電影 - Bugonia - 暴蜂尼亞

有啲嘢你睇落好荒謬其實好真實，有啲嘢好真實其實好意外，咁究竟咩係真實？咩係意外？咁點樣先至係荒謬呢？究竟係荒謬嘅真實，定係意外地荒謬呢？

有兩條友以為自己發現天大嘅秘密，為咗維護世界和平、地球穩定，佢哋決定捉咗藥廠老闆返嚟嚴刑侍候，故仔改編自一齣韓國電影，轉咗手由呢個導演Yorgos Lanthimos拍，再加埋幾個好勁嘅演員，出嚟嘅效果確實係意想不到。

整個故事脈落好似一件好荒謬嘅事，有啲人去相信一啲睇落唔真實嘅事，為到呢啲唔真實唔可信嘅事佢哋做出啲荒謬嘅行為，你一路睇個故仔會一路諗咩人先會係咁，又或者會諗吓其實自己係咪咁，一路睇到結局，你又可能會反轉問其實係咪真係咁？

當然最後導演都係要教訓一下大家啦，但都係一齣非常過癮嘅電影。

仲有一個矚目點係佢嘅配樂，聽聞導演只係俾咗個文字劇本配樂師去做配樂，喺全無畫面下憑着文字用音樂配合劇情，簡直一絕。

推薦。