▉三、這馬猶有。30年以內嘛算「這馬」
●「愛共拍」，烘肉的時
阮兜搬去風景區的半路中，厝較大間，定定有人來𨑨迌。中秋節，阮翁的姊妹仔、外甥仔來烘肉。有人𤆬孫來。
有一个查埔囡仔，量約仔三、四歲，來烘爐邊看一下，邊仔幾若仔阮翁的阿姊同齊講：「愛共拍，愛共拍。」有人共囡仔搝走。
幾分鐘了後，伊閣來看一下，閣有人喝：「愛共拍，愛共拍。」閣予人抱走。下一擺，我共彼个囡仔抱著，講：「佇阮兜袂使拍囡仔。」𪜶（in）閣咧喝愛拍，我的查某囝講：「姑姑，我媽媽抱著他了。」
—我知影𪜶（in）的意思是，共拍，伊才會驚，才知影火是危險的，毋過，大人啥物攏無講，干焦講「愛共拍。」囡仔按怎知影伊是為著啥物代誌予人拍？遐的大人莫名其妙。
●「玩具不收就丟掉。」
我的朋友講，佇𪜶（in）兜，囡仔愛守的規矩是，物仔耍煞愛收，無就共挕捒，伊講：「昨天他又不收，我跟他說不收就丟掉喔！他不理我，我就拿去丟在垃圾桶裏，其實那玩具還挺新的。」
—欲共物仔擲挕，老母家己的心肝內毋甘。其實囡仔的歲數猶未到，伊毋知影「收」佮「擲掉」是啥物意思？
●「大漢就好」
我的查某孫有幾若項的發展較慢，講話較慢，有去上課。我共拄拄熟似的，朋友的朋友講，伊講：「大漢就好」
我講：「古早時代，無其他的辦法，只好等伊大漢就好，毋過這馬有早療課、語言課、復健課，會使去上。雖然大漢就會好，毋過這馬佮人的溝通有問題，有代誌袂曉講，干焦咬人、拍人，別的囡仔咧喝：『XX打人』，伊嘛無咧插，袂曉為家己辨解。上課真濟代誌攏聽無，無興趣，走去邊仔家己耍，無學到。」伊聽了後，才講有影。
—有人干焦看著後來的結果，無看著過程，無去想囡仔本人的日子是按怎過的？
●「不要哭」，「不痛」
有一工，佇社區的中庭，看著一个細漢的查埔囡仔跋倒，咧哭，伊的老爸講：「不要哭。」行幾若步閣講：「不要哭。」我真想欲共講：「人家痛得要死，不能哭嗎?」
有一擺我的查某孫住院，我去顧伊。隔壁床是一个燙傷誠嚴重的嬰仔。逐擺換藥仔的時，哭甲足大聲，顧伊的人講：「不痛，不痛。」我真想欲共講：「你嘴巴說不痛，她就不痛了嗎? 人家痛得要死。」
—遮仔大人想講伊是神、是仙？講袂痛，人就袂痛。痛嘛袂使哭，你家己去痛看覓，看你會哭袂？
●加一項超過30年前聽著的
我的查某囝小學的時，學校開會（親師座談會）我一定會去。有當時仔，別的老母咧講老師傷歹（華語：凶），抑是傷嚴格，囡仔會按怎按怎……，就一定有一个老爸出來講：「將來出社會也會碰到這些事情，這時候先訓鍊一下。」
我真想欲共伊的頭殼𢼌（pa）落去，囡仔猶遐細漢，欲佮出社會的大人拄著的訓鍊仝款，猶未大叢，這叢細叢樹仔就斷去、死去矣！
▉我臆，啥物話攏有人講，啥物代誌照常做，
因為咱是人，一代傳一代的代誌誠濟，無分古早，抑是這馬。
註：
教育部台語辭典，https://sutian.moe.edu.tw/zh-hant/
