這馬猶有無？
我寫寫一下，才想著，是偌久進前算「以早」？決定30年前算「以早」，古早，30年以內是「這馬」。
▉二、我聽人講的
●講伊的嬰仔無聽話，拍尻川
我中學的時，隔壁的半樓仔頂，稅予一對翁仔某，翁是軍人，敢若是營長，有閒的時才轉來睏，平時踮佇軍營，伊的某家己蹛。某佇街仔的做衫店共人做衫，下班了後，會提衫轉來，暗時仔佇厝內繼續做。
生囡仔了後，阮老母有時陣去看嬰仔，聽嬰仔的老母講，伊的翁講囡仔無乖，愛拍尻川，老母問甘有影拍？有，「嬰仔遐細漢，按怎共拍尻川！」阮老母共我按呢講。
—我想的：做軍人的人，慣勢一句命令，一个動作，想講嬰仔嘛仝款。
●用針鑿
我的國中同學講，𪜶（in）的厝邊仔的老母，受氣，抑是心情無好的時，「針提起來，共囡仔的手指頭仔一直鑿，一直鑿。」
—我想的：查某人對生活無滿意，心情鬱卒，拍囡仔、罵囡仔出氣，用針鑿，傷痕誠細空，厝內面的人，尤其伊的翁看袂出來。
●娶後母照顧伊，伊變做使用人
我同學講的，伊有一个同學，老母過身，伊的老爸想講閣娶一个某，來照顧伊。想袂到，後母生囡仔了後，彼个查埔囡仔變做使用人，愛鬥𤆬小弟小妹，做厝內面的工課。
—我想的：到底是啥人照顧啥人？
●５歲的查某囡仔煮大灶糜
以早佇庄跤，５歲的查某囡仔用細隻椅仔疊跤，徛佇大杜頭前煮糜。
—我聽著這个代誌，感覺足恐怖的，若燙著欲按怎？這馬對細漢囡仔惜命命，以早會曉做就叫伊做，大人誠無閒，閣散，５歲就愛鬥做工課。
●煙筒管有煙的時，𤆬小弟小妹去灶跤食飯
我細漢的時，聽親情，抑是厝邊仔講的。以早，大人愛去田園做穡，囡仔留佇厝內面，佇外口耍，大漢𤆬細漢。老母出門進前交待較大漢的查某囡仔：「你看人兜的煙筒管有煙的時，就𤆬小弟小妹去灶跤食飯。」老母透早就共飯煮好，囥佇灶頂。
—我想的：大人規工無佇厝內，幾若个囡仔敢袂出代誌？𪜶（in）攏嘛講「無法度」。
●老母愛上班，共囡仔鎖佇厝內面
我看報紙頂懸，有人投稿寫的。
●餅拍開，規包愛食完
我以早咧報紙頂面看著的。有一位老母寫，伊的翁規定囡仔共一包餅拍開，規包愛食完，伊感覺食一包傷濟，毋過嘛無共伊的翁講。
—我想的：老爸毋知影過日子的代誌，想講伊較捌，較會曉，家己訂家己的規定，某嘛配合伊的規定。伊的某是伊的部下？無家己的意思？囡仔是「替」伊生的，「替」伊𤆬的，家己袂使有主意？
註：
以早的人有人按呢對待囡仔— 一
教育部台語辭典，https://sutian.moe.edu.tw/zh-hant/
