七月最後一日，熱得仍然像個開始。
早上七點幾，天已經晒到牆身發白，連冷水洗面都唔夠清醒。午飯後出街一陣，鞋底黏住地磚，行兩步就想返頭入冷氣地方躲一躲。
不過唔知點解，人係會喺咁嘅天氣底下，自然地慢落嚟。
搭電梯時會比平時耐半秒先撳掣，食飯時啲筷子都唔再「鏗鏘有力」，而係慢慢夾、慢慢咬。睇手機都冇乜耐性睇新嘢，反而重看返以前 bookmark 嗰啲貼文、舊片。
街上啲行人，好似冇一個係趕緊時間咁。巴士站嘅人影都靠牆、靠柱，寧願等多兩分鐘都唔想郁。連風吹過嚟，都係懶懶地、輕輕咁拂。
我自己都一樣。今日下晝攤咗一陣，冇做咩實事，冇生產咩內容，但又唔算空白。
腦袋好似只係需要停喺某個畫面—— 例如窗外光影移咗兩格；或者茶几上杯水的凝結點，滴咗落紙巾； 再不然，就係隔離單位傳來冷氣嗡嗡聲，提醒你世界都一齊靜咗啲。
八月明天開始，又會再行、再熱、再忙。
尤其係我——因為親戚嗰邊，搬屋進入最後倒數階段，要開始幫手搬嘢。
七月嘅尾巴就當係休息一下，下一段，再起步。
