我的大漢查某囝已經知影，我共第二个查某囝講，伊講；「我知道。」
「怎麼知道的？」
「大姊跟我說的。」
共後生講，我袂記得他講啥物？
閣來就是我的阿兄、小弟、阿嫂、弟婦仔，主要是欲予𪜶（in）知影我有女朋友，有人陪我，毋免煩惱我。佇群組共代誌的經過簡單寫一下。line出去了後，我的大漢弟婦仔敲電話予我，講：「我知道。」
「你怎麼知道的？」
「直覺。有一次在台大校園碰到你，你旁邊那位矮矮的女生，我心裏說：『姑姑是同性戀』。」
閣來是做伙做工課的朋友，共每一群的人講，總是有人講：「我知道。」
「怎麼知道的？」
「直覺。」、「忘了聽誰講的。」……
按呢喔！這件代誌我就毋免藏甲遐辛苦，開始較毋驚人知影。無定定做伙的朋友，其他的親情嘛無講，繼續假做佮進前同款，有翁、囝，「一般」的oo-bá-sáng。𪜶（in）毋知影我活佇２个世界中。Email、部落格、面冊、迷眾頁攏有２个，這２个來往的人無仝款，分甲誠清楚，實在是家己揣麻煩，有夠忝。
人是看會出來的。落尾我去台南稅屋，我佮伊同齊出去食飯，抑是買物仔的時，佮店員講話、開講，𪜶（in）攏會問一句：「你們是姊妹嗎？」
我臆，𪜶（in）看阮不只是朋友，是比朋友較好一寡仔，比朋友較好的，𪜶（in）知影的干焦是「姊妹仔」，就按呢問阮。
有時陣仔，伊想欲招我佮伊的同事同齊去𨑨迌，我講：「你若無愛予人知影，咱就莫同齊出現佇你的熟似人的面頭前，人看會出來。」
（2026.1.9.）
過去的代誌，失敗的經驗—１
教育部台語辭典
