，學識咗拍片嘅基本技法，並先後執導關於佢叔叔嘅紀錄片「Hay Dust」同短片「The Edge of All Possibles」。
大學畢業後 Murat 到伊斯坦堡執業，但依然冇放棄電影夢，更視之為舒緩工作壓力嘅方法，不斷參與唔同短片Workshop同編劇班，期間亦拍過兩部短片。但佢心底裡依然有一個長片夢，於是喺毫無長片製作經驗同經費嘅情況下，佢決定放手一搏，返到家鄉實踐夢想。
而佢開戲嘅過程亦一波三折﹕屋企人接連有病，加上逆晴，令開拍時間一拖再拖；一開始連題材都未有，係 Murat 喺錫韋雷克街上觀察期間先有靈感；更甚嘅係銀行同親戚朋友借番嚟嘅開拍資金80萬里拉(現時折合156000港元)，都因為貨幣大幅貶值而縮水50%。
好在雖然困難重重，但 Murat 嘅家人依然撐到底，除咗參與台前幕後各個崗位，佢家姐仲變賣埋自己啲金器俾細佬追夢；亦因為呢種低成本「手作仔」式嘅製作，亦為作品確立風格--電影通過大量定位長鏡頭，觀察主角前往報復期間同村民嘅互動，呈現出人嘅良知同憤怨嘅內心搖擺，呢個亦係喺導演從律師工作中觀察各路客人後想表達嘅感受。
「One of Those Days When Hemme Dies」因片中滿有詩意嘅畫面而受到讚譽(就例如海報上震撼嘅蕃茄乾田)，唔少影評都提及電影甚有大師 Abbas Kiarostami 同前輩 Ceylan 嘅影子，亦因此獲得法國發行商Luxbox青睞。完成本片後 Murat 已經返回律師本業，希望將來繼續有機會執導啦。
今次將會係土耳其第32次參賽，當中 Nuri Bilge Ceylan 就曾經6度獲選，包括2014年揚威康城嘅「冬日甦醒(第87屆)」以及最新作品「芳草殘雪(2023年，第96屆)」；而2008年(第81屆)嘅「三隻猴子(Three Monkeys)」就係土耳其唯一一次入選過Shortlist嘅作品。
土耳其近年喺奧斯卡成績麻麻，片長或許係原因之一--Ceylan係出哂名嘅長氣，「芳草殘雪」片長3小時17分鐘；上年(第97屆)代表，Zeki Demirkubuz嘅「Life」都只係短咗4分鐘。另一位攞過金熊獎嘅大導 Semih Kaplanoğlu都不遑多讓，2021年(第94屆)嘅「朝聖之前 懺悔之後」都成兩個半鐘。
雖然影像上有著前輩影子，但片長嚟講「One of Those Days When Hemme Dies」就友善得多，只係短短83分鐘，非常好。作品已經喺Mubi上架，如果有Subscribe可以搵嚟睇；電影未喺港台澳放映過，考慮到唔係好長，各路影展都不妨諗諗佢~~
